Fasin blong Gat Kontrol Olsem Hemia blong Kraes
“Nao Jisas i girap, i tok long win ya, i talem se, “!Yu kwaet!” Mo i tok long wota ya we i raf tumas, i talem se, “!I naf! !Yu stap kwaet! Nao win i stop, mo olgeta samting i kwaet.” (Mak 4:39).
Las taem we mi bin toktok long wan jeneral konfrens, man blong gel blong mi, Ryan, i soem wan vidio long mi we i talem se, “?Rili? Nem blong man ia Bragg”—we i minim “blong toktok wetem hae tingting”—“mo afta hem i no tokbaot fasin blong putum yu daon? !Hem i westem nomo!” Sore tumas, be harem nogud i stap gohed.
Naesfala papa blong mi i wan long ol bes pleia blong UCLA we bigfala Koj John Wooden i lukaotem. Oli bin stap kolosap long mifala truaot long laef blong papa blong mi, mo wanwan taem Koj mo Misis Wooden bae oli kam kakae long haos blong mifala. Oltaem hem i glad blong toktok long mi abaot basketbol o eni nara samting we mi stap tingting long hem. Wan taem mi bin askem hem wanem advaes hem i gat blong givim long mi taem mi stap go long las yia blong hae skul blong mi. Olsem wan tija, hem i talem, “Papa blong yu i talem long mi se yu bin joenem Jos Ia blong Jisas Kraes, so mi save se yu gat fet long Lod. Wetem fet ia, mekem sua se yu gat kontrol long evri situesen. Stap olsem wan gudfala man long wan bigfala strong win.”
Long ol yia we i pas, oltaem mi tingbaot storian ia. Kaonsel ia blong stap kwaet, mo save wanem blong mekem long evri situesen, speseli long ol taem blong hadtaem mo wari, i gat bigfala paoa long mi. Mi save luk olsem wanem tim blong Koj Wooden i bin plei wetem kontrol mo bigfala sakses we oli bin eksperiensem blong winim 10 nasonal jampionsip.
Be long ol dei blong tedei, oli no tokbaot tumas kontrol mo oli no praktisim tumas long ol hadtaem mo taem we i nogat yuniti. Plante taem oli stap yusum toktok ia long spot—wan pleia we i gat kontrol i soem se hem i sua long hemwan long wan strong gem o wan tim we i nogat kontrol oli no save soem se oli gat kontrol long olgeta-wan. Be naesfala kwaliti ia, i no impoten long spot nomo be long fulap nara samting long laef. Kontrol i gat wan aplikesen we i moa bigwan long laef mo i save blesem ol papa mo mama, ol lida, ol tija, ol studen, mo evri narawan we i stap go tru ol strong win blong laef.
Kontrol long saed blong spirit i blesem yumi blong stap kwaet mo lukluk moa long wanem we i moa impoten, speseli taem yumi stap long fulap wari. Presiden Hugh B. Brown i tijim, “Fet long God mo long samting we i stret mo gud, i gat paoa long kontrol long saed blong tingting mo spirit long fored blong ol hadtaem.”1
Presiden Russell M. Nelson i wan naesfala eksampol long kontrol long saed blong spirit. Wan taem, taem we hem i Dokta yet Nelson i stap mekem wan hat sejeri blong hat, mo afta blad presa blong sikman ia i stat blong go daon fulap. Dokta Nelson i wajem gud situesen ia long wan kwaet fasin mo i faenemaot se wan long memba blong tim i mestem i karemaot wan pin we i stap holemtaet samting. Kwiktaem oli putumbak, mo Dokta Nelson i kamfotem memba blong tim ia mo talem, “!Samtaem mi lavem yu moa bitim ol nara taem!” Hem i soem olsem wanem oli save handelem wan imejensi—wetem kontrol, lukluk moa long wanem we i moa impoten—mo wok long imejensi ia. Presiden Nelson i talem: “Hem i wan problem blong save gud olsem wanem blong kontrolem yuwan. Nomol wei blong yu ansa bak long ol situesen olsem hem i, ‘!Karemaot mi, koj! Mi wantem gobak long haos.’ Be yu no save mekem hemia. Wan laef i dipen fulwan long wan ful tim blong katem man. Mekem se yu mas stap kwaet mo no seksek mo yu mas lukaot gud.”2
Yes, Sevya i bes eksampol blong kontrol.
