Ol Man blong Folem Prins blong Pis
Taem yumi traehad blong developem ol fasin olsem hemia blong Sevya, yumi save kam ol tul blong mekem pis long wol ia.
Blong mekem profesi we God i givim long Sekaraea i hapen,1 Jisas i sidaon long wan dongki mo go insaed long Tabu Taon taem ol pipol i stap glad mo presem Hem, olsem we oli bin rekodem olsem wan, “saen blong laen blong king blong Jiu, long taem bifo,”2 we hem i stret ia nao blong stap olsem King blong ol king mo Prins blong Pis.3 Plante disaepol we oli glad tumas, oli stap raon tugeta oli stretem ol klos blong olgeta, ol pam lif, mo ol narafala lif long rod we Jisas i pas long hem. Oli presem God, mo talem wetem laod voes, “Hae God, yu blesem King ya we i kam long nem blong yu: Long heven, i gat pis. Long heven antap we antap, olgeta oli stap leftemap nem blong yu.”4 Mo bakegen, “Hosana long Laen ya blong King Deved Hae God, yu blesem man ya we i kam long nem blong yu. Olgeta long heven oli presem nem blong yu.”4 Spesel taem ia, we yumi selebretem long dei ia olsem Pam Sandei, i wan naesfala stat we i lidim yumi i go long wan bigfala taem blong harem nogud we bae i hapen long taem blong impoten wik ia, we i soem sakrifaes we i no selfis blong Sevya, mo naesfala merikel blong hol blong ston we i emti.
Olsem ol man blong folem Hem, Hem i jusum yumi blong taem ia, mo singaotem yumi blong talemaot klin fasin blong Hem,5 mo talemaot pis we Hem i givim wetem tru hat mo atonmen mo sakrifaes blong Hem. Pis ia hem i wan promes presen we oli givim long evriwan we oli tanem hat blong olgeta i go long Sevya mo laef long wan stret mo gud fasin; kaen pis olsem i givim yumi paoa blong glad long laef blong yumi long wol ia, mo helpem yumi blong stanap strong truaot ol bigfala hadtaem long wokbaot blong yumi long wol ia.
Long 1847, Lod i givim ol spesel instraksen long ol paeonia Sent, we oli nidim pis blong save stap kwaet mo stap yunaet taem oli fesem ol hadtaem long wokbaot blong olgeta i go long Wes. Long medel blong ol narafala samting, Lod i givim instraksen long Ol Sent blong “stop blong rao wan wetem narawan; stop blong talem nogud samting agensem wanwan long yufala bakegen.”6 Ol skripja oli talem stret se olgeta we oli mekem ol wok long stret mo gud fasin mo traehad blong wokbaot kwaet wetem Spirit blong Lod, oli kasem promes se bae oli kasem pis we oli nidim blong stap laef truaot long ol noes we oli stap raonem yumi.7
Olsem ol disaepol blong Prins blong Pis, yumi bin kasem instraksen blong laef wetem “ol hat we oli joen tugeta long yuniti mo wetem lav long wanwan long olgeta.”8 Profet blong yumi we yumi lavem tumas, Presiden Nelson, i talem i no longtaem i pas, “Raorao, i agensem evri samting we Sevya i bin stanap from mo tijim.”9 Profet blong yumi i askem strong long yumi blong endem raorao blong yumiwan we oli stap strong insaed long hat blong yumi mo insaed long laef blong yumi.”10
Letem yumi tingting long ol prinsipol ia olsem we klin lav blong Kraes we i gat long yumi, olsem ol man blong folem Hem, oli lukaot blong mekem long wanwan long olgeta. Ol skripja oli talem mining blong kaen lav ia se, i olsem jareti.11 Taem yumi tingting long jareti, oltaem tingting blong yumi i go long ol aksen we i kam tru long bigfala hat mo ol donesen blong givhan long ol hadtaem, long olgeta we oli stap fesem ol hadtaem long saed blong bodi, materiol, o filing. Be yet, jareti i no go nomo wetem samting we yumi givim long wan olsem donesen, be hem i wan fasin blong Sevya mo i save kam pat blong fasin blong yumi. I no wan sapraes se Lod i givim instraksen long yumi blong putum klos ia we i jareti, … we i blong joenem fasin blong stap stret gud evriwan mo pis.”12 Sapos i nogat jareti, yumi nating,13 mo yumi no save kasem ples we Lod i bin rere long hem blong yumi insaed long ol haos blong Papa blong yumi long Heven.14
