2023
Wan Profet we I Stap Laef blong Ol Las Dei
Mei 2023
11:22

Wan Profet we I Stap Laef blong Ol Las Dei

I Kam Elda Allen D. Haynie

Blong Olgeta Seventi

Papa long Heven i bin jusum wan fasin blong stap talemaot trutok long ol pikinini blong Hem tru long wan profet.

Taem mi wan yangfala boe, mi laekem tumas Satedei from se evri samting we mi mekem long dei ia i mekem mi hapi. Be nomata long wanem mi mekem, oltaem bae i lidim mi i go long wanem we i moa impoten long ol nara samting—blong stap wajem katun long televisen. Wan Satedei moning, taem mi stap stanap kolosap long televisen mo stap jenisim ol janel, mi faenemaot se katun we mi wantem blong faenem, oli putum wan brodkas blong jeneral konfrens blong Jos Ia blong Jos blong Jisas Kraes blong Ol Lata-dei Sent, i tekem ples blong hem. Long taem we mi stap lukluk long televisen mo stap komplen se i nogat katun, mi luk wan man we hea blong hem i waet we i werem wan kot mo nektae, i stap sidaon long wan naesfala jea.

I gat wan samting we i spesel abaot hem, mekem se mi askem bigfala brata blong mi se “?Huia ia?”

Hem i talem, “Hemia Presiden David O. McKay; hem i wan profet.”

Mi tingbaot se mi filim wan samting mo mi save long wan wei, se hem i wan profet. Afta, from se mi wan yangfala boe we mi laekem blong wajem katun, mi jenisim janel. Be mi neva fogetem wanem we mi bin filim long sotfala taem ia, wan samting we i kamaot we mi neva save. Wetem wan profet, samtaem i tekem wan smoltaem nomo blong save.1

Blong save tru long revelesen se i gat wan profet we i stap laef long wol, i jenisim evri samting.2 I mekem wan blong i nogat intres long wan toktok abaot, wetaem nao wan profet i stap toktok o wan i eva bin jusum wijwan kaonsel blong profet blong folem o no folem.3 Kaen save olsem we i kam tru long revelesen i stap invaetem wan blong trastem kaonsel blong wan profet we i stap laef, iven sapos yumi no andastanem fulwan.4 Nomata evri samting ia, wan Papa long Heven we i stret gud evriwan mo gat lav, i bin jusum fasin blong stap talemaot trutok tru long revelesen, long ol pikinini blong Hem, i tru long wan profet, wan we i neva lukaotem wan tabu koling olsem mo i no nidim help blong yumi blong save long ol samting we oli no stret gud evriwan.5 Wan profet i wan we God, Hemwan i mekem i rere, i singaotem, stretem, givim insperesen, i wonem, mekem i kam tabu mo sapotem.6 Hemia i from wanem yumi neva stap long denja long saed blong spirit taem yumi folem kaonsel blong ol profet.

Nomata se yumi laekem o no, oli bin jusum yumi evriwan long sam wei long laef bifo laef long wol ia blong bon i kam long ol las dei ia. I gat tu samting we tufala i tru we i konek wetem ol las dei. Fas trufala samting i Jos Ia blong Kraes, bae i kambak bakegen long wol. Nambatu samting we i tru, i we, ol samting bae oli kam moa had. Ol skripja oli tokbaot se long ol las dei bae i gat “wan bigfala win blong aes ston bambae i kam blong spolem gud ol kaekae blong wol ia,”7 ol rabis sik,8 bambae oli harem abaot ol wo mo ol toktok olbaot abaot ol wo, mo ful wol bae i muvmuv olbaot, … mo rabis fasin bae i kam plante.”9

Taem mi wan pikinini, ol profesi ia abaot las dei, oli stap mekem mi fraet mo i mekem se mi prea se Seken Kaming bae i no kam long taem mi stap laef—wetem sam sakses, be i no hapen yet. Be naoia mi prea se bae i hapen, nomata se bae ol jalenj we oli talem bae i kam tru,10 from se taem Kraes bae i kambak blong rul, evri kriesen blong Hem bae oli “mekem oli stap gud.”11

