Nambawan Stori blong Ista we Yu Neva Harem Bifo
Lukluk long Buk blong Momon tru long wan niufala laet mo tingting long bigfala witnes we hem i holem abaot trutok ia se Kraes i girap bakegen long ded.
Fas Presidensi leta long Ista
Bae yufala i tingbaot taem we yumi harem wan leta we i kam long Fas Presidensi we oli ridim long wod o branj blong yufala, long sam wik i pas. Leta ia oli anaonsem se long nekis Sandei—ista Sandei—evri wod mo ol branj bae oli mit blong sakramen miting nomo, blong gat inaf taem blong wosip long hom olsem ol famli blong soem bigfala respek long impoten holidei ia.1
Leta blong Fas Presidensi i pulum tingting blong mi blong luklukbak long ol wei we famli blong mifala i bin stap selebretem Ista tru long ol yia. Taem mi tingting moa long ol selebresen blong mifala, miwan mi stap tingting moa se maet yumi save stopem yumiwan blong andastanem tru mining blong holidei ia, we i stamba blong evri wan we oli biliv long Jisas Kraes.
Krismes mo Ol Ista Tradisen
Ol tingting ia oli lidim mi blong tingting hevi long wanem we i defren long wei we mifala i selebretem Krismes wetem wei we mifala i selebretem Ista. Long Disemba, mifala i save gat wan gudtaem wetem ol “Jingkol Bel,” Stonkin blong Papa Noel, ol presen oli stap kolosap long olgeta wanwan, moa tradisen we oli planem gud—olsem blong tekem kea long olgeta we oli gat nid, singsing ol fevret Krismes karol mo ol hym, mo yes, openem ol skripja mo stap ridim stori blong Krismes insaed long buk blong Luk 2. Evri yia taem mifala i ridim naesfala stori ia insaed long wan bigfala Baebol, famli blong mifala i mekem wanem we maet famli blong yufala i mekem tu—werem ol samting olsem ol tawel long hed mo solda blong ripresentem Josef, Meri mo plante we oli kam wosipim bebi Jisas, mifala i aktem tabu stori blong Krismes taem we Sevya i bon i kam long wol.
Ol famli selebresen long taem blong Ista, long sam wei, oli defdefren. Mi filim se famli blong mifala oli dipen moa blong “stap go long jos” blong gat Ista we Kraes i stamba mo Ista we i gat moa mining, mo afta, olsem wan famli mifala i kam tugeta blong serem ol narafala tradisen we i go wetem taem blong Ista. Mi stap laekem tumas blong wajem ol pikinini mo naoia ol apu pikinini blong mitufala we oli stap lukaotem ol Ista ek mo karemaot olgeta insaed long ol Ista basket blong olgeta.
Be leta blong Fas Presidensi i wan wekap singaot. I no from se oli invaetem yumi evriwan blong mekem sua se yumi selebretem gud impoten taem ia taem yumi stap long wol ia—Atonmen mo Laef Bakegen long Ded blong Jisas Kraes—we i stap tekem tu fasin blong stap kwaet mo respektem Lod olsem we i stret long Hem, be tu, oli givim moa taem long yumi wetem ol famli blong yumi mo ol fren long Ista Sandei blong mekem olsem.
Ol toktok ia blong Profet Josef Smit oli ademap sam moa toktok long hamas ol samting we oli hapen long taem blong Ista oli impoten: “Ol stamba prinsipol blong relijin blong yumi oli ol testemoni blong ol Aposol mo ol Profet, long saed blong Jisas Kraes, se Hem i bin ded, oli bin berem Hem, mo Hem i bin girap long nambatri dei, mo i bin go long heven; mo evri narafala samting abaot relijin blong yumi, oli go wetem hemia.”2
Mi mo Lesa i bin toktok raon long wanem mifala save mekem i moa gud long Ista sisen. Maet ol kwestin we yumi bin stap askem long yumi wanwan i wan we yumi evri i stap tingbaot longtaem: ?Long wanem wei nao yumi save soem tru long tijing mo fasin blong selebretem Laef Bakegen long Ded, blong Jisas Kraes, stori blong Ista wetem semmak fasin, we i fulwan, mo ol tradisen we oli rij olsem taem ia we Jisas Kraes i bon i kam long wol, mo Krismes stori?
