Hoofstuk 41
Die Tekens van Christus se Geboorte
Nefi, die seun van Helaman, het die heilige rekords en skrifture aan sy oudste seun, Nefi gegee.
Die Nefiete het groot tekens en wonderwerke gesien, soos die profete gesê het sal plaasvind voor Jesus Christus se geboorte.
Maar sommige Nefiete het gesê dat die tyd vir Jesus se geboorte reeds verby is. Hulle het diegene wat steeds Samuel die Lamaniet se profesieë geglo het, bespot.
Die mense wat in Jesus Christus en die profete geglo het, was bedroef om te dink dat iets dalk die profesieë mag verhoed om vervul te word.
Die mense het getrou uitgesien na ʼn nag sonder donkerte, wat die teken was dat Jesus Christus gebore sou word.
Diegene wat nie in Jesus Christus geglo het nie, het ʼn dag gekies waarop die gelowiges doodgemaak sou word, indien die teken nie plaasgevind het nie.
Nefi was bedroef as gevolg van die goddeloosheid van diegene wat nie in die Verlosser geglo het nie.
Nefi het heeldag lank gebid vir die mense wat doodgemaak sou word.
Die Here het Nefi vertroos en vir hom gesê dat dit nie daardie nag donker sou word nie. Jesus sou die volgende dag in Betlehem gebore word.
Daardie aand het die son gesak, maar dit het nie donker geword nie. Die teken van Jesus Christus se geboorte het aangebreek. Die mense was baie verbaas.
Diegene wat beplan het om die gelowiges dood te maak, het op die grond neergeval en het gelyk asof hulle dood was.
Hulle was bang vanweë hulle goddeloosheid. Nou het hulle geweet dat die Verlosser gebore sou word en dat die profete reg was.
Dit het heelnag lig gebly. Toe die son die volgende oggend opkom, het die mense geweet dat Jesus Christus daardie dag gebore sou word. Die profesieë is vervul.
ʼn Nuwe ster het in die hemelruim verskyn, net soos die profete gesê het dit sou.
Satan het steeds probeer om mense te kry om nie die tekens te glo wat hulle gesien het nie, maar die meeste mense het wel geglo.
Nefi en ander Kerkleiers het al diegene gedoop wat geglo het en bekeer het.
Daar was blye tydings in die land as gevolg van die woorde van die profete wat vervul is. Jesus Christus is gebore.