Ol situesen we oli stap hapen naoia long wol, oli mekem sam oli fraet. Olsem ol kavenan pikinini blong God, yumi no nid blong mekem olsem o blong save olsem wanem blong pas tru long ol trabol taem ia. Yumi no nid blong fraet.12 Ol doktrin mo ol prinsipol we yumi mas folem blong stap sef long saed blong spirit mo stanap strong long saed blong bodi, oli stap long ol toktok blong wan profet we i stap laef.13 Hemia i from wanem Presiden M. Russell Ballard i talemaot se “i no wan smol samting … blong gat wan profet blong God long medel blong yumi.”14

Presiden Russell M. Nelson i bin testifae se “God i bin bildimap wan, longtaem finis wan fasin blong stap tijim ol pikinini blong Hem tru long ol profet, we i givim hop long yumi se Hem bae i blesem wanwan profet mo se Hem bae i blesem olgeta we oli lisin gud long ol kaonsel blong wan profet.”15 So, ki, hem i blong folem profet we i stap laef.16 Ol brata mo sista, ol tijing blong profet oli no save kam moa impoten folem hamas yia blong olgeta, we i defren long ol komik buk mo ol trak we i gat valiu blong samfala taem nomo. Hemia i from wanem yumi no mas lukaotem nomo blong yusum ol toktok blong ol profet blong bifo blong lego ol tijing blong ol profet we oli stap laef.17

Mi lavem ol parabol we Jisas Kraes i bin yusum blong tijim ol prinsipol blong gospel. Mi wantem blong serem wetem yufala long moning abaot wan tru parabol we i hapen long laef.

Wan dei mi wokbaot i go insaed long wan ples blong kaekae long ol hedkwota blong Jos blong kakae lanj. Afta we mi tekem wan trei blong kaekae, mi kam insaed long ples blong kakae mo mi luksave wan tebol we evri trifala memba blong Fas Presidensi oli sidaon long hem, mo i gat wan jea we i emti i stap long saed. Fraet blong mi i mekem se hariap mi wokbaot long wan narafala daereksen aot long tebol ia, afta, mi harem voes blong, Presiden Russell M. Nelson, we i stap talem, “Allen, i gat wan emti jea long ples ia. Kam mo sidaon wetem mifala.” Mekem se mi go.

Kolosap en blong lanj taem, mi sapraes blong harem wan noes we wan i stap skwisim strong wan samting, mo taem mi lukluk i go, mi luk se Presiden Nelson i leftemap stret i go antap plastik blong wota blong hem afta, i skwisim mo sarem lid blong hem.

Afta, Presiden Dallin H. Oaks i askem kwestin, “Presiden Nelson, ?from wanem yu skwisim plastik wota blong yu?”

Hem i ansa, “Hemia from se bae i mekem i isi long olgeta we oli stap wok blong mekem gud ol plastik wota ia bakegen, blong i no tekemap tumas spes long kontena we i blong mekem gud olgeta bakegen.”

Taem mi stap tingting hevi long hemia, mi harem semmak noes ia bakegen. Mi lukluk long raet saed blong mi, Presiden Oaks i skwisim plastik wota botel blong hem olsem we Presiden Nelson i mekem. Afta, mi harem sam noes long lef saed blong mi, Presiden Henry B. Eyring i stap skwisim plastik wota blong hem, nomata se hem i stretem folem wan nara wei, we i mekem botel i slip stret, we i tekem moa efot bitim taem we oli leftemap i go stret antap. Blong luksave hemia, wetem kaen fasin, Presiden Nelson i soem long hem teknik ia blong leftemap we i moa isi blong mekem plastik wota i kam flat.

Long poen ia, mi lei i go long Presiden Oaks mo wetem kwaet fasin, mi askem se “?fasin ia blong stap skwisim plastik wota i wan niu samting we man i nidim blong mekem long ples blong kaekae ia?”

Presiden Oaks i ansa, wetem wan smael long fes blong hem, “Okei, Allen, yu nidim blong folem profet.”

