Moihuú

Vakai Fakalūkufuá

Ko e moihū ki he ʻOtuá ko hono foaki kiate Ia ʻetau ʻofá, ʻapasiá, ngāue tokoní, mo e mateakí. Naʻe fekau ʻe he ʻEikí kia Mōsese, “Hū ki he ʻOtuá, he ko ia pē te ke tauhí” (Mōsese 1:15). Kuó Ne ʻosi fekauʻi foki, “Ke ke ʻofa ki he ʻEiki ko ho ʻOtuá ʻaki ho lotó kotoa mo ho mālohí, ʻatamaí, mo e iví kotoa; pea ke ke tauhi kiate ia ʻi he huafa ʻo Sīsū Kalaisí” (Tokāteline mo e Ngaahi Fuakava 59:5). ʻOku ʻikai ngata pē ʻi hono fakahaaʻi ʻe he moihuú ʻa ʻetau ʻofa ki he ʻOtuá mo ʻetau tukupā kiate Iá, ka ʻokú ne ʻomi ʻa e mālohi ke tauhi ʻEne ngaahi fekaú. ʻOku tau tupulaki ʻi he ʻiló mo e faivelengá ʻo fakafou ʻi he moihuú. Kapau te tau fokotuʻu ha taha pe meʻa ʻo māʻolunga ange ʻi he ʻofa ki he ʻOtuá, ʻoku tau hū ki he meʻa pe tokotaha ko iá. ʻOku ui ʻeni ko e tauhi tamapuá (vakai ʻEkesōtosi 20:3–6).

Ko e lotú ko ha founga ia ʻe taha ke hū ai ki he Tamai Hēvaní. Naʻe akonaki ʻa ʻAlamā ki hono foha ko Hilamaní, “Tangi ki he ʻOtuá ke maʻu ho tauhi kotoa pē; ʻio, fai hoʻo ngaahi ngāue kotoa pē ki he ʻEikí, pea ʻilonga ha potu te ke ʻalu ki ai ke fai ia ʻi he ʻEikí; ʻio, tuku ke hanga atu hoʻo ngaahi fakakaukau kotoa pē ki he ʻEikí; ʻio, tuku ke fai ki he ʻEikí ʻa e ʻofa ʻa ho lotó ʻo taʻengata.” (ʻAlamā 37:36).

Ko ha founga ʻe taha ke hū ai ki he Tamai Hēvaní, ko e kau atu ʻi he feohi mo e niʻihi ʻoku hū kiate Iá. ʻOku fakahā ʻe he Tohi ʻa Molomoná, “Naʻe fekau ki he fānau ʻa e ʻOtuá ke nau faʻa fakataha, mo kau fakataha ʻi he ʻaukai pea mo e lotu lahi koeʻuhi ko e lelei ʻa e laumālie ʻo kinautolu ʻa ia naʻe ʻikai ʻiloʻi ʻa e ʻOtuá” (ʻAlamā 6:6) Naʻe fekauʻi ʻe he ʻEikí ʻi ha fakahā kimuí ni mai: “Ko e meʻa ke tauhi ai koe ke maʻa ange mei māmani, ke ke ʻalu ki he fale ʻo e lotú pea ʻohake ai hoʻo ngaahi ouau toputapu ʻi hoku ʻaho tapú; he ko e moʻoni ko e ʻaho ʻeni kuo tuʻutuʻuni kiate koe ke ke mālōlō ai mei hoʻo ngaahi ngāué, pea fai hoʻo ngaahi huú ki he Fungani Māʻolungá” (Tokāteline mo e Ngaahi Fuakava 59:9–10).

Ko e kau ko ia ʻi he ngaahi ouau ʻo e lakanga fakataulaʻeikí ko ha konga foki ia ʻo e moihuú. ʻI heʻetau maʻu ʻi he loto-ʻapasia ʻa e sākalamēnití mo ʻalu ki he temipalé, ʻoku tau manatua mo hū ai ki heʻetau Tamai Hēvaní mo fakahaaʻi ʻetau houngaʻia ʻi Hono ʻAlo ko Sīsū Kalaisí.

‘O tanaki atu ki he ha-ki-tuʻa e moihuú, ʻoku totonu ke tau maʻu ha tōʻonga moihū ʻi ha feituʻu pē te tau ʻalu ki ai pea ʻi he meʻa kotoa pē ʻoku tau fakahokó. Naʻe akoʻi ʻe ʻAlamā ʻa e tefitoʻi moʻoni ko ʻení ki ha falukunga kakai naʻe taʻofi ke nau hū ki honau feituʻu ʻo e moihuú. Naʻá ne tokoniʻi kinautolu ke nau ʻiloʻi ʻoku ʻikai fakangatangata ʻa e moihū moʻoní ki ha ʻaho pē ʻe taha ʻo e uiké (vakai ʻAlamā 32:11). ʻI he lea ʻa ʻAlamā ki he falukunga kakai tatau peé, naʻe poupouʻi ʻe hono takaua ko ʻAmulekí kinautolu ke nau “hū ki he ʻOtuá, ʻi ha potu pē te mou ʻi ai, ʻi he laumālie pea ʻi he moʻoni” (ʻAlamā 34:38).

Lekooti e Ngaahi Ongo ʻOkú ke Maʻú