Ngaahi Maʻuʻanga Tokoní
Ko e Pisinisi ʻi ha Vaʻakau
Fili ha taha pea fakatātaaʻi ʻa e meʻa ko ʻení.
TŪKUNGÁ: ʻOku tangutu ha kakai loto foʻi ʻe toko tolu ʻi ha sea pea ʻoku haʻu ha tokotaha ko e fika faá ia ke tangutu hifo.
TOKOTAHA FAKAMATALÁ: Ko e hā leva ʻa e pisinisi lelei? ʻOku fekauʻaki ia mo hono tokoniʻi ʻa e kakaí ke fakaleleiʻi ʻenau ngaahi palopalemá. ʻOku fekauʻaki ia mo hono ʻiloʻi ʻo e kau fakataú. Kapau ʻoku ʻi ai ha taha ʻoku ʻi ai haʻane fie maʻu peá ke tokoni ke fakaleleiʻi ia, te nau TOTONGI koe. Pea ko ha meʻa sai ia! Ka ʻoku founga fēfē hao ʻilo ʻa e meʻa ʻoku fie maʻu ʻe he kau fakataú?
TOKOTAHA HONO 4: Mālō e lelei. ʻEi, ʻoku ou feinga ke kamataʻi ha pisinisi. Kuo fakalele ʻe hamou taha ha pisinisi?
KAKAI KEHÉ: “ʻIo.” “ʻIo.” “ʻIo.”
TOKOTAHA HONO 4: ʻOi, ko ha meʻa lelei ia. Ko e hā ʻa e pisinisi ko iá?
TOKOTAHA 1: Sai, ʻoku ou saiʻia ʻaupito ʻi he fanga peká, pea ʻoku ou fakatau ʻa e peká ʻi ha vaʻakau. Ke ʻilo, hangē ha kiʻi pusiakí. Pau ke ke ʻofa ai. Fafanga ʻaki e langó.
TOKOTAHA HONO 4: ʻIo?
TOKOTAHA 1: ʻIo.
TOKOTAHA HONO 4: ʻOku fēfē?
TOKOTAHA 1: ʻIkai ke fuʻu sai. Hangē ʻoku ʻikai saiʻia ai ʻa e kakaí. Pea ʻoku nau uʻu he taimi ʻe niʻihi.
TOKOTAHA HONO 4: Ka ʻoku fēfē koe?
TOKOTAHA HONO 2: ʻIo, ʻoku ou sai ʻaupito au he feimeʻatokoní.
TOKOTAHA HONO 4: Feimeʻatokoní?
TOKOTAHA HONO 2: Ko ia. Pea ʻoku ou maʻu ʻa e founga ko ʻeni ka ʻai ʻa e patá he vaʻakaú.
TOKOTAHA HONO 4: ʻI ha vaʻakau?
TOKOTAHA HONO 2: ʻIo. ʻOku takaiʻi kei momoko ia ʻi ha laʻi tōtila. ʻOku ou fuʻu sai ʻaupito au ai.
TOKOTAHA HONO 4: Ka ʻoku fēfē?
TOKOTAHA HONO 2: Kuó u ʻosi fakatau ha niʻihi … ko hono moʻoní, ko e taha pē.
TOKOTAHA HONO 4: Fēfē koe?
TOKOTAHA HONO 3: ʻOi, naʻá ku siofi ʻa e kakai ʻi he halá ʻi he taimi kehekehe ʻo e ʻahó. Pea naʻá ku fai kiate kinautolu ha ngaahi fehuʻi. Pea naʻáku siofi ʻa e meʻa ʻoku nau fakataú mo e taimí pea mo hono lahí. Pea naʻá ku talanoa mo e kakai ʻoku nau fakatau atú fekauʻaki mo e meʻa ʻoku fakataú mo ia ʻoku ʻikaí. Naʻá ku saiʻia ʻi he pisinisi meʻakaí, he ʻoku faingofua ke kamataʻi, pea ʻoku ou saiʻia ʻi he meʻakaí mo e kakaí.
TOKOTAHA HONO 4: Moʻoni? Naʻá ke fai kotoa ia?
TOKOTAHA HONO 3: ʻIo, ʻi ha ngaahi ʻaho lahi. Naʻe mālie moʻoni.
TOKOTAHA HONO 4: ʻOku ou tui ki ai! Ko e hā ʻa e meʻa naʻá ke ʻiloʻi aí?