Mi gat tras se Presiden Nelson i no stap talemaot sam niufala doktrin blong fasin blong mekem gud ol plastik long ples blong kaekae. Be yumi save lanem blong olsem wanem Presiden Oaks mo Presiden Eyring oli kwik18 blong mekem mo folem eksampol blong Presiden Nelson we i tingting moa blong help blong tijim olgeta we oli tekpat long wan moa gudfala wei.19

Sam yia i pas, Elda Neal A. Maxwell i serem sam tingting mo kaonsel blong profet long poen we i blong dei blong yumi:

“Long ol manis mo ol yia we i stap kam, ol samting we oli stap hapen bae oli nidim wanwan memba blong jusum blong folem o blong no folem Fas Presidensi. Ol memba bae oli luk se i moa had blong stanap strong longtaem bitwin tu tingting.

“Letem yumi mekem wan rekod, blong mekem se ol joes oli kam klia, letem ol narawan oli mekem olsem we bae oli fesem kaonsel blong profet.

“Jisas i talem se, taem we fig tri bae i putumbak ol lif blong hem, sama i stap kam kolosap.’ !Oli mas anaonsem se sama i stap finis, bae yumi no komplen long taem i hot!”20

Ol jeneresen ia we i stap kam antap, long wan taem we bae i gat moa lif blong fig tri mo moa ples i hot moa. Wanem we i stap hapen ia i fosem wan hevi responsabiliti long ol adalt blong taem tedei, speseli long taem blong folem kaonsel blong profet. Taem ol papa mo mama oli no folem kaonsel blong profet we i stap laef, bae oli no lusum nomo ol promes blesing blong olgetawan be bae i moa nogud blong tijim ol pikinini blong olgeta se wanem wan profet i talem i no impoten o se oli save jusum blong folem wan long ol kaonsel blong profet mo no wari sapos bae i save leftemap laef blong olgeta long saed blong spirit.

Elda Richard L. Evans i bin talem long wan taem se: “Sam papa mo mama oli mekem mistek ia blong filim se i oraet blong no strik tumas long wei ia … se bae oli muv sloslo long ol impoten samting mo bae i no mekem eni samting long famli blong olgeta o long fiuja blong famli blong olgeta. Be sapos wan paren i go smol aotsaed, yes, i tru, ol pikinini bae oli save go moa long eksampol blong papa mo mama blong olgeta.”21

Olsem wan jeneresen, we oli gat wan tabu wok blong rere long ol jeneresen ia we i stap kam antap, from rol blong hem we oli bin profesae long ol las dei,22 we rol ia i mas hapen long wan taem we paoa blong enemi i kam moa strong,23 yumi no save kam wan ples we bae yumi gat tu tingting from wanem i impoten blong stap folem kaonsel blong profet. Hem i stret kaonsel ia we bae i letem ol jeneresen ia we i stap kam antap blong luk “enemi taem hem i stap longwe yet; mo afta, bae [oli] save rere blong stanap agensem atak blong enemi.24 Ol smol aksen blong yumi blong kamaot, ol samting we yumi fel blong mekem, o blong ansa long kaonsel blong profet long wan nogud wei, i olsem se yumi no stap komitim yumi fulwan blong folem rod blong kavenan; be taem enemi i gat bigfala ples long laef blong ol jeneresen ia we i stap kam antap, kaen aksen olsem i save mekem oli lego rod ia fulwan. Kaen fasin ia i save afektem bigwan ol jeneresen ia we i stap kam antap.25

Sam long yufala i save filim se, yufala i no mekem inaf efot blong folem kaonsel blong Presiden Russell M. Nelson. Sapos hemia i situesen, sakem sin, statem bakegen blong folem kaonsel blong profet we God i bin jusum. Putum long saed katun ia blong ol pikinini we i save pulumaot tingting mo trastem hemia we Lod i anoentem. Stap glad from se “i gat wan profet long Isrel” wan moa taem bakegen.”26

Iven sapos yu no sua, mi witnes se bae yumi save winim ol paoa blong enemi mo iven kamaot long olgeta. Yumi nao ol Sent blong ol las dei, mo hemia i ol gudfala dei. Yumi bin wari blong kam long wol long taem ia, stap trastem se bae oli no lego yumi blong foldaon taem enemi bae i traem yumi tru long ol tingting we i fasfas blong tudak27 be blong tekem kaonsel mo daereksen tru long hem we i gat atoriti mo talem, long yumi mo ful wol, “Olsem ia nao Lod God i talem.”28 Long tabu nem blong profet we God i resemap, Tabu Wan blong Isrel,29 iven Jisas Kraes, amen.

