Hosana long Hae God we I Hae Olgeta

I Kam long Elda Ronald A. Rasband

Blong Kworom blong Olgeta Twelef Aposol

Bigfala win blong Jisas Kraes we i kam insaed long Jerusalem mo ol taem blong wik ia we i kam afta, i soem doktrin we yumi save aplae long laef blong yumi.

Tedei, olsem we oli talem, yumi joen wetem ol Kristin man raon long wol blong ona long Jisas Kraes long Pam Sandei ia. Kolosap 2,000 yia i pas, Pam Sandei i makem stat blong las wik blong ministri blong Jisas Kraes long wol ia. Hem i wik we i moa impoten long evri wik long histri blong man.

Wanem we i stat wetem welkam blong Jisas wetem glad, olsem Mesaea ia we oli bin promesem, i kam insaed long Jerusalem; i klos wetem Jisas we oli krusifaem Hem mo I Laef Bakegen long Ded.¹ Tru long tabu plan ia, sakrifaes blong Atonmen blong Hem i endem ministri blong Hem long wol ia, we i mekem i posibol blong yumi blong laef wetem Papa blong yumi long Heven blong taem we i no save finis.

Ol skripja i talem long yumi se wik ia i stat wetem ol hip blong ol man we oli stap stanap long get blong siti blong luk “Hemia profet ya we i kamaot long Nasaret, long distrik ya Galili.”² Oli “tekem ol han blong pamtri, nao oli go blong mitim hem we oli stap singaot oli talem se, “!Hosana! Hae God, yu blesem man ya we i kam long nem blong yu. Yu blesem King ya blong ol laen blong Isrel.”³

Baebol stori ia blong longtaem finis i rimaenem mi taem mi stap long wan Jos asaenmen long Takoradi, Gana. I bin hapen se, mi bin stap long we long Pam Sandei.

Mi go blong seraotem Takoradi Gana Stek blong krietem Mpinstin Gana Stek. Tedei, i gat ova long 100,000 memba blong Jos long Gana.⁴ (Yumi welkamem Majesti blong Hem, King Gaw Mawn-Chay, blong Akra, Gana, we i stap wetem yumi tedei.) Taem mi stap wetem Ol Sent ia, mi bin filim bigfala lav mo komitmen blong olgeta long Lod. Mi bin talemaot bigfala lav blong mi long olgeta, mo we Presiden blong Jos i lavem olgeta. Mi bin gobak long ol toktok blong Sevya we Jon i rekodem: “Se yufala i mas lavlavem yufala, olsem we mi mi lavem yufala.”⁵ Oli bin singaotem konfrens ia “Mi lavem yu konfrens.”⁶

Taem mi lukluk i go antap mo kam daon long ol laen blong jea blong ol dia brata mo sista ia mo ol famli blong olgeta long japel, mi save luk testemoni mo fet blong olgeta long Jisas Kraes, i saen long ol fes blong olgeta. Mi bin filim tingting blong hat blong olgeta blong oli kaontem olgeta olsem pat blong Jos blong Hem raon long wol. Mo taem kwaea i singsing, oli singsing olsem ol enjel.

Olsem long Pam Sandei blong longtaem, hemia i ol disaepol blong Jisas Kraes we oli kam tugeta blong soem respek blong olgeta long Hem, semmak olsem olgeta ia long ol get blong Jerusalem we oli singaot, “Hosana … : Blesem man ya we i kam long nem blong Lod.”⁷

Iven ol memba blong wan nara jos kolosap, oli stap givim ona ia long Pam Sandei. Taem mi stap toktok antap long pulpit, mi luksave olgeta aotsaed long windo we oli stap wokbaot wetem glad daon long strit mo oli stap saksakem ol lif blong pamtri long han blong olgeta, olsem olgeta ia long foto ia. Hem i wan samting we mi luk we bae mi neva fogetem—yumi evriwan long dei ia, we yumi stap wosipim King blong olgeta king.

