2022 Ripot: Stap Kea long Olgeta we Oli Stap long Nid

Jos ripot blong yia 2022 long fasin blong stap kea long olgeta we oli stap long nid i soem se wok ia i tekem moa long 1 bilian dola we oli spendem, 6.3 milian aoa blong mekem volontia wok, mo 3,692 yumaniterian projek long 190 kantri mo ol eria.

Mane i go help blong fast ofring, yumaniterian help, ol samting we oli serem aot long ol stoahaos blong ol bisop mo ol indastri stoa blong Deseret, mo ol operesen olsem ol fam, ol fasiliti blong prosesem kaekae, Famli Seves Kaonsel, mo ol senta blong wok.

Bigfala donesen blong mane we Jos i bin givim long 2022 i gat, 32 milian dola we i go long World Food Programme (WFP) mo 5 milian dola i go long UNICEF blong helpem ol ples raon long wol long saed blong kaekae, we i blong helpem ol pikinini we oli nidim kaekae.

“Jisas i gat wan sopsop hat long ol pikinini,” Rilif Sosaeti Jeneral Presiden, Camille N. Johnson i bin talem taem oli anaonsem donesen we i go long WFP. “Hem i krae taem i luk oli hanggri. Mo Hem i glad bigwan, iven long ol smosmol efot blong helpem olgeta.”

Ol narafala impoten donesen we i tekem 1 milian dola i go long America Red Cross (antap long moa long, 1 milian yunit blong blad we Ol Lata-dei Sent oli donetem) mo wan narafala 5 milian dola i go long Rotary International blong poli mo ol stik blong ol mama mo ol niufala bebi we oli jes bon.

Mo tu, Jos i stap mekem ol impoten kontribusen long saed blong mane i go blong helpem bigfala namba we i stap go antap, blong ol pipol we safa long ol disasta mo ol raorao we i save kilim man i ded. Hemia i tekem tu, help we i go long ol rifuji long Yukren, olgeta we oli stap laef yet afta long sunami long Tonga, ol viktim blong strong win we i pas long Kentaki, Florida, mo long Saot Afrika; mo ol viktim blong ol raorao blong ol pipol we i hapen long Demokratik Ripablik blong Kongo.

“Lav mo filing blong wantem help i kam bigwan blong luk hemia,” Julia i talem, wan memba blong Jos long Ostria we i helpem ol rifuji long sam kantri blong Is Yurop. “Ol pipol oli lukaot long wanwan long olgeta wetem hat blong olgeta.”

Jos i helpem blong karem lektrisiti i kam long Navajo komuniti long Yuta, mo ol memba oli wok wetem ol Sik (ol kristin man long India) long wan seves projek long Yunaeted Arab Emiret. Ol Lata-dei Sent ol patna wetem NAACP long ol komuniti seves projek blong ol mama long Memfis long Tenesi, YSA, mo olgeta we oli nidim ol helti kaekae long San Fransisko, Kalifonia. Mo ol Masin blong Givim mo Saenem i karem tugeta ol mane blong pem kaekae mo ol narafala aetem blong olgeta we oli stap long nid long ol 28 ples raon long wol.

Ol 6.3 milian aoa blong volontia we oli donetem long 2022 i tekem tu ol seves long ol fam, ol yad blong frut tri, ol faktri blong ol kaekae we oli mekem i go long ol tin, mo ol Deseret indastri sto, ol misin we oli kea long olgeta we oli stap nid mo klinap afta long ol disasta.

Blong ademap long 3,692 yumaniterian projek, 16,285 niufala seves projek we JustServe.org, i oganaesem, i gat fri onlaen volontia potol we i stap long 14 kantri. Tul ia i konektem ol pipol blong givim ol janis blong givim seves we i majem ol intres blong olgeta mo ples we oli stap long hem.

Prisaeding Bishop Gérald Caussé i singaotem JustServe se i “wan divelopmen mo wan wei we i mekem yumi yumi save laef folem ol kavenan” mo “blesem mo mekem ol komuniti blong yumi oli kam strong” (long “The Blessings Will Follow: Benefits of Implementing JustServe” [video], ChurchofJesusChrist.org).

Jos i gohed blong tekem responsabiliti long envaeromen. Stat long 2018, ol hedkwota blong Jos oli bin katemdaon yus blong wota blong 38 milian dram. Moa long 500 miting haos raon long wol, naoia oli gat ol sola panel. Ol indastri blong Deseret oli mekem gud bakegen 73 milian samting we oli save yusum bakegen. Mo Print mo Distribusen Senta blong Jos oli mekem gud bakegen kolosap 4000 tan blong ol pepa, aean, katen mo plastik.