នាងនៅតែជាកូនរបស់យើង
ស្វាមីខ្ញុំ និងខ្ញុំនឹងត្រូវផ្សារភ្ជាប់គ្នា ប៉ុន្តែពិធីបរិសុទ្ធដ៏ពិសិដ្ឋនេះ គឺធំធេងជាងយើងតែពីរនាក់ទៅទៀត ។
រចនារូបភាពដោយ យ៉ូស្វេ ដេននីស
បន្ទាប់ពីរយៈពេលប្រាំពីរឆ្នាំនៃការសង្ឃឹម និងការរង់ចាំដើម្បីមានកូន ស្វាមីរបស់ខ្ញុំ និងខ្ញុំត្រូវបានប្រទានពរឲ្យមានកូនស្រីមួយ ។ អាលីស៊ីជាពន្លឺនៃជីវិតរបស់យើង ប៉ុន្តែនាងបានរស់នៅតែប្រាំខែប៉ុណ្ណោះ ហើយក៏បានស្លាប់ទៅដោយសារជំងឺរលាកសួត ។
នោះគឺជាបទពិសោធន៍ដ៏ពិបាកបំផុតក្នុងជីវិតខ្ញុំ ។ ខ្ញុំត្រឡប់មកផ្ទះពីកន្លែងធ្វើការវិញ ហើយអង្គុយយំរៀងរាល់ថ្ងៃ ។ ជាញឹកញាប់ សាច់ថ្លៃខ្ញុំបានមកអង្គុយជាមួយខ្ញុំដើម្បីផ្ដល់កម្លាំងដល់ខ្ញុំ ។ ខ្ញុំបានបន្តអធិស្ឋានទូលសូមកូនមួយទៀត ប៉ុន្តែមិនមានទេ ។ ខ្ញុំបានវង្វេងនៅក្នុងភាពទុក្ខព្រួយ ។
សាច់ថ្លៃខ្ញុំបានចាប់ផ្ដើមលើកទឹកចិត្តស្វាមីខ្ញុំ និងខ្ញុំឲ្យធ្វើដំណើរទៅព្រះវិហារបរិសុទ្ធសូវ៉ាហ្វីជី ដើម្បីផ្សារភ្ជាប់ ។ យើងមិនដែលបានទៅព្រះវិហារបរិសុទ្ធទេ ហើយយើងបានសម្រេចចិត្តថា នេះជារបៀបដ៏ល្អបំផុតដើម្បីស្វែងរកសេចក្ដីសង្ឃឹម និងការព្យាបាល ។
គ្មានអ្វីអាចរៀបចំខ្ញុំ សម្រាប់អ្វីដែលខ្ញុំបានទទួលអារម្មណ៍នៅថ្ងៃនោះទេ ! ខ្ញុំបានដឹងថា ស្វាមីខ្ញុំ និងខ្ញុំនឹងត្រូវផ្សារភ្ជាប់ជាមួយគ្នាអស់កល្បជានិច្ច ។ ការចេះដឹងនេះបានធ្វើឲ្យខ្ញុំពោរពេញទៅដោយការដឹងគុណ និងសេចក្ដីស្រឡាញ់ ។ ប៉ុន្តែខ្ញុំពុំបានយល់ទេថា ពិធីបរិសុទ្ធដ៏ពិសិដ្ឋនេះ គឺធំធេងជាងយើងតែពីរនាក់ទៅទៀត ។
នៅឯព្រះវិហារបរិសុទ្ធ ខ្ញុំបានរៀនថា អាលីស៊ីអាចផ្សារភ្ជាប់នឹងយើង ។ ខ្ញុំយំដោយសេចក្ដីអំណរ ពេលខ្ញុំបានដឹងពីគោលលទ្ធិដ៏ពិសិដ្ឋនេះ ។ កូនស្រីយើងនឹងជារបស់យើងអស់កល្បជានិច្ច ! ខ្ញុំសូមថ្លែងទីបន្ទាល់ថា ព្រះបានប្រទានអ្វីៗគ្រប់យ៉ាងដែលយើងត្រូវការដើម្បីមានសុភមង្គលនៅក្នុងព្រះរាជដំណាក់ដ៏បរិសុទ្ធរបស់ទ្រង់ ។
តាំងពីពេលនោះមក ស្វាមីខ្ញុំ និងខ្ញុំត្រូវបានប្រទានពរឲ្យមានកូនប្រុសម្នាក់ និងកូនចញ្ចឹមបីនាក់ទៀត ។ តែយើងមិនដែលភ្លេចអាលីស៊ីទេ ។ ដោយសារតែពិធីបរិសុទ្ធទាំងឡាយក្នុងព្រះវិហារបរិសុទ្ធ កូនស្រីរបស់យើងជាផ្នែកមួយនៃគ្រួសារយើងជារៀងរហូត ។
ពេលខ្ញុំជួបនរណាម្នាក់ដែលបានបាត់បង់កូន ខ្ញុំស្គាល់ពីការឈឺចាប់របស់ពួកគេ ។ ប៉ុន្តែខ្ញុំដឹងផងដែរថា ការឈឺចាប់នេះមិនមែនជាទីបញ្ចប់នោះទេ ។ ដោយការបាត់បង់អាលីស៊ី ក៏ដូចជាដកពិសោធការសាកល្បងផ្សេងៗទៀត ខ្ញុំដឹងថាព្រះគង់នៅទីនោះសម្រាប់ខ្ញុំ ។ ពេលខ្ញុំបាក់ទឹកចិត្ត ឬរអ៊ូរទាំអំពីការណ៍ទាំងឡាយ ខ្ញុំដឹងថា ព្រះតែងតែគង់នៅទីនោះ ។
ខ្ញុំដឹងថា ខ្ញុំនឹងជួបអាលីស៊ីម្ដងទៀត ហើយសេចក្ដីពិតនោះបន្តធ្វើឲ្យស្វាមីខ្ញុំ និងខ្ញុំពោរពេញដោយសេចក្ដីអំណរយ៉ាងជ្រាលជ្រៅ ។ ◼