I olsem se yumi evriwan i stap traem. Mi luk save efot we ol Lata-dei Sent oli stap mekem blong lukluk moa long Kraes evri Ista. Hemia i hapen tu taem we oli kam blong luk save Pam Sandei mo Gud Fraedei olsem sam long ol Kristin kasen blong mifala. Maet bae yumi save mekem Kraes i stamba samting we i mas stap insaed long ol tradisen blong yumi long taem blong Ista we yumi stap praktisim long ol kantri raon long wol.
Man we i stadi long Niu Testeman, N. T. Wright i givim tingting olsem se: “Yumi mas stap tekem step blong selebretem Ista tru ol niufala wei blong krietem samting, tru fasin blong raet, ol gem blong ol pikinini, poem, miusik, danis, selebretem long jos, ol bel, ol spesel konset. … Ista i wan bigfala selebresen insaed long ol lavet Tekemaot Krismes i go, mo long ol toktok blong Baebol, bae yu lusum tu japta long fored blong Matiu mo Luk, i nomo gat nara samting. Tekemaot Ista i go, mo bae yu no gat wan Niu Testeman; yu no gat fasin blong stap olsem wan Kristian man.”3
Ista, Baebol mo Buk blong Momon
Yumi laekem Baebol from evri samting we i tijim long yumi abaot taem we Hem i bon, seves, mo taem oli hangem Hem long kros mo Laef Bakegen blong Jisas Kraes. I no gat faev toktok we i givim moa hop mo i gat panismen blong hem we i no save finis long evri man bitim olgeta ia we ol enjel blong heven oli talem long Ista moning long Garen blong Gref blong Jisas: “Hem i laef bakegen finis: Hem i girap bakegen.”4 Yumi glad bigwan long Niu Testeman skripja we i sevem stori blong Ista mo seves blong Sevya long Ista taem ia long Judia mo Galili.
Taem mi mo Lesa i stap tingting hevi mo lukaotem ol wei blong mekem famli Ista selebresen i kam moa bigwan blong mekem Kraes i stamba, mitufala i jusum wanem skripja riding tradisen nao we bae mitufala i save statem long famli blong mitufala—long Luk 2 i stret tu blong Ista.
Mo afta, mitufala i kasem revelesen ia we i kam long heven: blong ademap hamas ol ves abaot Ista oli impoten insaed long Niu Testeman, yumi olsem ol Lata-dei Sent, we yumi kasem endaomen wetem presen blong Ista ia we i gud tumas bitim ol narawan! Wan presen we i spesel witnes, wan narafala testeman blong merikel blong Ista we i gat insaed, maet, ol nambawan skripja blong Ista long evri bilif blong ol Kristin Man. Yes, mi stap tokbaot Buk blong Momon, moa speseli, hemia we i tokbaot stori blong Jisas Kraes we i kamkamaot long olgeta we oli stap laef long Niufala Wol, long glori blong Hem we i laef bakegen long ded.
Profet Josef Smit i tokbaot Buk blong Momon olsem “Buk we i moa stret,”5 mo i stat wetem 3 Nifae 11, i tokbaot naesfala stori blong Kraes we i laef bakegen long ded we i visitim ol Man blong Nifae, ministri blong Sevya long Ista. Ol skripja blong Ista ia, oli tokbaot rekod blong Laef Bakegen blong Lod, Jisas Kraes.
