Hoofstuk 43
Jesus Christus Verskyn aan die Nefiete
Baie Nefiete het by die tempel in Oorvloed bymekaargekom. Hulle was verstom oor die groot veranderinge in die land.
Die mense was besig om te praat oor Jesus Christus en die teken van sy dood.
Terwyl hulle besig was om te praat, het hulle ʼn sagte stem vanuit die hemel gehoor. Dit het hulle harte laat brand.
Hulle het eers nie die stem verstaan nie, maar die derde keer wat dit gepraat het, het hulle dit verstaan.
Dit was Hemelse Vader se stem. Dit het Jesus Christus bekendgestel en vir die mense gesê om na Hom te luister.
Jesus Christus het uit die hemel neergedaal en tussen die mense gestaan. Hulle was te bang om te praat omdat hulle nie verstaan het wat besig was om te gebeur nie. Hulle het gedink dat Jesus ʼn engel was.
Hy het vir hulle gesê dat Hy Jesus Christus is, die een wat die profete gesê het sou kom.
Jesus het vir die mense gesê om die merke in sy sy en in sy hande en voete te voel, waar Hy aan die kruis vasgespyker was.
Jesus wou gehad het dat die mense moes weet dat Hy hulle God is en dat Hy vir hulle sondes gesterf het.
Een vir een het die mense die merke in Jesus se sy, hande en voete gevoel. Die mense het geweet dat Hy die Verlosser is.
Die mense het Jesus geprys en aan sy voete neergeval en Hom aanbid.
Jesus het Nefi en 11 ander mans na Hom toe geroep. Hy het hulle priesterskapmag gegee en hulle die regte manier geleer om te doop.
Hy het vir die Nefiete gesê om in Hom te glo, te bekeer en om die gebooie te onderhou. As hulle dit nie doen nie, kon hulle nie in sy koninkryk ingaan nie.
Hy het die Nefiete geleer hoe om tot Hemelse Vader te bid. Hy het hulle ook van die vas geleer en gesê dat hulle vergewe sou word indien hulle mekaar vergewe het.
Nadat Jesus die mense baie dinge geleer het, het Hy vir hulle gesê om huistoe te gaan en oor die dinge wat Hy gesê het te dink en daaroor te bid.
Die Nefiete het begin huil. Hulle wou nie gehad het dat Jesus hulle tóé al moes verlaat nie.
Jesus was lief vir die Nefiete. Hy het hulle gevra om die mense wat siek of pyn gehad het na Hom toe te bring, sodat Hy hulle kon genees.
Jesus het hierdie mense genees. Almal het voor Hom gekniel en Hom aanbid.