Stap Faenem Pis blong Yuwan
Mi prea se bae yufala i faenem pis, helpem plante blong faenem, mo pasem i go long ol narawan.
Ol dia brata mo sista blong mi. Yumi gat blesing blong kasem ol tijing blong insperesen mo naesfala miusik we i tajem hat blong yumi long opening sesen blong jeneral konfrens. Mifala talem tangkyu long yufala blong tekpat mo from fet blong yufala.
Tedei bae mi tokbaot wanem mi bin lanem abaot merikel blong stap faenem pis blong yuwan, nomata long wanem situesen blong yu. Sevya i save se evri pikinini blong Papa long Heven oli wantem tumas blong gat pis, mo Hem i talem se Hem i save givim long yumi. Yufala i tingbaot ol toktok blong Jisas Kraes we oli rekodem long buk blong Jon: “Mi putum pis blong mi i stap wetem yufala. Mi nomo mi givim pis ya long yufala. Mo pis ya we mi mi givim i no olsem pis we ol man blong wol oli save givim. Yufala i no letem tingting blong yufala i trabol, yufala i no fraet.”1
Ol situesen blong olgeta we oli harem Hem i talem ol toktok ia , oli soem long yumi wanem Hem i minim taem Hem i talem pis mo olsem wanem Hem i givim. Lisin long storian blong Jon abaot impoten pat blong ministri blong Kraes long wol ia. Ol strong paoa blong devel oli stap traem blong stopem Hem mo i no longtaem, stopem ol disaepol blong Hem.
Hemia ol toktok blong Sevya:
“Sapos yufala i lavem mi, bambae yufala i save obei long ol tok blong mi. …
“[Bae] mi askem long Papa blong mi, mo hem bambae i givim wan narafala Man blong Givhan long yufala, blong hem i save stap oltaem wetem yufala.
“Narafala Man ia i Spirit [blong] Trutok. Ol man blong wol ia oli no save tekem hem blong givhan long olgeta, from we oli no save luk hem. Be yufala i save hem, from we hem i stap wetem yufala, mo hem bambae i stap long laef blong yufala.”
“Taem mi mi aot long yufala, mi no save lego yufala i stap nomo olsem. Bambae mi mi save kambak bakegen long yufala.
“Bambae i no longtaem ol man blong wol ia oli nomo save luk mi, be yufala bambae i save luk mi yet.
“Long dei ia, bambae yufala i save we laef blong mi i stap joen long laef blong papa blong mi, mo laef blong yufala i stap joen long laef blong mi.
“Man we i kasem gud ol tok blong mi, mo i stap obei long olgeta, man ia nao i lavem mi. Mo man we i lavem mi, Papa blong mi bambae i lavem hem. Mo mi bambae mi lavem hem, nao bambae mi save soemaot mi long hem blong hem i savegud mi.
“Nao Judas ya we i no Judas Iskariot, i askem, “?Masta*, bambae yu mekem olsem wanem blong yu soemaot yu long mifala, be yu no soemaot yu long ol man blong wol?”
“Nao Jisas i talem long hem se, “Man we i lavem mi, hem bambae i save obei long ol tok blong mi. Mo Papa blong mi bambae i lavem hem, nao bambae mi wetem Papa blong mi i save kam stap wetem hem, [mo] mekem hom blong mitufala wetem hem.
“Man we i no lavem mi, hem i no save obei long ol tok blong mi. Ol tok ya we yufala i harem long mi, i no kamaot long mi, i kamaot long Papa blong mi we hem i sanem mi mi kam.
“Mi mi talemaot ol tok ia long yufala long taem ia we mi mi stap yet wetem yufala.
“Mo Spirit ya blong Givhan, we hem i Tabu Spirit, we bambae Papa blong mi i save sanem i kam long nem blong mi, hem bambae i save tijim yufala long olgeta samting. Bambae hem i save mekem yufala i tingbaot olgeta samting ya bakegen, we mi mi stap talem long yufala.
“Mi givim pis long yufala mo pis ia we mi givim long yufala i no olsem pis we ol man long wol oli save givim. Yufala i no letem tingting blong yufala i trabol, yufala i no fraet.”25
Mi bin lanem faef trutok aot long tijing ia blong Sevya.
Faswan, presen blong pis oli givim afta we yumi gat fet blong obei long ol komanmen blong Hem. Blong olgeta we oli ol kavenan memba blong Jos blong Lod, blong stap obei i wanem we yumi bin promes finis blong mekem.
Nambatu, Tabu Spirit bae i kam mo stap wetem yumi. Lod i talem se, taem yumi gohed blong stap fetful, Tabu Spirit bae i stap insaed long yumi. Hemia i promes ia we i stap insaed long prea blong sakramen se Spirit bae i kompanion blong yumi mo bae yumi filim, long ol hat mo ol maen blong yumi, kamfot blong Hem.
Nambatri, Sevya i promesem yumi se taem yumi holemtaet ol kavenan blong yumi, yumi save filim lav blong Papa mo Pikinini blong wanwan long yumi mo yumi. Yumi save filim paoa blong Tufala long laef blong yumi long wol ia, mo bae yumi gat semmak blesing ia wetem Tufala blong taem we i no save finis.
Nambafo, stap obei long ol komanmen blong Lod i nidim moa long fasin blong obei. Yumi mas lavem God wetem evri hat, strong paoa, maen, mo sol blong yumi.3
Olgeta we oli no lavem Hem, oli no obei long ol komanmen blong Hem. Mo i mekem se, bae oli no kasem presen blong pis long laef ia mo long laef we i stap kam.
