Hoofstuk 50
Die JEREDIETE Verlaat Babel
Jered en sy broer was regverdige mans wat in ʼn stad genaamd Babel gebly het. Hulle het honderde jare voor die Nefiete gelewe.
Meeste van die mense in Babel was goddeloos. Hulle het ʼn toring gebou om te probeer om die hemel te bereik. Die Here het kwaad geraak en hul taal verander.
Jered het sy broer gevra om te bid en die Here te vra om nie hul familie en vriende se taal te verander nie.
Jered se broer het gebid, en die Here het sy gebed beantwoord. Jered, sy broer, en hul familie en vriende kon mekaar nog steeds verstaan.
Die Here het vir Jered se broer gesê om sy familie en vriende te neem en die land te verlaat. Hulle het hulle diere en alle soorte sade saam met hulle geneem.
Die Here het gesê Hy sal die Jerediete na ʼn beloofde land lei.
Die Jerediete het voëls en visse gevang om saam met hulle te neem.
Hulle het swerms heuningbye saamgeneem.
Die Jerediete het na die wildernis gereis. Die Here het met hulle vanuit ʼn wolk gepraat en vir hulle gesê watter rigting om te gaan.
Die Here het gesê dat die mense wat in die beloofde land woon, God moet dien, of hulle sal vernietig word.
Toe die Jerediete by die strand aangekom het, het hulle hul tente opgeslaan. Hulle het vir vier jaar langs die see gebly.