ការបម្រើចាំថ្ងៃរបស់ម៉ាថា
ម្ដាយ និងកូននេះខិតខំណាស់ដើម្បីរស់នៅតាមដំណឹងល្អជាមួយគ្នា ។ ម៉ាថាអាចរស់នៅតាមដំណឹងល្អ ដោយការបម្រើដល់ម្ដាយនាងក្នុងរបៀបដ៏ពិសេសមួយ ។
រូបថតដោយ ឡេសលី និលសុន
ម៉ាថាជាយុវនារីអាយុ ១១ ឆ្នាំ មកពីប្រទេសព័រទុយហ្កាល់ ហើយដូចជាក្មេងស្រីជាច្រើនអាយុស្របាលនាងដែរ នាងចូលចិត្តចំណាយពេលជាមួយមិត្តភក្ដិ ញ៉ាំអាហារ និងលេងជាមួយកូនតុក្កតា ។ នាងក៏ចូលចិត្តចំណាយពេលជាមួយម្ដាយនាងផងដែរ ។ ប៉ុន្តែការរស់នៅជាមួយម្ដាយនាង មានន័យថា ម៉ាថារស់នៅខុសគ្នាបន្តិចពីក្មេងដទៃទៀត ។
សូណៃ ម្ដាយរបស់ម៉ាថា បានកើតមកជាមួយនឹងភាពទន់ខ្សោយខាងចលនា ដែលធ្វើឲ្យគាត់ពិបាកដើរ ។ គិតមិនមែនពិការទាំងស្រុងនោះទេ ប៉ុន្តែគាត់ពិតជាត្រូវការឧបករណ៍ជំនួយដើម្បីដើរ ។ គាត់មិនអាចស្លៀកពាក់ដោយខ្លួនឯង ងូតទឹកខ្លួនឯង ឬឡើងគ្រែដេកដោយខ្លួនឯងបាននោះទេ ។ ការណ៍នេះធ្វើឲ្យវាពិបាកសម្រាប់គាត់ដើម្បីរស់នៅម្នាក់ឯង ។ ម៉ាថាមានលទ្ធភាពដើម្បីបម្រើសូណៃ ក្នុងរយៈពេលប៉ុន្មានឆ្នាំចុងក្រោយនេះ ដោយការជួយគាត់ជាមួយអ្វីៗដែលគាត់ពុំអាចធ្វើដោយខ្លួនឯងបាន ។
ម៉ាថានិយាយថា « ខ្ញុំរក្សាកន្លែងខ្ញុំឲ្យបានស្អាត ដើម្បីម្ដាយខ្ញុំអាចទៅមកងាយស្រួល » ។ « ខ្ញុំក៏សម្រាកពីការលេងផងដែរ ដើម្បីខ្ញុំអាចមើលម្ដាយខ្ញុំ និងមើលថាបើគាត់ត្រូវការអ្វីដែរឬទេ ។ បើខ្ញុំកំពុងលេង ហើយគាត់ហៅ ខ្ញុំនឹងប្រញាប់ទៅដោយសារវាអាចមានការបន្ទាន់អ្វីមួយ » ។
ប៉ុន្តែសូណៃព្យាយាមធ្វើឲ្យម៉ាថារស់នៅធម្មតាបំផុតតាមដែលគាត់អាចធ្វើទៅបាន ។ ប្រសិនបើសូណៃពុំត្រូវការជំនួយអ្វីទេ គាត់ធ្វើឲ្យប្រាកដថា ម៉ាថាមានពេលលេងជាមួយនឹងមិត្តភក្ដិរបស់នាង ។
ការរស់នៅតាមសេចក្ដីជំនឿរបស់ពួកគេ
ម៉ាថាមានឱកាសដើម្បីរស់នៅតាមដំណឹងល្អជារៀងរាល់ថ្ងៃ ដោយការបម្រើម្ដាយនាង ។ នាងយកដាក់មកលើខ្លួននូវការទទួលខុសត្រូវជាច្រើន ដែលជាធម្មតាក្មេងៗដទៃទៀតពុំមាន ។ ឧទាហរណ៍ នាងភ្ញាក់ពីព្រលឹមដើម្បីជួយម្ដាយនាងរៀបចំខ្លួនទៅធ្វើការ មុនពេលទៅសាលា ។ បើគ្មានជំនួយពីម៉ាថាទេ សូណៃនឹងមិនអាចទៅណាមកណា ឬទៅធ្វើការជារៀងរាល់ថ្ងៃបានឡើយ ។
