Maʻá e Tokotaha Tokoní

ʻI he ʻaho ʻo e fakatahá:

• Text pe telefoni ki he kau mēmipa kotoa ʻo e kulupú, kapau ʻokú ke maʻu honau fakamatala ki he fetuʻutakí. ʻEke pe ʻoku nau ō mai ki he fakatahá. Fakaafeʻi kinautolu ke nau muʻomuʻa mai ʻaki ha miniti ʻe 10 ke nau fakamoʻoni ʻi he taliuí.

• Teuteu ʻa e ngaahi nāunau ʻo e fakatahá:

  • ʻOmi ha tatau ʻo e tohi ngāue ko ʻení mo e kiʻi tohi Ko Hoku Fakavaʻé: Ngaahi Tefitoʻi Moʻoní, Ngaahi Pōtoʻi Ngāué, Ngaahi Ngāue Angamahení maʻá e mēmipa takitaha ʻo e kulupú.

  • ʻOmi ha tatau kehe ʻe nima ʻo e Ko Hoku Hala ki he Moʻui Fakafalala pē Kiate Kitá naʻa ʻi ai ha kau mēmipa naʻe ʻikai maʻu haʻane tatau.

  • Teuteu ha founga ke huluʻi ai ʻa e ngaahi vitioó, kapau ʻe lava.

  • ʻIkai ha ʻū tohi pe ngaahi vitiō? ʻE lava ke ke maʻu ia ʻi he ʻinitanetí ʻi he srs.lds.org.

table diagram

Miniti ʻe 30 kimuʻa ʻi he fakatahá:

• Fokotuʻutuʻu takatakai ʻa e ʻū seá ʻi ha tēpile koeʻuhí ke nofo vāofi ʻa e tokotaha kotoa pē.

  • ʻOku ʻikai ke tuʻu ki ʻolunga ʻa e tokotaha tokoní ʻi he lolotonga ʻo e fakatahá pea ʻoku ʻikai ke nofo ʻi he ʻuluʻi tēpilé. ʻOku ʻikai totonu ke hoko ʻa e tokotaha tokoní ko e fakamaʻunga ia ʻo e tokangá ka ʻoku totonu ke ne tokoniʻi ʻa e kau mēmipá ke nau tokanga pē kiate kinautolu.

Miniti ʻe 10 kimuʻa ʻi he fakatahá:

• Talitali fiefia ʻa e mēmipa ʻo e kulupú ʻi heʻenau aʻu maí. Ako honau ngaahi hingoá.

• ʻAve takai ha laʻi pepa pea kole ki he kau mēmipa ʻo e kulupú ke hiki ai honau hingoa kakató, uōtí pe koló, mo e ʻaho fāʻeleʻí (ʻahó mo e māhiná, kae ʻikai ko e taʻú).

  • Hili e fakataha ʻa e kulupú, ʻalu ki he srs.lds.org/report pea muimui ʻi he ngaahi fakahinohino ki hono lesisita kotoa ʻo e kau mēmipa e kulupú.

  • ʻAi ha lisi fetuʻutaki ʻi he ʻosi ʻa e ʻuluaki fakatahá ke tufa ʻi he kulupú.

• Vahe ha tokotaha tauhi taimi ke ne fakapapauʻi ʻoku tauhi taimi ʻa e kulupú. Kole ange ke ne seti ʻa e taimí ʻo fakatatau mo e fakahinohino ʻi he tohí.

  • Hangē ko ʻení, te ke fakatokangaʻi ha ngaahi fakahinohino ʻoku pehē “Taimí: Seti ʻa e uasí ke miniti ʻe 60 ʻa e konga ki he Akó.” ʻE seti ʻe he tokotaha tauhi taimí ʻa e taimí ʻi ha telefoni, uasi, pe ha toe meʻa ʻoku maʻu pea mo fakahā ki he kulupú ʻa e taimi ʻoku ʻosi aí. Pea ʻe fili leva ʻa e kulupú pe te nau kamata ʻa e konga hono hokó pe hoko atu ʻenau fealēleaʻakí ʻi ha toe ngaahi miniti siʻi.

ʻI he taimi kamatá:

• Tala ange: “ʻOku talitali lelei kimoutolu ki he kulupu moʻui fakafalala pē kiate kita ko ʻení.”

• Kole ki he kakaí ke tāmateʻi ʻenau telefoní mo e ngaahi meʻangāue kehé.

• Talaange ʻeni:

  • “Ko ha kulupu moʻui fakafalala pē kiate kita ʻeni ʻoku ui ‘Ko Hono Kamataʻi mo Fakatupulaki ʻEku Pisinisí.’ ʻOku mou ʻi heni kotoa ke kamataʻi pe fakatupulaki ha pisinisi?

  • “‘Oku ‘ikai tali ‘e he Pa’anga Tokoni Fakaako Tu’uma’ú ha nō ki ha pisinisi. Ka ‘i he ‘osi ‘a e ngaahi fakataha ko ‘ení, te mou mateuteu lelei ange ke fai ha ngaahi fili fekau’aki mo e nō mei he ngaahi kautaha nō fakalotofonuá.

  • “Te tau fakataha tuʻo 12. Ko e fakataha kotoa pē ʻe meimei houa ʻe ua. Te tau toe fakamoleki foki ha houa ʻe taha pe ua ʻi he ʻaho takitaha ʻi hono tauhi ʻetau ngaahi tukupā ko ia te ne tokoniʻi ʻetau pisinisí. Te mou lava ʻo fai ʻa e tukupā ʻo e taimi ko ʻení?”

• Fai ha fua lotu (mo e himi, kapau ʻe fie maʻu).

• Talaange ʻa e meʻa ko ʻení:

  • “Ko e taimi kotoa pē ʻoku tau fakataha ai, te tau kamata ʻaki ha tefito mei he kiʻi tohi ʻoku ui Ko Hoku Fakavaʻé: Ngaahi Tefitoʻi Moʻoní, Ngaahi Pōtoʻi Ngāué, Ngaahi Ngāue Angamahení. ʻOku tokoni ʻeni ke tau ako mo moʻui ʻaki ʻa e ngaahi tefitoʻi moʻoní, ngaahi pōtoʻi ngāué, mo e ngaahi ʻulungaanga angamaheni ʻoku fakatau ki he moʻui fakafalala fakalaumālie mo fakatuʻasino pē kiate kitá.

  • “ʻE ʻoatu ʻe he Laumālie Māʻoniʻoní ha ngaahi fakakaukau ʻi he uiké kotoa. Hiki hoʻo ngaahi fakakaukaú pea fai ia. ʻE tāpukaiʻi koe ʻe he ʻEikí ʻi hoʻo fai iá, mo fakahoko ʻEne ngaahi maná ʻi hoʻo pisinisí.”

• Seti ʻa e uasí ke miniti ʻe 20 ʻa e Ko Hoku Fakavaʻé.

• Lau ʻa e tohi fakafeʻiloaki mei he kau Palesitenisī ʻUluakí ʻi he peesi 2 ʻo e Ko Hoku Fakavaʻé. Fakakakato leva ʻa e tefitoʻi moʻoni 1 ʻi he kiʻi tohi ko iá pea toki foki mai ki he tohi ngāue ko ʻení.

My Foundation cover