Jisas i soem wan eksampol we i stret gud evriwan we i talem wanem i minim blong joen long fasin blong stap stret gud evriwan mo pis, speseli long taem blong bigfala harem nogud we i tekem ples mo i folem kasem ded blong Hem. Tingting blong smoltaem abaot wanem nao Jisas i bin filim taem Hem i wasem leg blong ol disaepol blong hem wetem tingting we i stap daon, mo blong save se wan long olgeta bae i salem hem long semmak naet ia.15 O taem Jisas, afta sam aoa, wetem bigfala sore, i hilim sora blong wan man we i bin folem Judas, we hem nao i salem Jisas, blong oli arestem Hem.16 O iven taem Sevya i stanap long fored blong Paelat, ol jif pris mo ol elda oli tok strong agensem Hem, mo Hem i no talem wan toktok agensem ol giaman toktok we i kam agensem Hem, mo hemia i bin mekem gavna blong Rom i sapraes tumas.17
Tru long ol trifala had taem ia, Sevya, nomata we Hem i hevi wetem ol harem nogud mo wari, i bin tijim yumi tru long eksampol blong Hem se “bigfala lav i save wet longtaem, mo i kaen; … i no save jalus; … i no mekem tingting blong hem i go antap, mo i no save flas, i no tingting long eni nogud samting, mo i no glad long rabis fasin.”18
Wan narafala impoten pat blong tokbaot, mo wan tingting we i stret long fasin blong yumi blong stap wan disaepol mo olsem wanem yumi talemaot pis blong Sevya, i fasin we yumi tritim wanwan long yumi. Long taem blong seves blong Hem long wol ia, tijing blong Sevya i no lukluk nomo long , be speseli, long klin fasin blong lav, jareti, gat longfala tingting, putum tingting i stap daon, mo gat bigfala sore—oli ol stamba fasin we i go long olgeta we oli wantem blong kam moa kolosap long Hem mo talemaot pis blong Hem. Ol fasin ia oli ol presen we oli kam long God, mo taem yumi traehad blong developem olgeta, bae yumi stat blong luk ol neba blong yumi long defren wei mo ol samting we oli no strong long hem, wetem fasin blong andastanem moa, luksave, respektem mo gohed strong. Wan long ol nambawan saen we yumi pruvum se yumi stap kam kolosap moa long Sevya mo stap kam moa olsem Hem, i wei we yumi tritim ol fren blong yumi wetem lav, gat longfala tingting mo kaen fasin, nomata long ol situesen.
Oltaem yumi luk ol pipol we oli tekpat long ol komen we oli nogud mo iven ol lukluk blong fasin we i no soem respek abaot ol wiknes, mo ol tingting blong ol narawan, speseli nao taem ol fasin olsem mo ol tingting oli defdefren o oli go agensem hao oli tekem aksen mo hao oli tingting. Hemia i hapen oltaem blong luk ol pipol ia oli stap pasem ol kaen komen olsem i go long ol narawan, we oli ripitim wanem oli harem, iven oli no save situesen we i stap. Sore tumas, sosol media i sapotem kaen fasin olsem wetem tingting ia se i tru mo i klia. Wanem yumi no save kontrolem, hem i ol storian long fon, we oltaem i atakem ol narawan mo statem fasin blong raorao, mekem man i harem nogud, spolem ol hat mo stopem frensip.
Nifae i profesae se long ol las dei, enemi bae i mekem man i kros mo mekem ol pipol blong oli kros agensem wanem we i gud.19 Ol skripja oli tijim se “evri samting we i stap invaetem mo switim man blong mekem samting we i gud, mo blong lavem God, mo blong wok blong hem, i kamaot long God.”20 Long narafala toktok “samting we i nogud, i kam long devel; from devel i wan enemi blong God, mo i faet agensem hem oltaem, mo i stap invaetem mo switim ol man blong mekem sin, mo blong mekem samting we i nogud oltaem.”21
Stap tingting long tijing ia blong profet, i no wan sapraes se wan long ol trik blong enemi i blong statem fasin blong raorao mo kros insaed long hat blong ol pikinini blong God. Hem i glad taem hem i luk ol pipol oli stap talem nogud ol narawan, jik jikim ol narawan, mo mekem giaman toktok abaot ol narawan. Fasin olsem i save spolem laef, nem mo nogat respek long yuwan, speseli taem oli mekem jajmen long wan man o woman we i no fea. Bae i no stret blong poenemaot hemia taem yumi letem kaen fasin ia i kam insaed long laef blong yumi, yumi mekem rum long hat blong yumi blong enemi i planem sid blong mekem i isi blong stap long medel blong yumi, stap long denja blong foldaon long ol bigfala trap blong hem.
