Petriakel Blesing blong Yu—Daereksen we i kam long Papa long Heven
Petriakel blesing blong mi i helpem mi blong andastanem tru aedentiti blong mi we i no save finis—mi bin stap wea mo mi save kam wanem kaen man.
Mi bin groap wetem wan gudfala papa mo mama we oli lavem mo stap fetful blong tijim mifala, ol pikinini blong tufala gospel ia. Be papa mo mama blong mi i gat problem long mared blong tufala blong plante yia. Mi bin wan Praemeri pikinini taem mi harem se tufala bae divos wan dei mo mi mo ol brata mo sista blong mi bae mas jusum wan long tufala blong stap wetem. Olsem wan risal, blong plante yia mi eksperiensem plante kaen wari; be, wan presen blong Papa long Heven i bin jenisim evri samting long laef blong mi—petriakel blesing blong mi.
Taem mi gat 11 yia, wari blong mi abaot rilesensip blong papa mo mama i kam bigwan, mi wantem tumas petriakel blesing blong mi. Mi save se Papa long Heven Hem i save gud mi mo save evri jalenj long laef blong mi. Mo mi bin save tu se bae mi kasem daereksen i kam long Hem. Stret afta long 12 betdei blong mi, mi kasem petriakel blesing blong mi. Hemia i moa long haf blong wan senturi i pas, be mi tingbaot gud ol ditel blong tabu eksperiens ia.
Yumi glad se yumi kasem daereksen abaot ol petriakel blesing long Jos Jeneral Hanbuk:
“Evri memba we i klin inaf mo i baptaes, i gat raet mo i sapos blong kasem wan petriakel blesing, we i givim daereksen we i kam tru long insperesen, mo daereksen ia i kam long Papa long Heven.”
Wan memba i mas “bigwan inaf blong andastanem impoten mo tabu saed blong ol blesing” mo “andastanem ol impoten doktrin blong gospel.”
“Bae i gud tumas se memba ia i yangfala inaf blong mekem se i help long plante impoten desisen long laef, we i stap long fored yet. Ol prishud lida oli no mas putum wan minimom yia blong wan memba i kasem wan petriakel blesing.
“Wanwan petriakel blesing i tabu, i konfidensiol, mo i blong wanwan man o woman.
“Hem we i kasem wan petriakel blesing i mas holemtaet ol toktok blong hem, i tingting hevi long ol toktok ia, mo i mas laef klin inaf blong kasem ol promes blesing long laef ia mo long taem we i no save finis.”1
Presiden Russell M. Nelson we yumi lavem tumas, i ripitim long tijing blong hem hamas petriakel blesing i impoten,2 from i givim wanwan man we i kasem “wan dikleresen blong ol laen i go bak long Abraham, Aesak, mo Jekob”3 mo we wanwan blesing ia “i wan skripja blong yuwan.”4
Petriakel blesing blong mi i bin impoten tumas long mi taem mi bin yang from plante risen. Faswan, tru long paoa blong Tabu Spirit, petriakel blesing blong mi i helpem mi blong andastanem tru aedentiti blong mi we i no save finis—mi bin stap wea mo mi save kam wanem kaen man. Hem i helpem mi blong save, olsem Presiden Nelson i bin tijim, se mi bin “wan pikinini boe blong God,” “wan [pikinini] blong kavenan,” mo “wan disaepol blong Jisas Kraes.”5 Mi save se Papa long Heven mo Sevya tufala i save gud mi mo lavem mi mo Tufala i pat blong laef blong mi,. Hem i helpem mi blong wantem blong kam moa kolosap long Tufala mo kam antap long fet mo tras blong mi long Tufala.
Wan dia fren we i bin joenem Jos olsem wan yang adalt i serem se: “Taem petriak i putum ol han blong hem long hed blong mi mo talem nem blong mi, evri samting i bin jenis … i no long taem ia nomo be blong ful laef blong mi. Mi filim stret long taem ia—tru long paoa blong toktok blong hem se—Tufala i save gud mi. Ol toktok ia we hem i talem oli tajem mi fulwan. Mi bin save se Papa long Heven i save gud mi.”
Taem mi save gud mi wan, i helpem mi blong andastanem mo wantem blong mekem wanem God i wantem mi blong mekem .6
Hem i lidim mi blong stadi long ol kavenan mi bin mekem mo ol promes blesing long kavenan blong God wetem Abraham.7 Hem i givim mi wan lukluk we i no save finis we i pusum mi blong kipim ol kavenan blong mi fulwan.
