Jisas Kraes I Paoa blong Ol Papa mo Mama
Helpem ol pikinini blong yufala blong oli bildimap fet long Jisas Kraes, lavem gospel blong Hem mo Jos blong Hem mo mekem olgeta oli rere blong mekem ol joes we oli stret mo gud long ful laef blong olgeta.
Long wan taem, wan papa i stap lego haos blong go long wan bisoprik miting. Smol gel blong hem we i gat fo yia i stanap long fored blong hem, i werem klos blong hem blong slip mo holem wan kopi blong Buk blong Momon Stori.
“?From wanem yu mas go long wan miting?” smol gel i askem.
Hem i ansa, “From se mi wan kaonsela long bisoprik,”
“!Be yu papa blong mi!” smol gel i talem.
Hem i nildaon long fored blong gel blong hem. Hem i talem,“Swithat, “Mi save se yu wantem blong mi rid long yu mo helpem yu blong yu silip, be long naet ia mi nid blong helpem bisop.”
Gel blong hem i ansa se, “?Be bisop i no gat papa blong helpem hem i silip?”
Mifala i talem tankgyu we i no gat en long plante memba we oli bin traehad blong stap givim seves evri dei, long Jos Ia blong Jisas Kraes. Sakrifaes blong yufala i tabu tumas.
Be olsem smol gel ia i traem blong andastanem, i gat sam samting we oli tabu semmak—samting we yu no save putum wan nara samting i tekem blong hem—olsem wok blong lukaot wan pikinini blong ol papa mo mama. Hemia i stap soem fasin blong heven.1 Papa blong yumi long Heven, Tabu Papa mo Mama blong yumi, oli glad taem ol papa mo mama long wol ia oli stap tijim mo lukaot gud ol pikinini blong Hem.2
Ol papa mo mama, tangkyu long evri samting we yufala i stap mekem blong lukaot ol pikinini blong yufala. Mo ol pikinini, !tangkyu from evri samting yufala i stap mekem blong resemap ol papa mo mama blong yufala, from olsem evri papa mo mama i save, yumi lanem plante long ol pikinini blong yumi abaot fet, hop, mo jareti olsem we oli lanem long yumi!3
Papa mo Mama Oli Gat Wan Tabu Wok
?Samtaem yu stap tingting long bigfala janis ia we Papa blong yumi long Heven i tekem taem i sendem wan pikinini i kam long wol ia? Oli ol spirit pikinini boe mo gel blong Hem. Oli gat paoa blong mekem samting we i no gat en. Oli gat paoa ia wetem olgeta blong mekem ol gudfala wok, wantem blong givhan, mo serem trutok. Be yet, oli no save helpem olgetawan, i had long olgeta samtaem blong mekem eni samting, be blong krae from help. Memori blong taem blong olgeta wetem God, mo save blong olgeta blong huia nao olgeta mo bae oli save kam olsem huia i blok wetem wan vel. Oli bildimap save blong olgeta blong laef, lav, God, mo plan blong Hem long wanem we oli stap luk long ol pipol raon long olgeta—speseli long ol papa mo mama blong olgeta, we, oli stap traem yet blong lanem ol samting blong olgetawan.
God i bin givim long ol papa mo mama “tabu wok ia blong lukaotem gud pikinini blong olgeta wetem lav mo fasin blong stap stret, blong givim long olgeta ol samting we oli nidim long saed blong spirit mo long saed blong bodi, mo blong tijim olgeta blong … folem ol komanmen blong God.”4
Nao, hemia, i naf blong kipim ol gudfala papa mo mama oli stap wekap long naet.
Mesej blong mi long ol papa mo mama i hemia:
Lod i lavem yufala.
Hem i stap wetem yufala.
Hem i stanap long saed blong yufala.”
Hem i paoa blong yufala blong lidim ol pikinini blong yufala blong mekem ol gud mo stret joes.