ម៉ាថា និងសូណៃក៏ទៅព្រះវិហារជាមួយគ្នាផងដែរ ។ សូណៃបានទទួលបុណ្យជ្រមុជទឹកពេលគាត់អាយុប្រាំបីឆ្នាំ ដូច្នេះម៉ាថាធំឡើងនៅក្នុងសាសនាចក្រ ។ សូណៃបង្រៀនម៉ាថាអំពីសារសំខាន់នៃដំណឹងល្អជារៀងរាល់ថ្ងៃ ។ វិធីមួយដែលគាត់ធ្វើការណ៍នេះ គឺដោយការមានរូបភាពរបស់ព្រះយេស៊ូវគ្រីស្ទជាច្រើននៅក្នុងផ្ទះរបស់ពួកគេ ។
សូណៃនិយាយថា « ខ្ញុំដឹងថា ព្រះមានព្រះជន្មរស់ ហើយថាព្រះយេស៊ូវគ្រីស្ទគឺពិត » ។ « ហើយខ្ញុំចង់ឲ្យមនុស្សគ្រប់គ្នាដែលមកផ្ទះខ្ញុំដឹងថា សេចក្ដីជំនឿគឺសំខាន់ខ្លាំងណាស់ចំពោះខ្ញុំ ។ វាក៏សំខាន់ផងដែរសម្រាប់ខ្ញុំ ដើម្បីបង្រៀនការណ៍នេះដល់ម៉ាថា ដើម្បីឲ្យនាងធំឡើងជាមួយនឹងការចេះដឹងនេះអំពីព្រះយេស៊ូវគ្រីស្ទ » ។
ម៉ាថាបានយកអ្វីដែលម្ដាយនាងបង្រៀននាង ហើយបន្តរៀនបន្ថែមទៀតអំពីដំណឹងល្អដោយខ្លួននាងផ្ទាល់ ។ របៀបមួយដែលនាងចូលចិត្តរៀន គឺដោយការអានព្រះគម្ពីរទាំងឡាយ ដែលជួយនាងឲ្យបង្កើតចំណងទាក់ទងដ៏រឹងមាំមួយជាមួយព្រះវរបិតាសួគ៌ និងព្រះអង្គសង្គ្រោះ ។ នាងនិយាយថា « កាលដែលខ្ញុំអានព្រះគម្ពីរ ខ្ញុំមានអារម្មណ៍ថា ព្រះគ្រីស្ទនៅក្បែរខ្ញុំ » ។
ការស្វែងរកការលួងលោម
ខណៈដែលវាអាចមានការលំបាកក្នុងការមានទំនួលខុសត្រូវជាច្រើន ការទៅព្រះវិហារជារៀងរាល់សប្ដាហ៍ជួយម៉ាថាឲ្យស្វែងរកការលួងលោមដែលនាងត្រូវការ ដើម្បីបន្តជួយម្ដាយរបស់នាង ។ នាងនិយាយថា « ពេលពួកគេអធិស្ឋាននៅពេលចាប់ផ្ដើម និងនៅពេលបញ្ចប់នៃការប្រជុំសាក្រាម៉ង់ វាមានភាពសុខសាន្តណាស់ » ។ « ពេលខ្ញុំនៅទីនោះ ជួនកាលខ្ញុំមានអារម្មណ៍ដូចជាព្រះវរបិតាសួគ៌កំពុងប្រាប់ខ្ញុំថា ខ្ញុំជាមនុស្សល្អ ហើយថាខ្ញុំត្រូវតែបន្តធ្វើជាមនុស្សល្អដើម្បីជួយម្ដាយខ្ញុំ » ។
ពេលណានាងមានអារម្មណ៍ដូចនេះ នាងត្រូវបានរំឭកថានាងមានអំណរគុណយ៉ាងខ្លាំងចំពោះម្ដាយនាង ។ នាងមានអារម្មណ៍ថា ព្រះវរបិតាសួគ៌បានបញ្ចូនពួកទេវតាមកគាំទ្រនាង ។ ម៉ាថានិយាយថា « ខ្ញុំគិតថា ទ្រង់ពង្រឹងខ្ញុំឲ្យខ្ញុំភ្ញាក់ឡើង ហើយសប្បាយចិត្ត និងមានមោទនភាពចំពោះម្ដាយដែលខ្ញុំមាន » ។