Long ol japta ia, Kraes i singaotem ol twelef aposol, i tij olsem we Hem i mekem long Bigfala Hil, i anaonsem se Hem i bin mekem loa blong Moses i kam tru, mo ol profesi abaot kam tugeta blong Isrel long ol las-dei ia. Hem i hilim ol sik mo prea from ol pipol long wan wei we oli fulap long glori “no gat wan tang i save talem, mo tu, i no gat eni man i save raetem, mo tu, hat blong ol man i no save tingting nomo long ol bigfala mo gudfala samting olsem we mifala i bin luk mo bin harem Jisas i talemaot; mo i no gat man i save talemaot glad we i bin fulumap sol blong mifala long taem we mifala i harem hem i prea from mifala long Papa.”6
Long Ista ia, famli blong mitufala bae i lukluk nomo long fasfala 17 ves blong 3 Nifae 11, olgeta we bae yufala i save tu long hem. Yufala i tingbaot ol bigfala grup blong ol pipol we oli raonem tempol long graon Baontiful we oli harem voes blong God, Papa mo luk Jisas Kraes i stap kamdaon long heven mo givimaot naesfala Ista invitesen:
“Girap mo kam fored long mi, … blong yufala i save filim ol mak blong ol nil long ol han blong mi mo long ol leg blong mi, blong yufala i save gat save se mi mi God … mo God blong ful wol, mo oli bin kilimded mi from ol sin blong wol.
“Mo … grup blong ol pipol ia i bin go fored, … wanwan … oli bin filim ol mak blong ol nil long han blong Hem, … mo oli bin talemaot se i bin Hem …
Mo … oli singaot long sem taem, oli talem se:
“!Hosana! Blesem nem blong God we I Hae Olgeta!” Mo oli foldaon long ol leg blong Jisas, mo oli wosipim hem.”7
Pikjarem long maen blong yufala, Ol Man blong Nifae long tempol Hil we i tru, !oli bin tajem han blong Lod we i girap bakegen! Mitufala i hop blong mekem ol japta long 3 Nifae i kam wan bigfala pat blong Ista tradisen blong mifala semmak olsem long Luk 2 we i abaot Krismes tradisen. Wanem we i tru i we, Buk blong Momon i serem nambawan stori blong Ista we yu neva harem bifo. Bae yufala i no mekem i kam wan nambawan stori we bae yufala i neva tokbaot.
Mi invaetem yufala blong lukluk long Buk blong Momon tru long wan niufala laet mo tingting long bigfala witnes we hem i stap serem abaot Kraes we i girap bakegen we i tru, semmak long ol fulap rij samting abaot doktrin blong Kraes.
Buk blong Momon i Testifae abaot Jisas Kraes.
Bae yumi save askem, ?Olsem wanem nao taem mifala stap ridim ol skripja long Buk blong Momon long Ista i blesem laef blong mifala mo olgeta we mifala i lavem long wan wei we i gat moa mining? Bitim we wan i save tingbaot. Enitaem yumi rid mo stadi aot long Buk blong Momon, bae yumi save kasem ol nambawan risal.
I no longtaem i pas, mi mo Lesa i bin go long fenerol blong wan dia fren, wan woman blong fet we laef blong hem oli katem i sot from sik blong hem. Mifala i kam tugeta wetem famli blong hem mo ol fren blong hem, mo stap tokbaot ol gudfala memori blong naesfala sol ia we i bin helpem laef blong mifala.
Taem mi stap stanap longwe smol long kofin mo stap storian wetem ol narawan, mi luk tu gel we yia blong tufala i mas stret long Praemeri we tufala i stap kam kolosap long kofin mo stap leftemap tufala long leg blong tufala blong wantem lukluk—ae blong tufala i go kasem en blong kofin nomo—blong givim las respek blong tufala long anti we tufala i lavem tumas. I no gat wan man we i stap kolosap, Lesa i muv i godaon kolosap long saed blong tufala mo givim kamfot mo tijing. Hem i askem filing blong tufala mo sapos tufala i bin save weaples anti blong tufala i stap long hem naoia. Tufala i serem harem nogud blong tufala, be afta, tufala naesfala pikinini gel blong God ia tufala i talem wetem tras mo wota blong ae i fulap se tufala i save se maet hem i stap wetem Jisas.