Akseptem ol spesel janis ia mo responsabiliti ia wetem strong tingting mo wetem glad. No traem blong givimaot risos ia blong kasem ol blesing blong heven long eni nara man. Insaed long plan blong ol valiu mo prinsipol blong gospel, God bae i jajem yufala blong lidim pikinini blong yufala long evri ditel blong laef evri dei. Helpem ol pikinini blong yufala blong oli bildimap fet long Jisas Kraes, lavem gospel blong Hem mo Jos blong Hem mo mekem olgeta i rere blong mekem ol joes we i stret mo gud long ful laef blong olgeta. Hemia nao, i plan blong God blong ol papa mo mama.
Setan bae i agensem yu, stopem yu, traem blong mekem yu lusum hop.
Be evri pikinini oli bin kasem Laet blong Kraes olsem wan laen we i stret i go long heven. Mo Sevya bae i helpem yufala, lidim yufala, mo leftemap tingting blong yufala. Lukaotem help blong Hem. Askem long Lod!
Semmak olsem Jisas Kraes i paoa blong ol yut, Jisas Kraes i paoa tu blong ol papa mo mama.
Hem i mekem lav i kam bigwanwan
Samtaem yumi tingting se sapos i gat wan narafala man we i moa kwalifae blong lidim mo tijim ol pikinini blong yumi. Be i nomata hamas yufala i filim se yufala i no kwalifae inaf, yu gat wan samting we i kwalifaem yuwan: lav blong yu long pikinini blong yu.
Lav blong wan papa mo mama blong wan pikinini i wan long ol paoa we i strong tumas long laef. Hem i wan long ol samting long wol ia we i save stap blong wan taem we i no save finis.
Maet bae yu filim se rilesensip blong yu wetem pikinini blong yu i no stret tumas. Hemia nao ples we Sevya i kam insaed long hem. Hem i hilim sik, mo Hem i save mekem ol rilesensip oli kam oraet. Hem i mekem bred mo fis i kam plante, mo hem i save mekem lav mo glad i kam plante insaed long hom blong yufala.
Lav blong yufala long ol pikinini blong yufala i krietem wan ples blong stap tijim trutok mo bildimap fet. Mekem hom blong yufala i kam wan haos blong prea, lanem samting, mo fet, wan haos blong ol eksperiens we i givim glad, wan ples blong stap, wan haos blong God.5 Mo “prea long Papa wetem evri paoa blong hat, blong [yufala] i save fulap wetem lav blong [Hem], we hem i bin [givim] long … olgeta we oli folem Pikinini blong hem, Jisas Kraes.”6
Hem I Givim Ona long Ol Smol mo Simpol Traehad
Wan narafala paoa we yu gat, olsem wan papa mo mama, i janis blong stap olsem wan we i save mekem jenis long evri samting we i stap gohed evri dei. Ol fren, ol tija, mo ol man blong media oli kam mo oli go. Be yu save stap olsem wan blong mekem jenis, we i stap oltaem long laef blong pikinini blong yu.