Presiden Russell M. Nelson i bin talem long yumi blong mekem Pam Sandei i “tabu tru taem yumi no tingbaot nomo ol pam lif ia we oli saksakem blong ona long Jisas i kam insaed long Jerusalem, be blong tingbaot tu ol hol long han blong Hem.” Presiden Nelson i tokbaot Aesea we i tokbaot promes blong Sevya we i talem se, “Bae mi neva fogetem yu,” wetem ol toktok ia: “Mi mi makem nem blong yufala i stap long han blong mi finis.”⁸

Lod i save faswan se laef long wol ia i had. Ol soa blong Hem oli rimaenem yumi se Hem i “bin kamdaon bitim … evri samting ia”⁹ mekem se Hem i save helpem yumi taem yumi safa mo stap olsem eksampol long yumi blong “stap long rod,”¹⁰ we hem i rod blong Hem, se “God bae i stap wetem [yumi] blong oltaem mo oltaem.”¹¹

Pam Sandei i no jes wan taem nomo, wan nara pej long histri wetem wan deit, taem, mo ples. Bigfala win blong Jisas Kraes we i kam insaed long Jerusalem mo ol taem blong wik ia we i kam afta, i soem doktrin we yumi save aplae long laef blong yumi.

Bae yumi luk sam long ol doktrin ia we i no save finis we i kamaot long ministri blong Hem go kasem en long Jerusalem.

Faswan, profesi. Eksampol, OlTesteman profet Sakaraea i bin profesae long bigfala win blong Jisas Kraes we i kam insaed long Jerusalem, mo i tokbaot tu we bae Hem i ron long wan dongki.¹² Jisas i bin tokbaot (Laef Bakegen long Ded) Resureksen blong Hem taem hem i stap rere blong go insaed long siti, mo i talem:

“Naoia yumi stap go antap long Jerusalem, mo long ples ya, sam man bambae oli putum mi, mi Pikinini blong Man, mi go long han blong ol jif pris mo ol tija blong Loa. Olgeta ya bambae oli jajem mi, se bambae mi mas ded,

“Mo bae oli putum Kraes long han blong ol man we oli no laen blong Isrel, blong oli mekem plei long hem, mo oli wipim hem, mo oli nilim hem long kros blong hem i ded: mo long namba tri dei, bambae God i mekem hem i laef bakegen.”¹³

Nambatu, blong gat Tabu Spirit wetem yumi. Josef Smit i tijim se, “Nogat man i save se Jisas Hem i Lod, be tru long Tabu Spirit.”¹⁴ Sevya i promesem ol disaepol blong Hem¹⁵ long Las Sapa¹⁶ long bigfala rum antap,¹⁷ “Taem mi mi aot long yufala, mi no save lego yufala i stap nomo olsem.”¹⁸ Bae oli no stap olgeta wan blong karem ol trutok blong gospel i go fored be bae oli gat presen ia we i Tabu Spirit we i gat evri save blong gaedem olgeta. “Mi givim pis long yufala,” Hem i promes, “mo pis ia we mi givim long yufala i no olsem pis we ol man long wol oli save givim.”¹⁹ Wetem presen we i Tabu Spirit, yumi gat semmak promes ia; se bae “oltaem, [yumi] gat Spirit blong hem i stap wetem [yumi]”²⁰ mo “tru long paoa blong Tabu Spirit, bae [yumi] save trutok long saed blong evri samting.”²¹

Nambatri, Fasin blong stap Olsem wan Disaepol Tru fasin blong stap wan disaepol hem i blong komitim yu fulwan, obei long ol loa blong taem we i no save finis, mo lav blong God, we i kam faswan mo moa impoten. Oltaem tru long wanem yu biliv long hem. Ol hip blong ol man we oli soem respek blong olgeta wetem ol lif blong pamtri, oli presem Hem olsem Mesaea. Hemia i stret huia Hem. Oli kam kolosap long Hem, long ol merikel blong Hem, mo ol tijing blong Hem. Be plante we oli presem Hem oli no mekem blong longtaem. Sam we oli bin singaot, “Hosana,”²² i no longtaem oli tanem olgeta mo singaot, “Nilim hem long kros.”²³

Nambafo, Atonmen blong Jisas Kraes.²⁴ Long ol las dei blong Hem, afta long Pam Sandei, Hem i bin mekem bigfala Atonmen blong Hem, aot long bigfala harem nogud long Getsemane, i go kasem kes blong Hem we i nogat jastis long kot, kasem we oli kilim nogud long kros, mo kasem we oli berem Hem long wan hol blong ston we i no blong Hem. Be i no stop long ples ia. Wetem hae koling blong Hem olsem Ridima blong evri pikinini blong Papa long Heven, tri dei afta, Hem i stanap i kamaot long ston ia, we i laef bakegen long ded,²⁵ olsem we Hem i bin profesae long hem.