Mi bin stadi petriakel blesing blong mi oltaem, mo olsem wan yut, mi mekem hemia evri dei, we i bin helpem mi filim kamfot, paoa blong Tabu Spirit i gaedem mi, we i help blong katem daon wari blong mi taem mi stap folem ol toktok blong Hem. Hem i leftemap mi blong wantem oltaem invaetem laet, tru tok, mo Tabu Spirit taem mi stap stadi long ol skripja mo stap prea evri dei, mo stap stadi mo stap folem ol tijing blong profet blong God mo ol aposol. Petriakel blesing blong mi i helpem mi blong wantem blong givim mi fulwan long wanem we Papa long Heven i wantem, mo lukluk ia i bin helpem mi blong eksperiensem bigfala glad, nomata ol jalenj blong mi.8
Mi kasem paoa long saed blong spirit evri taem mi stadi long petriakel blesing blong mi. Taem papa mo mama i kam blong divos, petriakel blesing blong mi olsem Presiden Thomas S. Monson i bin tijim, blong mi, i kam “wan gudfala samting blong mi we praes blong hem i bigwan tumas we mane i no save pem,” iven “wan Liahona we i blong miwan.”9
Be plis no andastanem rong. Mi no stret gud evriwan. Mi mekem plante kaen rong. Kompanion blong mi blong taem we i no save finis i save talem se mi stap mekem yet. Be petriakel blesing blong mi i bin helpem mi mo i gohed blong helpem mi blong wantem blong mekem gud moa mo stap gud moa.10 Oltaem mi stadi long petriakel blesing blong mi gat strong tingting blong stanap strong agensem temtesen. Hem i helpem mi gat strong tingting blong sakem sin, mo fasin blong sakem sin i stap gro we i kam wan wei blong kasem glad.
Hem i impoten blong mi blong kasem petriakel blesing blong mi taem mi bin wan yangfala mo taem testemoni blong mi i stap gro yet. Mo tangkyu blong mi we i nogat en i go long papa mo mama blong mi mo bisop blong mi blong andastanem se wanem mi wantem i bin soem se mi rere.
Taem mi bin 12 yia, wol ia i konfius mo i fasfas bitim wol blong tedei. Presiden Nelson i tokbaot tedei olsem “wan taem we i moa fasfas long histri blong wol ia,” wan wol we “fulap long sin” mo “i selfis.”11 !Laki we ol yut blong yumi tedei oli bigwan long saed blong andastaning bitim taem we mi gat 12 yia, mo olgeta tu oli gat ol impoten desisen blong mekem taem oli yang yet! !Olgeta tu oli nid blong save tru aedentiti blong olgeta mo we God i lavem olgeta mo i save gud olgeta!
I no evriwan bae wantem petriakel blesing blong olgeta olsem long taem we mi bin wantem. Be mi prea se ol memba we oli no kasem petriakel blesing blong olgeta yet bae prea blong save wetaem olgeta oli rere. Mi promes se sapos yu rere long saed blong spirit, eksperiens blong yu, olsem blong mi, bae i tabu long yu. Mi prea tu se olgeta we oli kasem petriakel blesing blong olgeta finis bae oli stadi long hem mo kipim gud. From we mi lavem tumas petriakel blesing blong mi taem mi yang, i bin blesem mi wetem strong tingting taem tingting blong mi i foldaon, i givim kamfot taem mi fraet, i givim pis taem mi filim wari, i givim hop taem mi nogat hop, mo givim glad taem sol blong mi i nidim moa. Petriakel blesing blong mi i helpem blong leftemap fet blong mi mo tras blong mi long Papa long Heven Hem i mekem lav blong mi long Tufala i kam antap—mo i stap gro yet.12
Mi testifae se petriakel blesing i givim daereksen we i kam long Papa long Heven. Mi serem witnes blong mi se Papa long Heven mo Pikinini blong Hem—Sevya blong yumi, Jisas Kraes—Tufala i stap laef mo Tufala i save gud yumi, lavem yumi mo wantem blesem yumi. Mi save fulwan tu se Presiden Russell M. Nelson hem i profet blong God long wol ia tedei. Long nem blong Jisas Kraes, amen.