Long garen blong Getsemane, we Hem i harem bigbigfala harem nogud, taem “swet blong hem i stap folfoldaon long graon olsem blad nomo,”3 Hem i soem tabu kontrol wetem ol simpol toktok ia we i gat fulap paoa, “Be yu no mekem olsem we mi mi wantem, yu mekem olsem we yu nomo yu wantem.”4 Anda long bigfala wari ia blong save sevem evri man long wol ia, Jisas i soem tri impoten kondisen we i helpem yumi blong andastanem fasin blong Hem blong gat kontrol. Faswan, Hem i save huia Hem mo Hem i stap tru long tabu misin blong Hem. Nekiswan, Hem i save se i gat wan bigfala plan blong sevem man mo stap glad. Mo laswan, Hem i save se tru long Atonmen blong Hem we i nogat en, olgeta evriwan we oli putum yok blong olgeta long Sevya wetem fet, taem oli mekem mo stap holemtaet ol tabu kavenan we oli kasem tru long ol prishud odinens, bae oli sevem olgeta, olsem we Elda Dale G. Renlund i tijim tedei.
Blong luk samting we i defren bitwin blong stap lusum mo holemtaet kontrol, tingbaot wanem i bin hapen taem Kraes mo ol Aposol blong Hem oli lego Garen blong Getsemane. Taem ol soldia oli stap lukaotem blong arestem Jisas, wei we Pita i ansa bak i blong lusum kontrol blong hem mo i faet bak mo katemaot sora blong wokman blong hae pris, Malkas. Wei we Jisas i ansa bak, we i oposit, i blong holemtaet kontrol blong Hem mo blong karem kwaet i kam long had situesen ia mo hilim Malkas.5
Mo blong yumi we oli stap traehad blong stap holemtaet kontrol blong yumi mo maet tingting blong yumi i foldaon, tingting long haf stori blong Pita. Wan sot taem afta long wanem i bin hapen mo blong tanem baksaed long Kraes se hem i no save Kraes,6 Pita i stanap long fored blong ol semmak lida blong relijin we oli kilim Sevya, mo wetem bigfala fasin blong kontrol we oli stap kwestinim hem, hem i serem testemoni blong hem abaot tabu fasin blong Jisas Kraes.7
Save Huia Yu mo Stap Tru long Tabu Aedentiti blong Yu
Yumi tingting long ol kwaliti blong gat kontrol olsem Kraes. Blong statem, blong save huia yumi mo blong stap tru long tabu aedentiti blong yumi, i karem kwaet i kam long yumi. Blong gat kontrol olsem Kraes i nidim blong yumi stopem blong komperem yumiwan long ol narawan mo stap priten blong stap olsem wan we i no yumi.8 Profet Josef Smit i bin tijim se: “Sapos man i no save andastanem fasin blong God, nao oli no andastanem olgetawan bakegen”.”9 Hem i jes no posibol blong gat tabu kontrol taem yumi no save se yumi ol tabu pikinini boe mo gel blong wan Papa long Heven we i gat lav.
Long toktok blong hem “Ol Joes blong Taem we I No save Finis,” Presiden Nelson i tijim ol trutok ia we i nogat en, abaot huia yumi: yumi ol pikinini blong God, yumi ol pikinini blong kavenan, mo yumi ol disaepol blong Jisas Kraes. Afta hem i promes se, “Taem yumi kam blong akseptem ol trutok ia, Papa blong yumi long Heven bae i helpem yumi blong kasem bigfala gol blong yumi blong laef long tabu fes blong Hem, blong taem we i no save finis.”10 I tru, yumi ol tabu spirit we yumi stap gat wan eksperiens blong mit mo bun long wol ia. Blong save huia yumi mo stap tru long tabu aedentiti blong yumi, hem i stamba long divelopmen blong gat kontrol olsem Kraes.
Save Se I Gat wan Tabu Plan
Nekiswan, blong stap tingbaot se i gat wan bigfala plan we i givim strong paoa long tingting mo kontrol long ol kondisen we oli had. Nifae i save “go mo mekem”11 olsem we Lod i givim komanmen blong mekem we hem i “no save yet wanem samting bae [hem] i mas mekem”12 from se hem i save se bae Spirit i lidim hem, blong mekem plan blong Papa long Heven we i gat lav, i kam tru. Kontrol i kam taem yumi lukluk ol samting long wan lukluk long laef we i no save finis. Lod i bin kaonselem ol disaepol blong Hem blong “traem lukluk”13 mo “ol tabu samting blong taem we i no save finis oli mas stastap long maen blong [olgeta].”14 Taem yumi stap tingbaot ol hadtaem wetem wan lukluk long laef we i no save finis, wari i kam wan janis blong lavem, givim seves, tijim, mo blesem. Wan lukluk long laef we i no save finis i givim paoa blong gat kontrol olsem Kraes.