TOKOTAHA HONO 3: Siʻi, naʻá ku ʻohovale au. Naʻá ku ʻilo ʻoku fie maʻu ʻe he kakaí ʻi he hoʻataá mo e efiafí ha meʻa melie mo faingofua pea ʻikai fuʻu mamafa mo fakafiefia—ko ha kiʻi meʻa ke nau fiefia ai pe vahevahe mo ha kaungāmeʻa pe mo honau fāmilí. Naʻá ku ʻahiʻahiʻi leva ha fanga kiʻi meʻa mo talanoa ki ha kakai tokolahi ange.
TOKOTAHA HONO 4: Pea naʻá ke ʻiloʻi ia?
TOKOTAHA HONO 3: ʻIo. Naʻá ku ʻiloʻi kapau te ke ʻai ha foʻi siaine ʻi ha kiʻi vaʻakau pea vali ʻaki ia ha meʻi sokoleti, ʻa e sokoleti totonú, pea tānaki atu ki ai ʻa e kiʻi teuteu ko ʻení, ʻoku saiʻia ai ʻa e kakaí—tautautefito kapau ʻokú ke ʻi he feituʻu totonú ʻi he taimi totonu.
TOKOTAHA HONO 4: Moʻoni?
TOKOTAHA HONO 3: ʻIo, naʻá ku fakatau atu mo hoku kaungāmeʻá ha 400 ʻi he ongo ʻuluaki ʻahó ʻo maʻu ai ha paʻanga lahi. Naʻe feau moʻoni ʻa e fie maʻú: faingofua mo tupu lelei.
TOKOTAHA HONO 4: Tamani! Ko e hā leva e hoko atú?
TOKOTAHA HONO 3: ʻOsi foʻi au.
TOKOTAHA HONO 4: Foʻi?
TOKOTAHA HONO 3: ʻIo, ko ha ngāue lahi ia ʻi he ʻaho ʻoku ʻafú.
TOKOTAHA HONO 4: Mmmm. ʻE sai pē kapau te u kiʻi ʻahiʻahiʻi hoʻo fakakaukaú?
TOKOTAHA HONO 3: Sai pē ia. Meʻa kotoa ia ʻaʻau. Fai mo kamata.
TOKOTAHA FAKAMATALÁ: Vakai. Fai ha ngaahi fehuʻi.
-
ʻIloʻi ʻa e kau fakataú.
-
Ngāue mālohi, maʻu ha paʻanga.
-
Ifoʻia he siainé!
Foki ki he peesi 18
Ko Hono Fili ʻo e Pisinisi Totonú
Taufetongi ʻi hono lau ʻa e ongo palakalafi ko ʻení.
ʻE founga fēfē hao fili ʻa e pisinisi totonu kiate koé? Pe, kapau ʻoku ʻi ai hao pisinisi, te ke ʻiloʻi fēfē ko e pisinisi totonu ia kia koé? Ko ha fehuʻi mahuʻinga ʻeni ʻe fā ʻe tokoni atu ke ke fai ʻa e fili lelei tahá.
(1) Ko e hā ʻoku fie fakatau ʻe he kakaí … (2) te u lava ʻo maʻú, (3) ko ha pisinisi ia ʻe faingofua ke u lava ʻo kamata, pea (4) te ne fakalahi ʻeku paʻanga hū maí mo tokoni ke u moʻui fakafalala lahi ange kiate au?
Pe ko hono fakalea ʻe tahá, ʻoku fie maʻu ke fai ʻeku filí ʻo makatuʻunga ʻi he (1) kau fakataú mo e koloá, (2) ʻi hoku pōtoʻi ngāué, ngaahi manakó, mo e taukeí, (3) ʻātakaí, kau ai ʻa e feʻauʻauhí, kautaha ʻoku nau ʻomaí pea mo e paʻangá, pea mo e (4) tuʻunga ʻe ala aʻu ki ai ʻa e paʻanga hū maí mo e tupú.
Ko ha sīpinga ʻeni. Naʻe ngāue ʻa Malia ʻi ha ngaahi taʻu ʻi ha ngaahi falekai mo ha ngaahi hōtele. Ka naʻe fetōʻaki ʻene paʻanga hū maí. Pea naʻe ʻikai ke ne maʻu ha paʻanga feʻunga ke tokoniʻi hono fāmilí mo feau ʻenau ngaahi fie maʻú. Ko ia, makehe mei heʻene hoko ko e tokotaha ngāue ʻi he falekaí, naʻe fakakaukau ke kamata haʻane pisinisi pē ʻaʻana. Ka ko e hā?