?Yumi stap gogohed blong talem tangkyu from Atonmen ia blong Jisas Kraes we yumi no save komperem long eni samting? ?Yumi filim paoa blong hem we i klinim yumi naoia? Hemia i from wanem Jisas Kraes, Hem we i Stat mo En blong fasin blong Sevem Man, i go long Jerusalem, blong sevem yumi evriwan. Ol toktok ia blong Alma i saon impoten long yu: “Sapos yufala i bin gotru long wan jenis blong hat, mo sapos yufala i bin filim blong singim singsing blong lav blong pemaot man, bae mi askem: ?yufala i save filim samting ia naoia?”²⁶ Mi save talem tru se, kwaea ia long Takoradi long Pam Sandei oli bin singsing “singsing blong lav blong pemaot man.”

Long las wik blong ministri blong Hem long wol ia, Jisas Kraes i givim parabol blong ol 10 yangfala gel.²⁷ Hem i stap tij abaot Hemwan we bae i kambak long olgeta we oli redi blong welkamem Hem, i no wetem ol lif blong pamtri long han blong olgeta, be wetem laet blong gospel we i stap insaed long olgeta. Hem i yusum pikja blong ol laet we oli laet mo stap bon, wetem ekstra oel blong mekem faea i laet, blong tokbaot hamas wan i wantem blong laef folem ol wei blong Hem, lavem ol trutok blong Hem, mo serem laet blong Hem.

Yufala i save stori. Ol ten yangfala gel ia oli ripresentem ol memba blong Jos, mo man we bae i mared i ripresentem Jisas Kraes.

Ol ten yangfala gel ia oli tekem ol laet blong olgeta mo “go blong mitim man we i jes mared.”²⁸ Faef oli waes, mo oli redi wetem ol oel long laet blong olgeta mo sam moa oel, mo faef oli no waes, oli karem ol laet we oli no saen mo nogat ekstra oel. Taem oli singaot, “man ya we i jes mared, bambae i kamtru naoia. Yufala i kam mitim hem,”²⁹ mo faef we oli “waes mo oli bin akseptem trutok, mo oli bin tekem Tabu Spirit olsem gaed blong olgeta,”³⁰ oli rere from “king blong olgeta mo i man blong olgeta we i givim loa long olgeta,”³¹ we “glori blong hem bae i stap long olgeta.”³² Ol nara faef oli stap seksek blong traem blong faenem oel. Be i let tumas. Kaekae i bin gohed mo i no wetem olgeta. Taem oli noknok long doa mo plis blong oli go insaed, Lod i bin ansa se, “Mi mi no save yufala.”³³

Bae yumi filim olsem wanem sapos Hem i talem long yumi se, “!Mi mi no save yufala!”

Yumi, olsem ol ten yangfala gel ia, i gat ol laet; ?be yumi gat oel? Mi fraet se i gat sam we oli stap laef wetem smol oel ia nomo, oli stap bisi tumas wetem ol wari blong wol blong oli save stap rere gud. Oel i kam taem yumi biliv mo mekem folem profesi mo toktok blong ol profet we oli laef, speseli Presiden Nelson, ol kaonsela blong Hem, mo Ol Twelef Aposol. Oel i fulumap sol blong yumi taem yumi harem mo filim Tabu Spirit mo mekem folem tabu daereksen blong hem. Oel i kapsaet i kam long hat blong yumi taem ol joes we yumi stap mekem i soem se yumi lavem Lod mo yumi lavem wanem Hem i lavem. Oel i kam taem yumi sakem sin mo stap lukaot hiling long Atonmen blong Jisas Kraes.T