Ol traehad blong yufala i maet luk smol long ol laod voes blong wol we ol pikinini blong yufala oli stap harem. Samtaem, yufala i save filim se yufala i no stap mekem fulap samting i hapen. Be tingbaot se “tru long ol smol wei, Lod i save mekem plante bigfala samting i hapen.”7 Wan haos naet, wan storian long saed blong gospel, o wan gud eksampol, maet bae i no save jenisim laef blong pikinini blong yu long wan taem, be bae i kam gud, olsem wan drop nomo blong ren we i mekem wan plan blong i gro kwiktaem. Be ol smol mo simpol samting we i stap hapen evri taem, dei afta dei, i fidim pikinini blong yufala i moa gud yet bitim we wan bigfala wota i hapen long wanwan taem.8
Hemia nao i wei blong Lod. Hem i toktok long yu mo long pikinini blong yu wetem wan smol, kwaet voes, i no wan voes blong tanda.9 Hem i bin hilim Neman tru long simpol aksen blong wasem hem plante taem, be i no tru long “sam bigfala samting”.10 Ol pikinini blong Isrel oli glad blong kaekae ol pijin long wael ples, be wanem i holemtaet olgeta blong stap laef i smol mo simpol merikel blong mana—bred blong olgeta evri dei.11
Ol brata mo sista, bred blong evri dei oli rere gud long hem mo kakae long hom. Blong mekem fet mo testemoni blong wan i kam strong, i hapen long ol nomol wei nomo blong mekem samting. Mekem wan smol pis, long wan smol mo simpol taem, blong oltaem folem evri dei blong laef.12
Evri dei i gat wan taem blong tij. Evri toktok mo aksen i save stap wan gaed buk blong stap mekem ol joes.13
Maet bae yu no save luksave ol frut blong hadwok blong yu. Be yu no givap. “Bae evri samting i mas kam blong hapen long stret taem blong olgeta,” Lod i bin talem. “Taswe, yufala i no taed blong mekem gud samting, from we yufala i stap putum fandesen blong wan bigfala wok.”14 ?Wanem wok i moa bigwan bitim wok blong helpem ol gudfala pikinini blong God oli lanem huia olgeta mo bildimap fet blong olgeta long Jisas Kraes, Gospel blong Hem, mo Jos blong Hem? Jisas Kraes bae i blesem mo mekem wok we yu stap traehad long hem oltaem i kam tru.
Hem i givim revelesen
Nara wei we i gat paoa we God i sapotem ol papa mo mama hem i tru long presen blong revelesen blong yuwan. God i wantem tumas blong givim Spirit blong Hem blong lidim ol papa mo mama.
Taem yu prea mo lisin long Spirit ia, bae Hem i save givim woning long yu abaot ol denja we oli haed i stap.15 Bae Hem i soem long yu ol presen we ol pikinini blong yu oli gat, ol samting we oli strong long hem, ol wari blong olgeta we i haed i stap.16 God bae i helpem yu luk ol pikinini blong yu olsem we Hem i luk olgeta—lukluk i go insaed long hat blong olgeta.17
Wetem help blong God, bae yu save lanem blong save ol pikinini blong yu long wan klin fasin we i olsem blong heven. Mi stap invaetem yu blong akseptem invitesen blong God blong lidim famli blong yu tru long revelesen we i save kam long yuwan. Lukaotem blong Hem i lidim yu long ol prea blong yu.18
Wan Bigfala Jenis
Maet help we i moa impoten we Jisas Kraes i givim long ol papa mo mama hem i “bigfala jenis” blong hat.19 Hemia i wan merikel we yumi evriwan i nidim.
Blong wan taem, tingting long situesen ia: Yu stap long jos, stap lisin long toktok abaot famli. Spika ia i tokbaot wan hom we i stret gud mo iven wan famli we i stret gud moa. Hasban mo waef i neva gat wan raorao long toktok. Ol pikinini oli stop blong ridim skripja nomo taem hem i taem blong mekem homwok. Mo miusik blong “Love One Another”20 i stap plei biaen. Bifo we spika i stat blong tokbaot pat ia we evriwan oli glad blong joen blong klinim batrum, yu stap tingting finis, “Famli blong mi, i no nid nomo.”
!Ol dia brata mo sista, rilaks! !Evriwan long kongregesen oli stap tingting long semmak samting! Wanem i tru i we, evri papa mo mama oli wari se oli no stap olsem wan gud papa o mama.
Laki nomo se i gat wan tabu risos blong help blong ol papa mo mama: Hem i Jisas Kraes. Hem i stamba blong bigfala jenis blong hat.
Taem yu openem hat blong yu long Sevya mo ol tijing blong hem, bae Hem i soem long yu ol samting we yu no strong long hem. Sapos yu trastem Jisas Kraes wetem wan hat we i stap daon, bae Hem i mekem ol samting we i no strong i kam strong.20 Hem i God blong ol merikel.