Kamata ʻaki ʻa e fehuʻi ʻuluakí, naʻe manatuʻi ʻe Malia naʻe fanongo ki ha lāunga ʻa ha kau kuki ʻi ha ngaahi falekai kehekehe ʻi he taimi naʻe ʻikai ke nau maʻu ai ha fuaʻimoa kei foʻou mo leleí. Naʻá ne ʻilo ko ha palopalema ia. Hokó, naʻe tauhi ʻe heʻene tamaí ha fanga moa pea naʻá ne ʻilo ha ngaahi fakapulipuli mei ai fekauʻaki mo e fakatupu ʻo e fuaʻimoá. Naʻá ne toe ʻiloʻi foki ko ha ngāue lahi! Tolú, naʻe ʻikai ke fuʻu ʻilo lahi ki he feʻauhí, ka naʻá ne ʻiloʻi ʻe lava ke kamata siʻisiʻi ʻi ha feituʻu ʻataʻatā mo ofi ki hono ʻapí ke ʻoua naʻa fuʻu lahi ʻa e fakamolé. Faá, pea naʻá ne ʻiloʻi ʻa e ngaahi falekai naʻa nau fakatau ʻa e fuaʻimoá, pea naʻá ne fikaʻi leva ʻe maʻu haʻane tupu lelei kapau ʻe lahi ʻa e fuaʻi moa te ne fakatau atú.
ʻOkú ke lava ʻo fakatokangaʻi ʻa e founga ʻo e tokoniʻi ʻe he fehuʻí ni ʻe fā, ʻa ʻene fakakaukau ke fili ʻa e pisinisi totonú?
Ka, naʻe fie maʻu ʻe Malia ke tali ha ngaahi fehuʻi lahi ange. Naʻe fie maʻu ke ʻilo lahi ange ki he kakai te nau fakatau mei aí, ʻa e feʻauʻauhí, kautaha hū koloa maí, hono fakamahuʻingaʻí, pea mo e ngaahi pōtoʻi ngāue ke fakalele ʻa e pisinisí. Ko e fē ʻe ala ʻalu ki ai ke maʻu ha tokoní? ʻE founga fēfē haʻane fakahoko ʻa e sitepu hono ua ke fai ʻa ʻene filí?
Ko e hā te ke fai ke maʻu ʻa e fakamatala ʻokú ke fie maʻu ke fai ʻaki ʻa e ngaahi fili ʻoku leleí?
Foki ki he peesi 18
Ako ki ha Ngaahi Pisinisi Tatau Mo Ia
Koeʻuhí ke tauhi hoʻo tukupaá, ʻaʻahi mo siofi ha ngaahi pisinisi tatau mo ia te ke ala kamataʻí (ngaahi pisinisi te mou feʻauʻauhí). Ko e hā ʻa e meʻa lele lelei ʻiate kinautolú? Ko e hā ʻa e meʻa ʻoku ʻikai ngāue leleí? Talanoa ki he kakai ʻoku nau fakalele ʻa e ngaahi pisinisí. Koeʻuhí ke taʻofi ʻa e ongoʻi feʻauʻauhí, talanoa mo e kakai mavahe mei ho feituʻú.
Ngāue ʻaki ʻa e ngaahi fehuʻi ʻi laló. Tānaki atu mo ha ngaahi fehuʻi kehe. ʻAi ke hoko ko ha pōtalanoa pē. Fakapapauʻi ke ke fakahaaʻi hoʻo houngaʻiá.
Fai ʻeni ʻi he ʻaho kotoa ʻo e uike ko ʻení (tuku kehe pē ʻa e Sāpaté). Lekooti ʻenau talí mo e ngaahi meʻa ʻokú ke akó ʻi hoʻo kiʻi tohí.
ʻIlo fekauʻaki mo ha Kau Fakatau Pehē
Talanoa mo ha kakai ko e kau fakatau ʻi ha pisinisi hangē ko ia ʻe lava ke ke kamataʻí. Siofi kinautolu mo ako ʻa e meʻa kotoa te ke lavá.
Ngāue ʻaki ʻa e ngaahi fehuʻi ʻi laló. Tānaki atu ha ngaahi fehuʻi kehe. ʻAi ke hoko ko ha pōtalanoa. Fakapapauʻi ke fakahaaʻi hoʻo houngaʻiá.
Fai ʻeni ʻi he ʻaho kotoa ʻo e uike ko ʻení (tuku kehe Sāpaté). Lekooti ʻenau ngaahi talí mo e ngaahi meʻa ʻokú ke akó ʻi hoʻo kiʻi tohí.