Sapos sam long yufala i stap lukaotem blong fulumap wanem we sam oli singaotem “wan baket lis,” hemia nao taem: fulumap baket blong yu wetem oel we i wota blong Jisas Kraes we i gat laef long hem,³⁴ we i ripresentem laef mo ol tijing blong Hem. Long oposit saed, blong jusum wan ples blong go o blong gat wan naesfala taem bae i neva save mekem sol blong yu i glad fulwan; be blong stap laef folem doktrin blong Jisas Kraes bae i save mekem hemia. Olsem ol eksampol we mi talem fastaem: holem gud profesi mo ol tijing blong ol profet, mekem folem ol kwaet toktok blong Tabu Spirit, kam wan tru disaepol, mo lukaotem hiling paoa blong Atonmen blong Lod. Baket lis ia bae i tekem yu go samples we yu wantem go long hem—gobak long Papa blong yu long Heven.

Long Pam Sandei ia long Takoradi, i bin wan spesel eksperiens tumas blong mi from se mi bin serem wetem wan fetful kongregesen blong ol brata mo sista. Mo i bin olsem long ol kantri mo ol aelan raon long wol. Hat mo sol blong mi, olsem blong yu, i wantem tumas blong singaot: “Hosana long Hae God we I Hae Olgeta.”³⁵

Nomata we yumi no stanap long ol get blong Jerusalem tedei wetem ol lif blong pamtri long han blong yumi, bae taem i kam olsem we oli bin profesae long hem long Revelesen, “wan bigfala hip blong ol man, we no gat man i save kaontem olgeta. Ol man ya oli kamaot long olgeta kala, mo long olgeta kantri, mo long olgeta laen*, mo long olgeta lanwis. {Bae oli] stanap long fran blong bigfala jea blong king, mo long fes blong Smol Sipsip* ya. Olgeta oli werem waet klos, mo oli stap holem lif blong pamtri* long han blong olgeta.”³⁶

Mi livim blesing blong mi wetem yufala olsem wan Aposol blong Jisas Kraes, se bae yufala i traehad blong laef long stret mo gud fasin mo stap long medel blong olgeta wetem ol lif blong pamtri long han blong yufala, mo yufala welkamem wetem glad, Pikinini blong God, bigfala Ridima blong yumi evri wan. Long nem blong Jisas Kraes, amen.

Ol Not

1. Evri fo Gospel—Matiu 21–28; Mak 11–16; Luk 19-24; mo Jon 12–21—oli tokbaot gud ol las dei blong ministri blong Jisas Kraes long wol ia, we oli mekem folem tabu plan blong mekem se ol blesing blong fasin blong sevem man mo kam olsem wan god, i stap blong evri pikinini blong God. Wan wan taem, ol samting we olgeta oli raetem i defdefren be i no insaed long ol tijing blong Sevya mo ol samting we hem i mekem.

2. Luk long Matiu 21:10–11.

3. Jon 12:13.

4. Membasip Rekod blong Wanwan Memba mo Statistik Ripot, i gat 102,592 memba long Gana.

5. Jon 15:12.

6. Evri taem mi toktok wetem ol memba, bae oli talem long mi se, “Elda Rasband, dia Aposol blong mifala, mi lavem yu.” Ol pipol ia oli fulap tumas wetem Spirit mo lav blong God mekem se i isi blong oli serem lav ia.

7. Matiu 21:9.

8. Luk long Russell M. Nelson, “The Peace and Hope of Eastervidio), Apr. 2021, ChurchofJesusChrist.org/media; Aesea 49:16.

9. Doktrin mo Ol Kavenan 122:8. Long Disemba 1838, oli bin putum Profet Josef mo sam nara memba blong ol lida blong ol nara Jos, long kalabus long Libeti Kalabus. Ol kondisen blong olgeta i nogud tumas. Afta long ol manis blong stap long ol nogud situesen ia, hem i raet i go long ol memba long Maj blong 1839, hemia i tekem tu ol prea we hem i bin plis long Lod blong gat sore long situesen blong hem mo “ol sent we oli stap safa.” Hem i serem tu ansa blong Lod long ol prea ia we oli rekodem insaed long Doktrin mo Ol Kavenan 121– 23.