?Hemia i minim se yu mo famli blong yu i kam stret evriwan? No. Be bae yufala i kam gud moa. Tru long glad hat blong Sevya, smosmol, bae yufala i developem ol fasin we ol papa mo mama oli nidim: lav blong God mo ol pikinini blong Hem, fasin blong gat longfala tingting, no stap selfis, fet long Kraes, mo strong paoa long tingting blong mekem ol joes we i stret mo gud.
Jisas Kraes I Givim Sapot tru long Jos blong Hem
Wok blong yumi blong bildimap fet long Jisas Kraes i stap long hom, i lukluk moa long wanwan man. Mo Jos i sapotem. Antap long ol tabu skripja we oli givim mo ol toktok blong ol profet, Jos blong Sevya i givim plante risos blong helpem ol papa, mama mo pikinini blong mekem ol joes we i stret mo gud:
-
Blong Ol Yut Oli Kam Strong: Wan Gaed Buk blong Mekem Ol Joes i no givim wan lis long yu blong ol samting blong mekem o blong no mekem. Hem i tijim ol trutok we i no save finis we i help blong mekem ol joes we i folem laef mo ol tijing blong Jisas Kraes. Rid wetem ol pikinini blong yu. Letem olgeta oli tokbaot wanem oli ridim. Helpem olgeta blong gat ol tabu trutok ia we i no save finis blong i lidim ol joes blong olgeta.21
-
Ol konfrens blong BYS oli ol nara gudfala risos. Mi hop se evri yut bae oli kam. Mi invaetem ol yang singgel adalt blong joenem ol konfrens ia olsem ol tija mo ol kaonsela. Mi invaetem ol papa mo mama blong mekem faea blong spirit we ol yut blong olgeta oli karem i kam long ol BYS konfrens, i kam moa strong.
-
Ol pikinini mo yut long Jos Ia blong Jisas Kraes blong ol Lata-Dei Sent oli gat ol tija, ol advaesa, mo ol kaonsela. Plante taem yu go insaed long laef blong wan man o woman long wan impoten taem, i blong bildimap mo sapotem fet mo testemoni. Sam long yufala oli ol singgel adalt. Sam long yufala i neva gat pikinini blong olgetawan. Gudfala seves blong yu long ol pikinini blong God i tabu long ol ae blong God.22
Neva Givap long Ol Merikel
Ol dia fren blong mi, ol dia brata mo sista blong mi, blong stap bildimap fet long wan pikinini, i olsem helpem wan flaoa i gro. Yu no save pulum strong long stamba blong hem blong mekem i gro. Yu no save fosem ol yang lif o flaoa blong open eli. Mo yu no save stap nomo olsem mo ting se flaoa bae i gro mo i open gud long nomol wei blong hem.
Wanem yu save mo mas mekem blong jeneresen we i stap kam antap i blong givim wan rij graon blong givim kakae, wetem wota we i ron i kam long heven. Karemaot ol rabis kras mo eni samting we i blokem bigfala laet blong san. Krietem ol gudfala ples blong samting i save gro long hem. Fasin blong stap wet longtaem mo letem jeneresen ia we i stap kam antap i mekem ol joes folem insperesen mo letem God i wokem ol merikel blong Hem. Risal bae i naes tumas mo gud tumas mo glad blong hem bae i bitim hemia we yu wan nomo yu save mekem.
Insaed long plan blong Papa long Heven, famli rilesensip i blong wan laef we i no save finis. Hemia nao from wanem, olsem wan papa mo mama, yu neva givap, iven sapos yu no hapi long olsem wanem sam samting i bin hapen long pas.
Wetem Jisas Kraes, Masta blong hilim man mo Sevya, i save gat wan niu stat oltaem; i gat hop oltaem.
Jisas Kraes i paoa blong ol famli.
Jisas Kraes i paoa blong yut.
Jisas Kraes i paoa blong ol papa mo mama.
Long hemia, mi testifae long nem blong Jisas Kraes, amen.