Ol Not

  1. I no longtaem i pas, Presiden Russell M. Nelson i invaetem ol studen blong Brigham Yang Yunivesiti blong kasem semmak eksperiens tru long revelesen eksperiens: “Askem Papa blong yu long Heven sapos i tru se mifala ol aposol mo ol profet blong Lod. Askem sapos mifala i bin kasem revelesen long hemia mo ol narafala samting” (“The Love and Laws of God” [Brigham Young University devotional, Sept. 17, 2019], speeches.byu.edu). Luk tu long Neil L. Andersen, “The Prophet of God,” Liahona, May 2018, 26–27: “Yumi gat spesel janis ia, olsem ol Ol Lata-dei Sent, blong kasem wan witnes blong yumiwan, se koling blong Presiden Nelson i kam long God.” Storian blong Alma we i bin lisin long profet Abinadae i givim yumi wan moa pruf se revelesen abaot wan profet i stap blong yumi evriwan (luk long Mosaea 13:5; 17:2).

  2. “Bae yumi jusum blong gat wan profet o bae yumi gat nating; mo blong gat wan profet, yumi gat evri samting” (Gordon B. Hinckley, “We Thank Thee, O God, for a Prophet,” Ensign, Jan. 1974, 122).

  3. “Oli stat blong no biliv long spirit blong profesi mo long spirit blong revelesen; mo ol jajmen blong God i bin lukluk olgeta stret long fes blong olgeta” (Hileman 4:23; luk tu long Doktrin mo Ol Kavenan 11:25). “Yumi singsing mo oltaem mekem, ‘Tangkyu Papa God Yu Givim Profet.’ I gat plante bigfala man we oli wantem blong putumaot sam moa toktok long en blong leta se: ‘Oli givim long yumi blong i save lidim yumi blong kasem wanem we yumi wantem o wanem we ol hat blong yumi oli wantem’” (Teachings of Presidents of the Church: Heber J. Grant [2002], 80).

  4. “Samtaem bae yumi kasem ol kaonsel we bae yumi no save andastanem o i no aplae long yumi, iven afta we yumi no prea from o tingting long hem. No sakemaot kaonsel, be holemtaet. Sapos wan man we yu trastem i givim wanem we i moa gud bitim sanbij mo mekem promes se sanbij ia i gat gol insaed long hem, maet bae yu holem long han blong yu folem waes tingting blong smoltaem, stap seksekem sloslo. Evri taem mi bin mekem hemia wetem kaonsel we i kam long wan profet, afta long wan taem, ol pisis blong ol oli stat blong kamkamaot” (Henry B. Eyring, “Finding Safety in Counsel,” Ensign, May 1997, 26; luk tu long 3 Nifae 1:13; Doktrin mo Ol Kavenan 1:14).

  5. Luk long 2 Nifae 4:17–18. “No tok agensem mi from mi no stret evriwan, mo papa blong mi tu, from hem i no stret evriwan, be i moa gud se yufala i talem tangkyu long God we hem i bin soemaot long yufala, ol samting blong mifala we i no stret evriwan, blong mekem se yufala i save lanem blong stap moa waes bitim we mifala i bin stap” (Momon 9:31).

  6. Luk long Doktrin mo Ol Kavenan 3:6–8; luk tu long Doktrin mo Ol Kavenan 93:47.

  7. Doktrin mo Ol Kavenan 29:16.

  8. Luk long Doktrin mo Ol Kavenan 84:97; luk tu long Doktrin mo Ol Kavenan 87:6.

  9. Doktrin mo Ol Kavenan 45:26, 27.

  10. Luk long Doktrin mo Ol Kavenan 1:38.

  11. Hosea 2:18. “From we bae mi kamaot mo soemaot mi aot long heven i kamdaon wetem paoa mo bigfala glori, wetem evriwan we oli stap long heven, mo bae mi stap wetem stret mo gud fasin wetem ol man we oli stap long wol, blong wan taosen yia, mo ol nogud man bambae oli no save stap” (Doktrin mo Ol Kavenan 29:11).