Nambafaef, hem i klia se Lod i lavem yumi inaf blong pem praes blong ol sin blong yumi mekem se—tru long fet blong yumi long Hem mo fasin blong sakem sin, tru long paoa blong Atonmen blong Hem—gat presen blong pis we “i bitim save blong yumi,”4 long laef ia mo wetem Hem blong taem we i no save finis.
Sam long yufala, maet fulap long yufala, i no stap filim pis we Lod i promesem. Maet yu bin prea from pis blong yuwan mo kamfot long saed blong spirit. Maet yu stap filim yet se ol heven i no stap lisin mo ansarem ol prea blong yu blong gat pis.
I gat wan enemi blong sol blong yu we i no wantem yu, mo olgeta yu lavem, blong faenem pis. Hem i no save glad from pis ia. Hem i stap wok blong stopem yu blong wantem blong faenem pis we Sevya mo Papa long Heven i wantem blong yu gat.
Ol efot blong Setan blong putum fasin blong raorao mo no laekem ol man raon long yumi i stap kam antap. Yumi stap luk pruf blong hem we i stap hapen long ol kantri mo siti, ol neba, long lektronik media, mo raon long wol.
Be yet i gat risen blong gat hop; hem i Laet blong Kraes we i stap long evri pikinini we i jes bon i kam long wol. Wetem laet ia we i wan presen long ful wol, i gat wan filing blong samting we i raet, wan filing blong hat blong lavem mo blong oli lavem yu. I gat wan filing blong jastis mo trutok we i bon i kam wetem evri pikinini blong God taem hem i kam long wol ia.
Hop blong yumi blong gat pis blong yuwan blong ol pikinini ia, i stap long olgeta we oli kea long olgeta. Sapos olgeta we oli lukaotem ol pikinini ia mo givim seves long olgeta, oli wok blong kasem presen blong pis we i kam long Sevya, bae olgeta, tru long eksampol mo efot blong olgetawan, i leftemap fet blong pikinini ia blong i kwalifae from presen blong pis ia.
Hemia i wanem ol skripja i promesem: “[Tijim pikinini long rod blong hem i folem: mo taem bae i kam bigwan, bae hem i no save aot long rod ia.]”5 Pikinini ia bae i nidim wan we i responsibol blong kea mo lukaotem hem, blong i klin inaf blong kasem presen blong pis.
Sore we yumi evri wan i bin filim soa ia taem ol pikinini we ol gudfala mama mo papa—samtaem papa o mama nomo—oli jusum defren rod afta long wan laef we i gat fet mo pis long hem.
Iven taem yumi no hapi, hop blong mi i stap long wan nara presen we i kam long Lod. Hem i hemia: se Hem i resemap plante man blong putum pis long medel blong ol disaepol we Hem i trastem. Olgeta oli bin filim pis mo lav blong God. Olgeta oli gat Tabu Spirit long hat blong olgeta, mo Lod i save gaedem olgeta blong go faenem olgeta we oli lusum rod.
Mi bin luk hemia truaot long laef blong mi mo raon long wol. Yufala i bin luk tu. Sam taem, yu jes sek nomo se samting i hapen taem Tabu Spirit i stap gaedem yu blong helpem wan man.
Wan taem, mi bin askem nomo long wan woman we mi mitim hem long wan trip se, “?Yu save talem smol abaot famli blong yu?” Storian ia i tekem mi go mo mi askem blong luk wan pikja blong gel blong woman ia we i wan adalt, we i talem se hem i stap gotru ol hadtaem. Mi glad tumas long gudfala fasin we mi save luk long fes blong gel long pikja ia. Mi filim strong blong askem sapos mi save gat imel adres blong hem. Gel ia long taem i bin lus mo i stap askem hemwan sapos God i gat eni mesej blong hem. Lod i gat. Hem i: “Lod i lavem yu. Hem i bin oltaem lavem yu. Lod i wantem yu blong kambak. Ol blesing we oli promesem long yu i stap yet.”
Ol memba blong Jos raon long wol oli bin filim presen blong pis we Lod i givim. Hem i stap leftemap tingting blong evriwan blong helpem ol narawan blong gat ol janis blong kam long Hem mo kwalifae from semmak pis ia blong olgetawan. Mo olgeta bae oli jusum blong lukaotem insperesen blong save olsem wanem oli save pasem presen ia i go long ol narawan.
Jeneresen ia we i stap kam antap, bae oli kam ol man ia blong lukaot long jeneresen we bae i kam biaen. Ol efot blong olgeta bae i mekem wan merikel. Bae i go olbaot mo gro taem i stap go, mo kingdom blong Lod long wol bae i redi mo welkamem Hem wetem ol singaot blong hosana. Pis bae i stap long wol.
Mi talemaot witnes blong mi we i sua se Sevya i laef mo Hem i stap lidim Jos ia. Mi bin filim lav blong Hem long laef blong mi mo lav mo wari blong Hem long evri pikinini blong Papa long Heven. Invitesen blong Sevya ia blong kam long Hem i wan saen blong pis.
Presiden Russell M. Nelson hem i profet blong God we i laef long ful wol ia. Hem i bin talem, “Mi talem long yufala bakegen se nomata long kondisen blong wol mo ol situesen blong yufala wanwan, yu save go tru long fiuja wetem hop mo glad.”6
Mi talemaot lav blong mi long yufala. Bigfala fet mo lav blong yufala i stap kasem ol pipol mo i stap letem Lod blong i jenisim ol hat mo afta, kasem wan hat we i wantem blong givim presen blong pis we i bitim save blong yumi, long ol narawan.
Mi prea se bae yufala i faenem pis, helpem plante blong faenem, mo pasem i go long ol narawan. Bae i gat wan naesfala wan taosen yia blong pis taem Lod i kam bakegen. Mi testifae olsem wetem glad, long nem blong Jisas Kraes, amen.