Sapos yumi no lukaot gud long ol tingting blong yumi, ol toktok mo ol aksen, long en, bae enemi i fasem yumi wetem ol trik blong hem, blong prapa spolem ol rilesensip blong yumi wetem ol pipol raon long yumi mo olgeta we yumi lavem.
Ol brata mo sista, olsem we Hem i jusum yumi blong taem tedei mo olsem ol pipol blong putum pis, bae yumi no save letem ol trik blong ivel wan ia blong oli tekem ples insaed long hat blong yumi. Yumi no save karem wan harem nogud we i stap kakae yumi mo spolem ol filing, ol rilesensip mo iven laef blong yumi. Gospel i ripresentem ol gud nius blong bigfala glad.
Yes i tru, i nogat wan long yumi i stret evriwan, mo i tru, i gat ol taem we devel i giaman long yumi i go long kaen fasin olsem. Tru long lav blong Hem we i stret evriwan, mo Hem we i save e kontrolem, oltaem Sevya i stap traem blong wonem yumi long ol denja. Hem i tijim “From wetem sem jajmen we yufala i jajem man, bae Lod i jajem yufala; mo wetem mak we yufala i givim, hemia i mak we Lod bae i givim long yufala bakegen.”22
Ol dia brata mo sista blong mi, taem yumi traehad blong developem ol fasin olsem hemia blong Sevya, yumi save kam ol tul blong Hem blong mekem pis long wol folem paten we Hem, Hemwan i mekem. Mi invaetem yufala blong tingting long ol wei we yumi save jenisim yumiwan i kam ol pipol we oli stap leftemap, sapotem, ol pipol we oli save andastanem samting mo gat wan hat we i save fogiv, ol pipol we oli lukaotem ol gudfala samting long ol narawan, oltaem tingbaot se, “sapos i gat samting we i klin, i luk naes, o i gudfala mo i nambawan tru, mifala i lukaotem ol samting ia.”23
Mi promesem yufala se taem yumi lukaotem mo developem ol fasin olsem hemia blong Kraes, bae yumi kam moa mo moa gudfren mo kea moa long ol nid blong ol fren blong yumi24 mo bae yumi kasem eksperiens blong glad, gat pis, mo kam antap long saed blong spirit.25 Mi save stret se Lod bae i luksave ol hadwok blong yumi mo givim ol presen we yumi nidim mo kam moa rere blong akseptem mo gat longfala tingting wetem ol mistek blong yumi wanwan, ol wiknes mo ol fasin blong yumi we oli no stret evriwan. Blong ademap, bae yumi kam moa gud blong save stopem strong tingting blong sem we i kam long yumi o strong tingting ia blong wantem mekem nogud tu long olgeta we oli mekem yumi harem nogud. Olsem we Sevya i bin mekem, filing blong yumi blong wantem fogivim olgeta we oli tritim nogud yumi o toktok nogud abaot yumi, bae i kam antap mo kam pat blong fasin blong yumi.
Bae tedei, long Pam Sandei ia, openem ol longfala klos blong yumi blong lav, mo pam lif blong jareti, folem eksampol blong Prins blong Pis, taem yumi rere blong selebretem Sandei we i stap kam ia, merikel blong tumb we i emti ia. Olsem ol brata mo ol sista long Kraes, letem yumi talemaot wetem glad, “Hosana long Laen ya blong King Deved Hae God, yu blesem man ya we i kam long nem blong yu. Olgeta long heven oli presem nem blong yu.”26
Mi testifae se Jisas Kraes i stap laef mo lav blong Hem we i stret evriwan, i soem tru long atonmen mo sakrifaes blong Hem, we i go long evriwan we oli wantem blong wokbaot wetem Hem mo glad long pis blong hem long wol ia mo long wol we i stap kam. Mi talem ol samting ia long tabu nem blong Sevya mo Ridima, Jisas Kraes, amen.