មេរៀនមួយដែលសូណៃ និងម៉ាថាបានរៀនជាមួយគ្នាគឺថា ជីវិតនេះមិនងាយស្រួល ឬឥតខ្ចោះ—សម្រាប់មនុស្សគ្រប់គ្នានោះទេ ។ សូណៃនិយាយថា « ពុំមានការលំបាកណាមួយរបស់ខ្ញុំធ្វើឲ្យខ្ញុំកើតទុក្ខនោះទេ ។ ខ្ញុំដឹងថា ព្រះបានប្រទានដល់ខ្ញុំនូវសាច់ ឈាម និងឆ្អឹងនេះតាមរបៀបនេះ ដោយសារខ្ញុំពិសេស ហើយព្រះបានប្រាប់ខ្ញុំថា ខ្ញុំអាចធ្វើវាបាន ។ ខ្ញុំធ្វើវាឲ្យអស់ពីសមត្ថភាព ។ ខ្ញុំអាចធ្វើបន្ថែមទៀត ប៉ុន្តែថ្ងៃនេះ ខ្ញុំមានអារម្មណ៍ធម្មតាចំពោះខ្លួនឯង ។ ខ្ញុំមានមោទនភាពចំពោះអ្វីដែលខ្ញុំធ្វើ អ្វីដែលខ្ញុំមាន និងអ្វីដែលខ្ញុំនឹងធ្វើនៅថ្ងៃស្អែក » ។
ម៉ាថាក៏ដឹងផងដែរថា អ្វីៗនឹងបានល្អ ទោះបីជាជីវិតអាចមានការពិបាកនៅពេលខ្លះ ពេលនាងថែទាំម្ដាយនាង ។ នាងឃើញថា មនុស្សគ្រប់គ្នាមានឧបសគ្គខុសៗគ្នា ។ នាងនិយាយថា « គ្មានជីវិតនរណាម្នាក់ល្អឥតខ្ចោះនោះទេ » ។ ប៉ុន្តែ សូម្បីតែមានឧបសគ្គផ្ទាល់ខ្លួនរបស់នាងក្ដី ម៉ាថានៅតែរកឃើញនូវអ្វីៗដែលល្អនៅក្នុងគ្រប់ស្ថានភាព—ចំណងទាក់ទងដែលនាងមានជាមួយនឹងម្ដាយនាងគឺជាគំរូមួយ ។ « ម្ដាយខ្ញុំមានដែនកំណត់ខាងរាងកាយ ប៉ុន្តែបញ្ញាស្មារតី និងអារម្មណ៍គាត់មានភាពវាងវៃណាស់ ។ យើងពិតជាមិត្តដ៏ល្អណាស់ » ។
មើលឆ្ពោះទៅមុខ
ដូច្នេះ តើមានអ្វីនៅក្នុងពេលអនាគតសម្រាប់ម៉ាថា និងសូណៃ ? ម៉ាថានិយាយថា « ខ្ញុំចង់នៅជិតម្ដាយខ្ញុំ ហើយពិតណាស់ខ្ញុំចង់រៀបការ មានកូន និងមានគ្រួសារមួយ ។ ប៉ុន្តែនៅក្នុងពេលអនាគត ប្រសិនបើអាច ខ្ញុំចង់ទិញផ្ទះមួយសម្រាប់គ្រួសារខ្ញុំ និងម្ដាយខ្ញុំ ដោយសារខ្ញុំមិនចង់នៅឆ្ងាយពីគាត់ទេ សូម្បីតែមួយថ្ងៃ ! »
សូណៃមានអារម្មណ៍សុទិដ្ឋិនិយមអំពីអនាគតផងដែរ ហើយនឹងតែងតែមានអំណរគុណសម្រាប់ភាពជាដៃគូ និងសេចក្ដីស្រឡាញ់របស់ម៉ាថា ។ « វាអស្ចារ្យណាស់ដែលមានកូនស្រីដ៏ប្រពៃម្នាក់ ។ វាល្អណាស់ដែលមានម៉ាថាក្នុងជីវិតខ្ញុំ ។ នាងជាអំណោយទានមកពីព្រះ ។ ទ្រង់បានរៀបចំម៉ាថាដើម្បីមកនៅជាមួយនឹងខ្ញុំ ។