  12. Luk long 1 Nifae 22:16–17luk tu long Doktrin mo Ol Kavenan 59:23.

  13. “From luk, oli bin sakemaot ol toktok blong ol profet. Taswe, sapos papa blong mi bae i stap long graon ia, afta we Lod i bin givim oda long hem blong ronwe aot long graon ia, luk, bae hem tu, i ded.” (1 Nifae 3:18; luk tu long 2 Nifae 26:3; Doktrin mo Ol Kavenan 90:5).

  14. M. Russell Ballard, “His Word Ye Shall Receive,” Liahona, July 2001, 65.

  15. Russell M. Nelson, “Ask, Seek, Knock,” Liahona, Nov. 2009, 82. “I nogat wan man we i save hapi bitim taem i stap folem kaonsel blong profet we i stap laef” (The Teachings of Lorenzo Snow, ed. Clyde J. Williams [1996], 86).

  16. “Putum ae blong yu long olgeta we oli prisaed long Jos tedei, o tumoro, mo mekem laef blong yu folem olgeta bitim blong stap laef long olsem wanem ol profet blong taem bifo oli bin lukluk o tingting o toktok” (The Teachings of Harold B. Lee [1996], 525).

  17. Presiden Spencer W. Kimball i bin talem wantaem se “olgeta we oli bin lukaot long hol blong ston blong ded blong ol profet oli stat naoia blong stap stonem olgeta we oli stap laef” (The Teachings of Spencer W. Kimball, ed. Edward L. Kimball [1982], 462). “Ol moa impoten toktok we yumi save harem, tingting hevi, mo folem, oli ol toktok we Lod i givimaot olsem revelesen tru long profet we i stap laef” (Ronald A. Rasband, “Ol Samting we Oli blong Sol blong Mi,” Liahona, Novemba 2021, 40).

  18. “Taem yumi harem kaonsel blong Lod we Presiden blong Jos i talem tru long ol toktok blong hem, ol ansa mo aksen blong yumi oli mas stap lukluk long gud saed mo kwik” (M. Russell Ballard, “His Word Ye Shall Receive,” Liahona, July 2001, 65).

  19. “Oltaem ol profet mo ol aposol we oli stap laef, oli stap lidim Jos Ia blong Jisas Kraes. Nomata oli man we oli save ded mo oli no stret evriwan, ol wokman ia blong Lod oli kasem insperesen blong helpem yumi stap longwe long ol samting we oli putum spirit blong yumi long denja, mo blong helpem yumi blong pas tru long laef long wol, i sef i go kasem las ples we i long heven” (M. Russell Ballard, “God Is at the Helm,” Liahona, Nov. 2015, 24).

  20. Neal A. Maxwell, “A More Determined Discipleship,” Ensign, Feb. 1979, 69, 70.

  21. Richard L. Evans, “Foundations of a Happy Home,” in Conference Report, Oct. 1964, 135–36.

  22. Luk long Doktrin mo Ol Kavenan 123:11; luk tu long Robert D. Hales, “Our Duty to God: The Mission of Parents and Leaders to the Rising Generation,” Liahona, May 2010, 95–98.

  23. Luk long Doktrin mo Ol Kavenan 52:14.

  24. Doktrin mo Ol Kavenan 101:54.

  25. Luk long Mosaea 26:1–4.

  26. 2 King 5:8.

  27. “From we, taem bae yufala i mekem olgeta samting ia, ol get blong hel bae oli no save win agensem yufala; yes, mo Lod God bae i ronemaot ol paoa blong tudak long fored blong yufala, mo bae i mekem ol heven oli seksek blong gud blong yufala, mo blong glori blong nem blong hem” (Doktrin mo Ol Kavenan 21:4, 6). “I no gat wan man we i folem ol tijing o i tekem advaes o kaonsel long hemia we i stanap olsem wan we i ripresentem Lod, i bin eva go longwe” (Doctrines of Salvation: Sermons and Writings of Joseph Fielding Smith, ed. Bruce R. McConkie [1998], 243).

  28. Esikel 3:27. “From toktok blong hem, bambae yufala i kasem, semmak olsem se hem i kamaot long maot blong Lod Hemwan, wetem fasin blong save wet longtaem mo wetem fet” (Doktrin mo Ol Kavenan 21:5).

  29. Luk long 1 Nifae 22:20–21; luk tu long 3 Nifae 20:23.