Lukluk Nomo long Jisas Kraes

I Kam long Brata Milton Camargo

Fas Kaonsela long Sandei Skul Jeneral Presidensi

Lod, Jisas Kraes, Hem i ansa long ol problem blong yumi, be yumi mas leftemap ae blong yumi mo lukluk nomo long Hem.

Oltaem papa blong mi bae i stap talem long mi, “Yu no lukluk nomo bigwan long ol problem blong yu we i mekem se yu no save luk ansa.”

Mi testifae se Lod, Jisas Kraes i ansa, iven long ol problem we oli moa nogud. Speseli, Hem i winim, ol fofala problem we evriwan long yumi i stap fesem mo hemia we i nogat wan long yumi i save stretem hemwan.

Fasfala problem hem i ded long saed blong bodi. Yumi save traem blong lego o no wantem save long hem, be yumi no save winim yumiwan. Be, Jisas Kraes i bin winim ded from yumi, mo olsem wan risal, yumi evriwan bae i laef bakegen long ded.¹
Nambatu problem i ol hadtaem, ol had eksperiens, filing blong harem nogud, soa, mo tritmen blong wol we oli no fea. Jisas Kraes i bin winim evri samting ia. Long olgeta we oli traehad blong folem Hem, wan dei Hem “Bambae i ravemaot wota blong ae blong olgeta” mo evri samting i kam oraet bakegen.² Blong smoltaem ia, Hem i save mekem yumi kam strong blong pas tru ol hadtaem blong yumi wetem tras, stap glad mo gat pis.³
Nambatri problem hem i, ded long saed blong spirit we i girap tru long sin. Jisas Kraes i tekem long Hemwan “fasin blong stretem yumi we i givim pis.”⁴ From se tru long atonmen mo sakrifaes blong Hem, yumi save kam fri long ol sin blong yumi sapos yumi gat fet long Sevya, sakem sin wetem tru hat, akseptem ol kavenan we Papa i givim long yumi tru long ol stamba odinens olsem baptaes, mo stap strong kasem en.⁵
Nambafo problem i ol samting we yumi no save gohed long olgeta, ol fasin blong yumi we oli no stret gud evriwan. Jisas Kraes i gat ansa long problem ia tu. Hem i no waepemaot ol mistek mo mekem yumi kam gud bakegen. Hem i mekem “wan bigfala jenis long … ol hat blong yumi, mekem se yumi nomo wantem blong mekem nogud fasin, be blong gohed blong mekem gudfala fasin oltaem.”⁶ Yumi save kam stret evriwan tru long gladhat blong Kraes mo kam olsem Hem wan dei.⁷

Sore tumas, plante taem yumi lukluk nomo bigwan long ol problem blong yumiwan we i mekem se yumi lusum tingting ia blong lukluk nomo long ansa we i Sevya blong yumi, Jisas Kraes. ?Olsem wanem nao yumi save stopem mistek ia? Mi biliv se ol ansa oli stap insaed long ol kavenan we oli invaetem yumi blong mekem wetem Hem mo Papa blong yumi long Heven.

Lukluk Nomo long Jisas Kraes tru ol kavenan

Ol kavenan blong yumi oli help blong putum gud lukluk blong yumi, ol tingting blong yumi, mo ol aksen blong yumi i go long Kraes. Taem yumi “hang strong long ol kavenan [we yumi bin] mekem,” i isi blong yumi luksave “ol samting blong wol” we yumi mas “putum long saed” mo “ol samting blong mekem wan[wol] i kam moa gud” we yumi mas traehad blong lukaotem.⁸

Hemia nao i wanem we ol pipol blong Amon oli bin mekem long Buk blong Momon. Taem oli lanem abaot Jisas Kraes mo stat blong lukluk nomo long Hem, oli luksave se oli mas berem ol tul blong faet blong olgeta mo oli kam man blong ones oltaem mo “oli save olgeta from sapot blong olgeta long God.”⁹

Blong stap kipim ol kavenan, i save lidim yumi blong lukaotem wanem we oli stap invaetem Spirit mo no mekem ol samting we oli ronemaot—from yumi save se sapos yumi save kam klin inaf blong gat kampani blong Tabu Spirit, nao yumi save stap klin inaf blong laef long ples we Papa long Heven mo Pikinini blong Hem, Jisas Kraes i stap long hem.”¹⁰ Hemia i minim se yumi mas jenisim ol toktok blong yumi, yusum ol toktok we oli kaen. Hemia i minim se, mekem ol niufala aksen we i mekem rilesensip blong yumi wetem Lod i kam strong blong i tekem ples blong ol aksen we oli nogud long saed blong spirit, olsem prea evri dei mo stadi skripja, yuwan mo wetem famli blong yu.