10. Doktrin mo Ol Kavenan 122:9. Ol toktok blong Lod blong leftemap tingting blong Josef Smit long Libeti Kalabus, i karem kamfot mo andastaning long saed blong spirit i kam long hem, se enemi mo ol hadtaem i save mekem yumi kam strong, tijim yumi fasin blong wet longtaem mo save gud olsem wanem blong gat kontrol long yumiwan. Lod i singaotem hem blong “stap long rod blong yu,” we hem i rod blong Lod, blong stanap strong agensem ol tritmen we i stret olsem we “Pikinini blong [God, we] i bin kamdaon mo fesem i bitim evri samting ia. ?Yu yu moa hae long hem?” (Doktrin mo Ol Kavenan 122:8).

11. Doktrin mo Ol Kavenan 122:9. Promes ia se God “bae i stap wetem yu” i wan sua promes blong olgeta we oli biliv strong long fet mo tras blong olgeta long Lod.

12. Luk long Sekaraea 9:9.

13. Matiu 20:18–19. James E. Talmage i raetem long Jesus the Christ: “Hem i … wan tru samting we i sapraes tumas se Olgeta Twelef oli no save andastanem mining blong Hem. … Long olgeta, i gat samsamting we i no wan, i no semmak o oli no save eksplenem ol samting we oli defdefren long ol toktok blong Masta blong olgeta we oli lavem tumas. Oli save Hem olsem Kraes, Pikinini blong God we i stap laef; mo ?olsem wanem oli save fosem mo kilim Wan ia?” ([1916], 502–3).

14. Josef Smit i mekem dikleresen ia long Woman Rilif Sosaeti blong Nauvu long 28 Epril, 1842, olsem we oli raetem long “History of Joseph Smith,” Deseret News, Sept. 5, 1855, 218. Hem i stap tokbaot namba twelef ves blong japta 1 blong 1 Korin, hem i eksplenem nambatri ves, “Nogat man i save talem se Jisas i Lod, be tru long Tabu Spirit,” hem i luklukbak long hem mo i talem olsem, “Nogat man i save save se Jisas Hem i Lod be tru long Tabu Spirit.” (Luk long The First Fifty Years of Relief Society: Key Documents in Latter-day Saint Women’s History [2016], 2.2, churchhistorianspress.org.)

15. Jisas i serem Las Sapa wetem ol disaepol blong Hem (luk long Mak 14:12–18). Olgeta Twelef i gat, Pita, Andru, Jemes, Jon, Matiu, Filip, Tomas, Batolomiu, Jemes (pikinini blong Alfeas), Judas Iskariot, Judas (brata blong Jemes), mo Saemon (luk long Luk 6:13–16).

16. Jisas i introdiusum sakramen wetem ol disaepol blong Hem long Las Sapa (luk long Matiu 26:26–29; Mak 14:22–25; Luk 22:19–20).

17. Oli stap rao from stret dei/naet we Jisas i introdiusum sakramen long “bigfala rum antap” from se i gat ol samting we i no semmak we Matiu, Mak, Luk mo Jon oli stap talem. Matiu, Mak, mo Luk oli talem se Las Sapa i hapen long “fas dei blong Lafet blong Kakae Bred we I No Gat Is long hem,” o Pasova Kaekae (luk long Matiu 26:17; Mak 14:12; Luk 22:1, 7). Be Jon i talem se oli arestem Jisas bifo long Pasova Kaekae (luk long Jon 18:28we i minim se Las Sapa i bin hapen wan dei bifo long Pasova Kaekae. Ol kurikulom blong Jos mo ol man blong stadi blong Lata-dei Sent oli agri se Jisas i mekem Las Sapa wetem ol disaepol blong Hem long bigfala rum antap long naet bifo we oli krusifaem Hem. Ol Kristin man we oli selebretem Tabu Wik oli luksave Tosdei olsem dei blong Las Sapa, Fraedei olsem dei we oli Krusifaem Hem, mo Sandei olsem dei we Hem I Laef Bakegen long Ded—folem kalenda blong Gregori.

18. Jon 14:18.

19. Jon 14:27.

20. Doktrin mo Ol Kavenan 20:77.

21. Moronae 10:5.

22. Baebol diksonari i eksplenem se, hosana i minim “sevem naoia.” Toktok ia oli karemaot long Ol Sam 118:25. “Singsing blong hym ia oli joenem long Lafet blong Ol Tabenakol wetem ol branj blong pamtri we oli saksakem; mekem se fulap man oli yusum toktok ia taem Jisas Kraes i kam insaed wetem viktri long Jerusalem” (Bible Dictionary, “Hosanna”). Luk long Matiu 21:9, 15; Mak 11:9–10; Jon 12:13.

