Hoofstuk 34
Helaman en die 2,000 Jong Krygers
Die volk van Ammon het God belowe dat hulle nooit weer sou veg nie. Hulle het naby die Nefiete gewoon en die Nefiete het hulle beskerm.
Toe die vyande van die volk van Ammon die Nefiete aangeval het, wou die volk van Ammon hulle belofte verbreek en die Nefiete help veg.
Helaman en die ander Nefitiese leiers wou nie hê dat die volk van Ammon hulle belofte aan God verbreek nie.
Die jong seuns van die volk van Ammon het nie hierdie belofte gemaak nie. Hulle wou die Nefitiese leër help veg vir vryheid.
Twee duisend van hierdie jong manne het gekies om hulle land te verdedig. Hulle het Helaman gevra om hulle leier te wees.
Hierdie jong manne was getrou, dapper en sterk. Hulle was ook eerlik en betroubaar en hulle het die gebooie van God onderhou.
Helaman het sy 2,000 jong krygers in die stryd gelei. Hy het hulle sy seuns genoem en hulle het hom hulle vader genoem.
Alhoewel die seuns van Helaman nog nooit geveg het nie, was hulle nie bang nie. Hulle moeders het hulle geleer om geloof in God te hê en om te weet dat Hy hulle sou help.
Helaman en sy leër het verskeie veldslae teen die Lamaniete geveg. Hierdie jong manne het ál Helaman se opdragte gehoorsaam.
Hulle het dapper geveg en het gehelp om die vyand te verdryf. Na die stryd het Helaman gevind dat elkeen van sy seuns gewond was, maar nie een van hulle is gedood nie.
Dit was ʼn wonderwerk. Helaman was baie bly. Hy het geweet dat hierdie jong manne as gevolg van hulle groot geloof in God beskerm is.