Presiden Russell M. Nelson i talem se “wanwan man mo woman we i mekem kavenan long ples blong baptaes mo insaed long ol tempol—mo i kipim olgeta—i kasem moa paoa blong Jisas Kraes.

“Presen blong kipim kavenan wetem God hem i paoa blong heven—paoa we i mekem yumi strong blong winim ol hadtaem blong yumi, ol temtesen, mo mekem hat we i so i kam moa gud bakegen.”¹¹

Blong stap riniu ol kavenan blong yumi long taem blong sakramen evri Sandei i wan gudfala janis blong skelem yumiwan¹² mo mekem laef blong yumi i lukluk nomo long Jisas Kraes. Taem yumi stap tekem sakramen “oltaem yumi tingbaot Hem.”¹³ Toktok ia oltaem i spesel tumas. Hem i givim i kam moa long yumi, paoa blong Sevya i kam insaed long evri pat blong laef blong yumi. Yumi no tingbaot Hem nomo long jos o long moning prea blong yumi o long taem we yumi stap nomo long trabol mo we yumi nidim wan samting.

Yes, samtaem i gat ol samting we oli pulum tingting blong yumi. Yumi fogetem. Yumi lusum wanem we yumi mas lukluk nomo long hem. Be blong riniu ol kavenan blong yumi i stap minim se yumi wantem blong tingbaot Sevya oltaem, se bae yumi traem blong mekem olsem truaot long wik, mo se bae yumi mekem komitmen bakegen mo lukluk nomo bakegen long Hem long tebol blong sakramen nekis wik.

Stap Lukluk Nomo long Jisas Kraes insaed long Ol Hom blong yumi

I klia nomo, se blong stap lukluk nomo long Jisas Kraes i mas moa bitim Sandei, long aktiviti blong jos. Taem Presiden Nelson i tokbaot blong fastaem Kam Folem Mi long 2018, hem i talem, “Hem i taem blong Jos i stap long hom.”¹⁴ Hem i talem se yumi mas “jenisim hom [blong yumi] i kam wan tabu haos blong fet, mo tanem i kam wan senta blong lanem gospel.” Mo sapos yumi mekem, hem i givim fo naesfala promes.¹⁵

Fas promes: “Ol Sabat dei blong yufala bae oli kam wan tru glad.” Bae i kam wan dei we bae yumi kam moa kolosap long Sevya blong yumi. Olsem wan yang woman long Peru i talem, “Dei blong Lod i dei we mi kasem plante long ol ansa blong mi we i kam long Lod.”

Nambatu promes: “Ol pikinini blong yufala bambae oli glad tumas blong lanem samting, mo blong laef folem ol tijing blong Sevya.” From risen ia “yumi tokbaot Kraes, yumi glad long Kraes, yumi prij long saed blong Kraes, … blong mekem se ol pikinini blong yumi oli save gat save long wanem ples oli save lukluk long hem blong kam klin aot long ol sin blong olgeta.”¹⁶

Yumi mekem olsem blong mekem se wan dei, taem pikinini boe blong mitufala i go aot blong wok o blong wokbaot long ol maonten o lukaotem ol animol long dak bus olsem Inos i bin mekem, hem bae i save tingbaot wanem we mifala i bin tijim long hem abaot Kraes mo abaot glad blong stap laef folem gospel. ?Be huia i save? Letem hemia i dei ia we long en, bae hem i filim hanggri long saed blong spirit we bae i tanem hem i go long Jisas Kraes mekem se hem i save harem voes blong Lod we i stap talem long hem, “Inos, mi mi fogivim ol sin blong yu, mo bae mi blesem yu.”¹⁷

Nambatri promes: “Paoa blong enemi insaed long laef blong yufala mo insaed long hom blong yufala bae i kamdaon.” ?From wanem? From se, moa yumi lukluk nomo long Jisas Kraes, moa sin bae i lusum fos blong hem.¹⁸ Mo ol hom blong yumi bae oli fulap long laet blong Sevya, ples ia bae rum blong tudak blong enemi bae i kam smol mo smol evriwan.