23. Mak 15:14; Luk 23:21.

24. Medel pat blong plan blong sevem man blong Papa long Heven, hem i wan Atonmen we i blong oltaem we bae i mekem sua se i gat laef we i no save finis blong evri pikinini blong God mo fasin blong kam olsem God blong olgeta we oli klin inaf blong kasem blesing ia. Mo Lod i bin talem: “?Bambae mi sendem huia?” Jisas i stanap i kam long fored mo talem: “Mi hemia, sendem mi.” (Aesea 6:8). Presiden Russell M. Nelson i bin tijim: “misin [blong Jisas Kraes] hem i Atonmen. Misin ia i speseli blong Hem. Hem we i bon long wan mama we i save ded mo wan Papa we i no save ded, Hem i wan ia nomo we i save givim laef blong Hem i go daon mo karembak bakegen (luk long Jon 10:14–18). Ol samting blong glori we i kam afta long Atonmen blong Hem oli blong oltaem mo taem we i no save finis. Hem i karemaot harem nogud blong ded mo i mekem sore ia blong gref i blong smol taem nomo (luk long 1 Korin 15:54–55). Responsabiliti blong Hem blong Atonmen, yumi save finis bifo Kriesen mo Foldaon blong wol ia. Hem i no blong givim laef bakegen long ded mo laef we i no save finis long evri man nomo, be i blong mekem i hapen blong oli save fogivim ol sin blong yumi—folem ol kondisen we Hem i stanemap. From hemia, Atonmen blong Hem i openem rod we yumi save joen wetem Hem mo ol famli blong yumi blong taem we i no save finis”(“The Mission and Ministry of Jesus Christ,” Liahona, Apr. 2013, 20).

25. Laef bakegen long ded hem i blong joenem bodi wetem spirit long wan laef we i no save ded, bodi mo spirit i nomo save seperet mo no save kasem ol sik blong wol ia o ded (luk long Alma 11:45; 40:23).

26. Alma 5:26; luk tu long Alma 5:14.

27. Yu save faenem parabol blong ol ten yangfala gel long Matiu 25:1–12; Doktrin mo Ol Kavenan 45:56–59. Ol japta raon long ol japta blong Matiu 25 i soem se Jisas i bin tijim parabol ia long las wik blong Hem, afta we Hem i go insaed long Jerusalem long Matiu 21 mo bifo long Las Sapa mo taem we oli arestem Hem long Matiu 26. Antap long parabol blong ol ten yangfala gel we Hem i givim long las wik ia, Jisas i givim parabol blong figtri (luk long Matiu 21:17–21; 24:32–33), parabol blong tu boe (luk long Matiu 21:28–32), parabol blong ol man nogud we oli stap lukaot long plantesen (luk long Matiu 21:33–46).

28. Matiu 25:1.

29. Matiu 25:6.

30. Doktrin mo Ol Kavenan 45:57.

31. Doktrin mo Ol Kavenan 45:59.

32. Doktrin mo Ol Kavenan 45:59.

33. Matiu 25:12. Long toktok blong Hem antap long Maonten, Lod i talem olgeta we oli ting se oli “bin mekem plante gudgudfala wok,” mo i talem, semmak long stori blong ol ten yangfala gel we oli no waes se, “Neva mi mi save yufala” (luk long Matiu 7:22–23).

34. Semmak olsem we wota i impoten tumas long laef long wol ia, Jisas Kraes mo ol tijing blong Hem (wota we i gat laef) oli impoten tumas blong laef we i no save finis (luk long Guide to the Scriptures, “Living Water,” scriptures.ChurchofJesusChrist.org; luk tu long Aesea 12:3; Jeremaea 2:13; Jon 4:6–15; 7:37; 1 Nifae 11:25; Doktrin mo Ol Kavenan 10:66; 63:23).

35. 3 Nifae 4:32.

36. Revelesen 7:9.