Talateu
ʻE lava nai ʻe he kulupú ni ʻo tokoniʻi au ke u kamata pe langa ha pisinisi?
ʻOku ʻikai faingofua ke kamata pe langa ha pisinisi, ka ʻe tokoni atu ʻa hoʻo kulupu moʻui fakafalala pē kiate kitá ke ke ako mo fai ha ngaahi fili fakapisinisi fakapotopoto. Te ke tukupā ʻi hoʻomou ngaahi fakataha fakakulupú ke fai ha ngaahi ngāue pau. ʻE ʻoatu ʻe he kulupú kiate koe ha ngaahi fakakaukau foʻou pea mo fakalotolahiʻi koe. ʻOku ʻikai ko e taumuʻa ʻa e kulupú ni ke tokoniʻi pē koe ʻi hoʻo pisinisí; ka ke toe tokoniʻi foki koe ke ke talangofua lahi ange mo tui ki he ʻEikí pea mo maʻu ʻa ʻEne ngaahi tāpuaki ʻo e moʻui fakafalala pē kiate koe, fakatuʻasino mo fakalaumālie kuo talaʻofá.
Ko e hā ʻa e kulupu moʻui fakafalala pē kiate kitá?
ʻOku kehe ʻa e kulupu moʻui fakafalala pē kiate kitá ia mei he ngaahi kalasi, lēsoni, mo e ngaahi ako (workshop) ʻa e Siasí. ʻOku ʻikai ke ʻi ai ha kau faiako, kau taki, pe kau faifakahinohino ia ai. ʻOku feakoʻaki fakataha mo fepoupuaki pea mo fefakalotolahiʻaki pē ʻa e kau mēmipá. ʻOku tau takitaha haʻisia pē ki heʻetau ngaahi tukupaá pea ʻoku tau fealēleaʻaki fakataha ke fakaleleiʻi ʻa e ngaahi palopalemá.
Ko e hā ʻa e meʻa ʻoku fai ʻe he kau mēmipa ʻi he kulupú?
ʻOku tukupā ʻa e kau mēmipa ʻo e kulupú ʻi he ngaahi fakatahá ke ngāue. ʻOku ʻikai ngata pē ʻi heʻetau akó ka ʻoku tau toe fai ʻa e ngaahi meʻa te ne ngaohi kitautolu ke tau moʻui fakafalala pē kiate kitautolú. ʻOku tau fai ha ngaahi tukupā, fetokoniʻaki ke tauhi ʻa e ngaahi tukupaá, mo lipooti ʻetau fakalakalaká. Koeʻuhí ʻoku ngāue ʻa e kulupú ʻo hangē ha fakataha alēleá, ʻoku mahuʻinga leva ke ʻalu taimi totonu maʻu pē ki he ngaahi fakatahá. ʻOmi maʻu pē ʻa e tohi ngāue ko ʻení mo e ongo kiʻi tohi Ko Hoku Fakavaʻé: Ngaahi Tefitoʻi Moʻoní, Ngaahi Pōtoʻi Ngāué, Ngaahi Ngāue Angamahení mo e Ko Hoku Hala ki he Moʻui Fakafalala Pē Kiate Kitá. ʻOku totonu ke meimei houa ʻe ua ʻa e fakataha fakakulupú takitaha. Ko hono ngāueʻi ʻetau ngaahi tukupaá ʻe meimei houa ʻe taha pe ua ʻi he ʻaho kotoa pē.
Ko e hā ʻa e meʻa ʻoku fai ʻe he tokotaha tokoní (facilitator)?
ʻOku ʻikai ko ha kau mataotao ʻi he pisinisí pe ko e faiakó ʻa e kau tokoní. ʻOku ʻikai ke nau taki pe akoʻi ʻa e kulupú. ʻOku nau tokoni pē ke muimui pau ʻa e kulupú ki he ngaahi fakamatalá hangē tofu pē ko hono tohí. ʻOku meimei ke tokoniʻi ʻe ha mataotao ʻo e moʻui fakafalala pē kiate kitá ʻa e ngaahi fakataha fakakulupú; neongo ia, ʻe lava ke vahe ʻa e kau mēmipa ʻo e kulupú ke nau tokoni ʻi ha ʻosi ha ngaahi uike, ʻo ka fie maʻu. Koʻuhí ke ke ʻilo lahi angé, vakai ki he Leader Guide mo e ngaahi vitiō ʻi he srs.lds.org.
Tohi Fakamoʻoni Kuo Kakato
ʻE feʻunga ʻa e kau mēmipa ʻo e kulupú ʻoku ō ki he ngaahi fakatahá mo tauhi ʻenau ngaahi tukupaá ke maʻu ha tohi fakamoʻoni ʻe ua mei he LDS Business College: ko ha tohi fakamoʻoni ʻi he fokotuʻu pisinisí (vakai, peesi 197–98 ki he ngaahi fie maʻú) pea mo ha tohi fakamoʻoni moʻui fakafalala pē kiate kita (vakai, peesi 29 ʻi he Ko Hoku Fakavaʻé).