!Wan Voes blong Stap Glad!
Fasin blong stap bildimap ol tempol i ol fas hae samting we ol profet oli lukluk long hem long taem blong Profet Josef Smit.
“Nao, ?wanem nao yumi stap harem long gospel ia we yumi bin kasem? !Wan voes blong stap glad! Wan voes blong sore we i kam long heven; mo wan voes blong trutok we i kamaot long graon; wan voes blong stap glad blong olgeta we oli laef mo olgeta we oli ded; ol gudfala nius blong bigfala glad.”1
Ol brata mo sista, bae i no posibol nomo blong harem ol toktok ia blong Profet Josef Smit mo !no mekem wan bigfala smael!
Nambawan filing we Josef Smit tokbaot, i tru, i soem bigfala glad ia we i fulwan we i stap long bigfala plan blong stap glad we i blong Papa blong yumi long Heven, from we Hem i promesem yumi, se “Man i save stap; mo ol man oli stap, blong oli save gat glad.”2
Yumi singaot from bigfala glad3 taem yumi stap long laef bifo long wol ia, taem yumi harem plan blong God blong stap glad, mo yumi gohed blong singaot from glad long ples ia taem yumi laef folem plan blong Hem. ?Be wanem pat stret i blong kasem glad ia we Profet i stap talemaot? ?Wanem nao i givim paoa long ol dip mo ol filing ia we i kam stret long hat?
Profet Josef i bin stap tij abaot baptaes blong olgeta ded man. Hemia i wan revelesen we i kam wetem glori we oli kasem wetem bigfala glad. Fastaem taem ol memba oli lanem se oli save baptaes blong olgeta we oli lavem we oli ded finis, oli bin glad bigwan. Wilford Woodruff i talem, “!Long stret taem we mi harem hemia, sol blong mi i jiam i glad tumas!”4
Baptaes blong olgeta we yumi lavem we oli ded finis i no wan trutok ia nomo we Lod bae i talemaot mo putumbak. I gat plante long ol narafala presen, o endaomen we God i bin wantem tumas blong givim long ol Pikinini boe mo gel blong Hem.
Ol narafala presen ia, i gat, prishud atoriti, ol kavenan mo ol odinens, mared we i save stap blong oltaem, silim ol pikinini long ol papa mo mama mo insaed long famli blong God, mo long en, blesing blong gobak long hom long ples we God, Papa blong yumi long Heven mo Pikinini blong Hem, Jisas Kraes i stap long hem. Evri blesing ia oli mekem i posibol tru long Atonmen blong Jisas Kraes.
From se God i tingting long hemia blong oli stap long medel blong ol hae mo tabu blesing,5 Hem i givim instraksen blong oli bildimap ol tabu bilding we bae oli stanap long ples ia we bae oli save givim ol naesfala presen ia long ol pikinini blong Hem.6 Ol bilding ia bae oli hom blong Hem long wol ia. Ol bilding ia bae oli stap ol tempol, long ples ia samting we oli silim o fasem long wol ia long nem blong Hem mo tru long toktok blong Hem, mo atoriti blong Hem bae i silim long heven.7
Olsem ol memba blong Jos tedei, i isi long sam long yumi blong tekem ol naesfala trutok ia blong oli nomo kam impoten. Oli bin kam ol nambatu samting blong lukluk long olgeta. Samtaem bae i help bigwan blong luk olgeta tru long ol ae blong olgeta we oli lanem abaot olgeta blong fastaem blong olgeta. Hemia i kam wan pruf long mi tru long wan eksperiens blong mi we i jes pas i no longtaem.
Las yia, jes bifo long dedikesen blong Tempol blong Tokio Japan we oli mekem bakegen, plante long ol ges,we oli no memba, oli bin kam lukluk raon. Long wan semmak tua, bae i gat wan lida blong wan narafala relijin i stap. Mifala i tijim ol ges blong mifala abaot plan blong stap glad blong Papa long Heven, rol blong Jisas Kraes insaed long plan ia, we i blong pemaot ol man, mo doktrin blong famli we bae oli stap tugeta blong taem we i no save finis tru long ol siling odinens.
Long en blong tua, mi invaetem fren blong mifala blong serem ol filing blong hem. Long wei blong soem respek long fasin blong mekem famli ia i kam wan—long pas, mo blong naoia—gudfala man ia i askem wetem tru hat, “So,“?Ol memba blong yufala oli save andastanem gud hamas doktrin ia i impoten?” Hem i ademap, “Hemia bae i wan tijing ia nomo we i save mekem wan wol we i seraot i kam wan.
Hemia i wan lukluk we i fulap long paoa. Man ia i harem no gud nomo tru long ol wokman blong tempol, be tru long impoten doktrin ia blong famli oli kam wan mo oli silim olgeta tugeta i go wetem Papa long Heven mo Jisas Kraes.8
Yumi no sud sapraes, be, taem wan we i no memba i luksave wan nambawan samting we i hapen insaed long tempol. Wanem we i semmak o yumi harem oltaem, samtaem bae oli kam moa gud mo gat bigfala paoa long olgeta we oli harem o filim blong fastaem blong olgeta.