Nambafo promes: “Ol jenis insaed long famli blong yufala bae i bigwan mo bae i sapotem yufala.” ?From wanem? From se jenis we Jisas Kraes i mekem i “wan bigfala jenis.”¹⁹ Hem i jenisim ol nogud fasin blong yumi mo bae yumi kam “ol niu man.”²⁰ Sloslo bae yumi kam moa olsem Sevya, fulap wetem klin lav blong Hem long evri pikinini blong God.

?Huia bae i no wantem ol jenis ia blong hapen long laef blong olgeta mo ol famli blong olgeta? ?Wanem nao yumi nid blong mekem blong kasem olgeta? Ansa i, blong jenisim ol hom blong yumi i kam wan tabu haos blong fet mo wan senta blong stap lanem gospel. Mo ?Olsem wanem nao bae yumi mekem hemia? Hem i blong stap lukluk nomo long Papa long Heven mo Jisas Kraes, stap mekem Olgeta i kam senta blong laef blong famli blong yumi, stamba paoa i we i save jenisim hom blong yumi.

?Bae mi save givim tingting se, yu statem wetem fasin blong mekem ol toktok blong Kraes, we oli stap long ol skripja, i kam wan evri dei pat blong laef blong yu? I no gat wan wei we i stret evriwan blong stadi long ol skripja. Yumi save mekem blong 5 o 10 minit evri dei—o moa sapos yu save mekem. Yu save ridim wan japta o sam ves long wan dei. Sam famli oli laekem blong stadi long moning bifo oli go long skul o wok. Ol narawan oli laekem blong rid long naet bifo oli silip. Sam yang kapol oli bin talem se oli stadi olgeta wan long rod blong olgeta blong go long wok mo afta oli serem ol niu tingting wetem wanwan long olgeta tru long teks, mekem se ol komen mo ol storian blong olgeta, oli rekodem.

Kam Folem Mi i stap givim plante aedia blong ol aktiviti mo ol risos we oli save helpem wanwan man o woman mo ol famli blong lanem ol prinsipol blong gospel aot long ol skripja. Ol vidio blong Baebol mo Buk blong Momon oli save stap tu olsem ol impoten tul blong mekem wei blong lanem skripja i kam isi long famli blong yu. Oltaem ol yut mo ol pikinini, oli kasem insperesen we i kam tru long ol stori we oli save tingbaot insaed long ol skripja. Ol stori ia mo ol prinsipol blong gospel we oli tijim, bae oli stap wetem ol pikinini blong yufala, olsem ol fren we oli save trastem, taem oli nidim ol gudfala eksampol blong seves, klin fasin, fasin blong obei, gat longfala tingting, blong gohed strong kasem en, kasem revelesen blong olgetawan, gat bigfala lav, putum tingting i stap daon, mo gat fet long Jisas Kraes. Sam taem bae i pas, fasin blong lafet long ol toktok blong God, oltaem bae i helpem ol pikinini blong yufala blong kam antap moa mo moa kolosap long Sevya. Bae oli kam blong save Hem olsem we oli neva save bifo.

Lod, Jisas Kraes i stap laef tedei. Hem i save stap aktiv, mo stap oltaem long laef blong yumi. Hem i ansa long ol problem blong yumi, be yumi mas leftemap ae blong yumi mo lukluk nomo long Hem. Hem i talem, “Lukluk long mi long evri tingting blong [yufala]; no gat tu tingting, no fraet.”²¹ Taem yumi lukluk nomo long Hem mo Papa blong yumi long Heven, mekem mo kipim ol kavenan wetem Tufala, mo mekem Tufala i kam nambawan samting insaed long hom mo famli blong yumi, bae yumi kam kaen pipol ia we Presiden Nelson i luk: wan pipol we oli save, oli rere mo klin inaf blong welkamem Sevya taem Hem i kam bakegen. Wan pipol we oli jusum Jisas Kraes ova wan wol we I foldaon, wan pipol we oli gat gladhat long fridom blong mekem joes blong olgetawan, blong laef folem ol loa blong Jisas Kraes we oli moa hae mo tabu.”²² Long nem blong Jisas Kraes, amen.