Save Paoa blong Jisas Kraes mo Atonmen blong Hem
Mo laswan, paoa blong Kraes, we i posibol tru long sakrifaes blong Atonmen blong Hem, i givim yumi paoa blong stanap strong kasem en mo stap win. From Jisas Kraes yumi save mekem kavenan wetem God mo kam moa strong taem yumi holemtaet kavenan ia. Yumi save fas long Sevya long glad mo kwaet, nomata long ol situesen blong yumi long wol ia.15 Alma japta 7 i tijim long wan naes fasin abaot paoa blong Kraes. Antap long Sevya we i pemaot yumi long sin, Hem i save mekem yumi kam strong long ol samting we yumi no strong long hem, ol fraet, mo ol hadtaem long laef ia.
Taem yumi lukluk nomo long Kraes, yumi save stopem ol fraet blong yumi, olsem ol pipol blong Alma oli bin mekem long Helam.16 Taem wan ami i kam tugeta blong kilim olgeta, ol fetful disaepol blong Kraes oli bin soem fasin blong gat kontrol. Elda David A. Bednar i bin tijim: “Alma i givim kaonsel long olgeta we oli biliv blong oli tingbaot Lod mo we Hem nomo i save mekem olgeta i go fri (luk long 2 Nifae 2:8). Mo from ol pipol oli bin save se Sevya i stap lukaot long olgeta, nao fraet blong olgeta i stop.”17 Hemia i soem eksampol blong gat kontrol.
Bigfala Man Ia long wan Bigfala Strong Win
Noa i bin tijim yumi fulap abaot fasin blong save wet long taem long wan strong win, be Sevya i bin tija ia we i moa gud long olsem wanem blong laef truaot long wan strong win. Hem i wan bigfala man long wan bigfala strong win. Afta long wan longfala dei blong stap tij wetem ol Aposol blong Hem, Sevya u nidim sam spel mo i talem se bae oli krosem Solwota blong Galili long bot, i go long narasaed. Taem Sevya i stap spel, wan bigfala strong win i girap. Taem ol win mo ol wef i stap wantem blong draonem bot, Ol Aposol oli stat blong fraet from laef blong olgeta. Mo tingbaot se, !sam long Ol Aposol ia oli ol man blong fising we oli save gud ol bigfala strong win blong solwota ia! Be yet, oli wari,18 mo oli wekemap Lod mo askem, “[Lod], Bambae yumi lus nao, be yu yu no wari nating” Afta, wetem eksampol blong gat kontrol, Sevya “i girap, i [talem] long win [mo long wota ya we i raf tumas] ya se, “Yu kwaet” Nao win ya i finis, mo olgeta samting i kwaet.”19
Mo afta i soem wan bigfala lesen blong gat kontrol long Ol Aposol blong Hem. Hem i askem: “?From wanem yufala i fraet olsem? yufala i no biliv yet?”20 Hem i stap rimaenem olgeta se Hem i Sevya blong wol, mo we Papa long Heven i sendem Hem blong mekem [ol pikinini blong God oli] nomo save ded mo i kasem laef we i no save finis. Fo sua, Boe blong God bae i no save ded long wan bot. Hem i soem eksampol blong tabu kontrol ia from se Hem i save tabu fasin blong Hem mo Hem i save se i gat wan plan blong sevem man mo kam olsem wan god, mo olsem wanem Atonmen blong Hem i impoten long sakses ia we i no save finis blong plan ia.
Hem i tru long Kraes mo Atonmen blong Hem we i mekem evri gud samting i kam long laef blong yumi. Taem yumi tingbaot huia yumi, blong stap tingbaot se i gat wan tabu plan blong sore, mo blong karem strong paoa long tingting long paoa blong Lod, yumi save mekem evri samting. Bae yumi faenem kwaet. Bae yumi ol gud woman mo man long eni bigfala strong win.
Letem yumi lukaotem ol blesing blong gat kontrol olsem Kraes, no blong i helpem yumiwan long ol hadtaem nomo, be blong blesem ol narawan mo helpem olgeta blong go tru ol strong win blong laef blong olgeta. Long naet ia bifo Pam Sandei, mi testifae wetem glad abaot Jisas Kraes. Hem i laef bakegen long ded. Mi testifae long pis, kwaet, mo kontrol we i kam long heven we Hem nomo i karem i kam long laef blong yumi, mo mi mekem olsem, long nem blong Jisas Kraes, amen.