Nomata se i bin gat ol tempol long taem blong bifo wetem Restoresen blong gospel blong Jisas Kraes, fasin blong stap bildimap ol tempol i wan long ol hae wok we ol profet oli lukluk long hem long taem blong Profet Josef Smit. Mo i isi blong andastanem risen blong hem.
Taem we Profet Josef Smit i stap tij abaot baptaes blong olgeta dedman, hem i talemaot wan narafala bigfala trutok. “Letem mi talem stret long yufala se ol prinsipol ia long saed blong olgeta we oli ded mo olgeta we oli laef, bae yumi no save tingting nating long hem, hemia long saed blong fasin blong sevem yumi. From fasin blong sevem olgeta i wan nid mo i wan mas long fasin blong sevem yumi—se olgeta, sapos i no gat yumi, oli no save kam stret gud evriwan.”7
Olsem we yumi save luk nid ia blong gat ol tempol mo wok we oli mekem blong tugeta olgeta we oli stap laef mo olgeta we oli ded, i kam moa klia.
Enemi i stap lisin gud. Paoa blong hem i kam slak tru long ol odinens mo ol kavenan we oli stap mekem insaed long ol tempol, mo hem i traem evri samting we hem i save mekem blong stopem wok. ?From wanem? From hem i save paoa we i kam tru long tabu wok ia. Taem oli dediketem wanwan tempol, paoa blong sevem man blong Jisas Kraes i kam bigwan truaot long wol blong katemdaon ol fos blong enemi we i kam agens mo blong pemaot yumi sapos yumi kam long Hem. Taem we namba blong ol tempol mo olgeta we oli kipim ol kavenan i kam gro, enemi bae i kam moa slak.
Long ol fas dei blong Jos, sam bae oli wari se wetaem bae oli anaonsem wan niu tempol, from bae oli talem, “Taem yumi bildimap wan tempol, bae oli bel blong hel bae oli stat blong ring mo neva bae oli stop.” Be wetem strong paoa long tingting, Brigham Yang i talem, “Mi wantem blong harem oli ring bakegen.”9
Long laef blong wol ia, bae yumi neva ronwe long wo, be yumi save gat paoa ova long enemi. Paoa long tingting ia mo paoa oli kam tru long Jisas Kraes taem yumi mekem mo kipim ol kavenan.
Presiden Russell M. Nelson i bin talem: “Taem i stap kam taem we, olgeta we oli no obei long Lod, bae oli seperetem olgeta long olgeta we oli stap obei. Sef ples blong yumi, i blong gohed blong stap klin inaf blong Hem i tekem yumi insaed long tabu haos blong Hem.”10
Hemia i sam moa long ol blesing, we God i bin promesem long yumi tru long profet blong Hem.
?Yu nidim ol merikel? Profet blong yumi i bin talem: “Mi promesem yufala se Lod bae i tekem ol merikel we Hem i save se yu nidim, oli kam long yu taem yu stap mekem ol sakrifaes blong givim seves mo stap wosip long ol tempol blong Hem.”12
?Yu, yu nidim hiling mo paoa blong mekem man i kam strong tru long Sevya, Jisas Kraes? Presiden Nelson i talem long yumi wetem hop se: “evri samting we oli tijim insaed long tempol … i mekem andastaning blong yumi abaot Jisas Kraes i kam antap moa. Taem yumi stap kipim ol kavenan blong yumi, Hem i kavremap yumi wetem paoa blong Hem we i save hilim mo givim moa strong paoa long yumi. Mo, O yes, bae yumi nidim paoa blong Hem long ol dei we oli stap kam.”15
Long fasfala Pam Sandei taem Jisas Kraes i kam tru wetem bigfala glad insaed long Jerusalem, wan grup blong ol disaepol blong Hem “oli glad tumas mo oli presem God wetem wan laod voes mo stap talem, “Hae God yu blesem King ya we i kam long nem blong yu.”16
I wan gudfala samting se long Pam Sandei blong 1836, oli save dediketem Ketlan Tempol. Long tetaem ia ol disaepol blong Jisas Kraes tu oli stap glad. Long dedikesen prea, Profet Josef Smit i bin talem ol toktok ia blong presem Lod:
“O Lod God we I Gat Olgeta Paoa, harem mifala … mo givim ansa long mifala aot long heven i kam, … we yu yu sidaon long jea blong king, wetem glori, ona, paoa, hae nem, [mo] strong paoa.”
Helpem mifala tru long paoa blong Spirit blong yu, blong mifala i joenem voes blong mifala wetem olgeta we oli saenaot gud raon long bigfala jea blong yu, wetem ol singaot blong pres taem mifala i stap singsing !Hosana long God mo Smol Sipsip!
“Mo letem olgeta ia … ol sent blong yu oli singaot strong wetem glad.”17
Ol brata mo ol sista, tedei long Pam Sandei, letem yumi tu olsem ol disaepol blong Jisas Kraes yumi presem tabu God blong yumi mo glad long ol gudfala samting we Hem i mekem blong yumi. “?Wanem nao yumi stap harem long gospel ia we yumi bin kasem? I tru, “!wan voes blong stap glad!”19
Mi witnes se bae yu i filim moa glad taem yu go insaed long ol tabu haos blong Lod. Mi witnes se bae yu eksperiensem glad we Hem bae i gat long yu, long nem blong Jisas Kraes, amen.