Long tufala ia we yia blong tufala i smol olsem, tufala i faenem pis long bigfala plan blong stap glad mo, long wei blong olgeta olsem ol pikinini, oli testifae abaot naesfala mo simpol Laef Bakegen long Ded blong Sevya, long wei we i kam tru long hat mo we i tru. Tufala i bin save hemia insaed long hat blong tufala from ol gudfala tijing blong papa mo mama, famli mo ol lida blong tufala long Praemeri we oli planem wan sid blong fet long Jisas Kraes mo laef we i no save finis. Tufala i waes bitim yia blong tufala, ol yangfala gel ia oli andastanem ol trutok we oli kam tru long mesej blong Ista mo seves blong Sevya we i laef bakegen long ded mo ol toktok blong ol profet we oli tokbaot insaed long Buk blong Momon.
Mi bin luk se taem Presiden Russell M. Nelson i stap givim presen blong Buk blong Momon long wan we i no gat semmak bilif olsem yumi, we i tekem tu ol lida blong wol, oltaem bae hem i go long 3 Nifae mo rid abaot Kraes we i laef bakegen long ded we i kamkamaot long Ol Man blong Nifae. Taem i stap mekem olsem, profet we i stap laef i talem witnes blong hem wetem ful hat abaot Kraes we i stap laef .
Yumi no save stanap olsem ol witnes blong Jisas Kraes kasem taem we yumi save talemaot witnes blong yumi abaot Hem. Buk blong Momon i wan narafala witnes blong Jisas Kraes from se, truaot long ol tabu pej blong hem, wan profet afta wan narafala profet oli stap testifae i no abaot Kraes se bae i kam, be tu, se Hem i bin kam.
“From Hem”
Mi stap holem long han blong mi wan fasfala edisen kopi blong Buk blong Momon. Taem mi mekem olsem oltaem, i stap tajem hat blong mi. Truaot long adalt laef blong mi, mi bin gat intres, luksave mo andastanem wanem we yangfala Josef Smit i bin mekem long tabu buk ia blong ol skripja blong transletem mo printim. Ol merikel ia oli mas hapen blong soem wan bigfala samting mo we oli tokbaot longtaem finis.
Be hemia i no wanem we i tajem hat blong mi. Hemia i from se, buk ia, bitim eni narafala wan we oli eva pablisim long wol ia, we i talemaot witnes abaot laef, seves, ol tijing, Atonmen, mo Laef Bakegen long Ded blong Jisas Kraes. Ol dia brata mo sista blong mi, blong stap stadi oltaem aot long buk ia abaot Jisas Kraes, bae i jenisim laef blong yufala. Bae i openem ol ae blong luksave ol niufala janis. Bae i mekem hop blong yufala i kam antap moa mo fulumap yufala wetem bigfala lav. Wanem we i moa impoten, i we hem i bildimap fet blong yufala long Jisas Kraes mo blesem yufala wetem wan stret save se Hem mo Papa blong yumi, Tufala i save yufala, lavem yufala, mo wantem yufala blong faenem rod we i gobak hom wetem wan bigfala leta H.
Ol dia brata mo sista, taem i stap kam kolosap, olsem we ol profet blong taem bifo oli stap talem se, “taem bae i kam we save ia abaot wan Sevya bae i go aot olbaot long evri kantri, famli, lanwis, mo pipol.”8 Yumi stap luk we profesi ia i stap kam tru wetem ol ae blong yumiwan, tru long witnes blong Jisas Kraes we i stap long Buk blong Momon.
I no gat wan moa buk i save mekem olsem blong soem hemia:
-
From Jisas Kraes, evri samting i bin jenis.
-
From Hem, evri samting i kam moa gud.
-
From Hem, yumi save go tru long laef—speseli ol taem we yumi harem nogud tumas.
-
From Hem, evri samting i posibol.
Hem i visit olsem wan Sevya we i laef bakegen long ded, we God, Papa i introdiusum Hem, hemia i wan moa naesfala mesej blong Ista we i fulap long glori. Bae i helpem ol memba blong famli blong kasem wan testemoni blong olgeta wan abaot Jisas Kraes olsem Sevya mo Ridima, we i semak ol rop blong ded.
Mi endem wetem testemoni blong mi abaot trutok we i fulwan blong Buk blong Momon mo abaot Jisas Kraes olsem Pikinini blong God we i stap laef. Long nem blong Jisas Kraes, amen.