Seves blong Ol Aposol Raon long Wol I Gohed

Elda David A. Bednar i visitim Switselan, Ostria, Albania, mo Hangari long Oktoba 2022. Long Switselan, hem i visit wetem hae level U.N blong ol diploma mo, i ripresentem ol oganaesesen raon long wol we i joen wetem Jos long ol projek blong yumaniterian. Long ol narafala kantri hem i mitim ol memba, plante we oli ol paeonia long fet long ol kantri ia.

Hem i se “mifala i stap joen tugeta wetem Ol Sent we oli stap bildimap fandesen blong Jos we bae i stap blong oltaem blong ol jeneresen.”

Stat long São Paulo Tempol Visita Senta long 10 Novemba, 2022, Elda Ronald A. Rasband i tekpat long wan Fesbuk Laef brodkas, we i stap serem witnes blong hem abaot Sevya, Jisas Kraes.

“Oltaem tingbaot se Jisas Kraes, Hem i King blong ol king. Hem i Lod blong ol lod mo Prins blong Pis,” Elda Rasband i testifae.

Mo tu, long Novemba,Elda Gary E. Stevenson i toktok long G20 Religion Forum long Bali, Indonesia. Hem i talem se fet i bes help blong stretem ol problem blong wol taem “oli holemtaet strong ol stamba prinsipol we long semtaem, spirit i lidim olgeta tru long tabu laet we oli ademap mo save.”

Presiden M. Russell Ballard, Akting Presiden blong Kworom blong Olgeta Twelef Aposol, i toktok long ol misinari long Meksiko Siti Misinari Trening Senta long Disemba 2022 mo testifae abaot “spesel janis blong talemaot long wol se Jisas Kraes, Hem i Sevya mo Ridima blong evri man.”

Elda Jeffrey R. Holland i visitim wan seminari klas long Kalifonia, YSA, mo toktok long ol memba we oli toktok lanwis Spanis long eit stek raon long Ventura, Kalifonia long Disemba 2022. Hem i toktok long tugeta lanwis, Inglis mo Spanis. Hem i askem strong long ol memba blong lukluk nomo long ol yut mo ol lida we oli we bae oli kam ol misinari naoia from se “God i stap laef, ol brata mo sista, God i stap laef. !Jos ia i tru!

Presiden Dallin H. Oaks,Fas Kaonsela long Fas Presidensi, i toktok long ol memba mo ol fren blong Jos long Ilinoa, Indiana mo Wiskonsin, YSA, long 11 Febwari, 2023. Hem i toktok long stek senta long Wilmet, Ilinoa, wetem miting brodkas blong 14 stek. Long nekis naet, hem i toktok long kolosap 900 yut mo ol yang adalt we oli kam tugeta long Rokfod Ilinoa, Stek Senta. Miting ia oli mekem brodkas blong hem i go long ol narafala ples olsem Ilinoa, Indiana mo Wiskonsin.

Ol memba mo ol seves volontia blong Jos long India, oli welkamem Elda Dieter F. Uchtdorf taem hem i visitim Niu Delhi, Haederabad, mo Benkaluru long 6 Febwari kasem 17. Elda Uchtdorf i eksplenem se “Mifala i lavem India mo ol pipol. “Mifala i filim paoa we i tajem mifala mo glad tumas.”

Elda Quentin L. Cook i tijim Ol Sent long Madagaska, Sambia, mo Mosambik long taem blong wan visit long Febwari. Moa, mo i bitim 500 pipol we oli no memba blong Jos we oli kam long wan kombaen stek konfrens long Maputo, Mosambik, blong harem toktok blong Aposol. Elda Cook i talem “From se i gat plante we oli no memba blong bilif blong yumi long miting blong Sandei, bae yumi stretem mesej blong yumi blong i kavremap ol prinsipol blong doktrin mo lego wan pikja blong gospel we oli save luk, introdiusum hamas ol profet oli impoten, mo bildimap fet long Jisas Kraes mo Atonmen blong Hem.”

Long Febwari, Elda D. Todd Christofferson i visitim ol memba long Gana, Naejeria, Aevori Kos, mo Liberia long taem we i gat wan12-dei visit i go long Afrika Wes Eria. Long tri ia, i tekem tu wan miting wetem presiden blong Gana. Oli toktok raon long ol tingting blong olgeta we i lukluk nomo long edukesen mo luklukbak long BYU–Pathway Worldwide mo ol Gathering Place program.

Elda Dale G. Renlund i visitim Honduras, Belis, Panama, Nikaragwa, mo Gwatemala long Febwari. Elda Renlund i go wetem waef blong hem, Ruth. Long taem blong visit blong hem, hem i go long wan hospital long Nikaragwa, mo Sista Renlund i help wetem Jos donesen blong haejin kit mo ol klos blong olgeta we oli stap muv raon long Honduras.

Long Maj, Elda Neil L. Andersen visitim Brasil, long ples ia i mitim ol bigbigfala lida blong kantri, i visitim Brasília Brasil Tempol we bae i no longtaem bae oli dediketem, mo i tij mo testifae long ol memba, ol misinari mo ol lida truaot long kantri. Long taem blong tua ia, hem mo sista Kathy Andersen tufala i mitim Das Ledi blong Brasil.

Long taem blong wan visit long Maj, blong go long Meksiko, Elda Geritt W. Gong i mitim Adán Augusto López, minista blong intenal afea insaed long Meksiko. López hem i seken hae rang ofisa long gavman blong ol pipol long Meksiko. Long wan miting long hedkwota blong Ministri blong Intenal Afea, Elda Gong abaot ol jenis we Jos i stap mekem blong bildimap ol famli long Meksiko. Hem i talem “Blong stap mekem olsem, yumi stap kontribiut blong mekem sosaeti i kam strong.

Elda Ulisses Soares i leftemap tingting blong Ol Lata-dei Sent long Pasifik Eria blong gohed blong lukluk nomo long Jisas Kraes. “Taem yumi mekem laef blong yumi i lukluk nomo long Sevya, Jisas Kraes mo traehad blong laef folem gospel blong Hem, oltaem yumi save faenem pis, spel mo glad long rod blong yumi,” hem i talem long wan visit blong hem long Maj we i go long Niu Silan, Tonga mo Fiji.