Ngaahi Maʻuʻanga Tokoní
ʻOua ʻe Tāmateʻi ʻa e Fanga Moá: Konga I
Fili ha taha pea fakatātaaʻi ʻa e meʻa ko ʻení.
FEITUʻÚ: ʻOku ʻi ai ha fanga moa ʻa Malia pea ʻoku lava ʻo tauhi hono fāmilí ʻaki ʻene fakatau ʻa e fuaʻimoá ki he ngaahi falekoloa mo e ngaahi falekai fakalotofonuá. ʻOku haʻu ʻa e tuongaʻane ʻo Malia ko Mateó ke ʻeva mai.
MATEO: Malia!
MALIA: Mateo, mālō e lelei. ‘Okú ke fēfē hake?
MATEO: ʻOku lelei pē ʻa e meʻa kotoa. Masiʻi! Sio ki he lahi ʻa e fuaʻimoá. ʻOku lele lelei hoʻo pisinisí!
MALIA: ʻIo, pea ʻoku ou houngaʻia ai. Kuó u fakaʻaongaʻi ʻa e ngaahi meʻa naʻá ku ako ʻi heʻeku kulupu ngāue-pē kiate aú. Kuó u tauhi ʻeku ngaahi tukupaá kotoa pea ʻoku ngāue! ʻOku tāpuakiʻi moʻoni kimautolu ʻe he ʻEikí. ʻOku ʻaonga ʻa e ngaahi ngāue mālohí kotoa.
MATEO: Meʻa fakaʻofoʻofa ia! Mahalo ʻoku totonu ke u kau mo au ki ha kulupu. Kae kehe, ʻoku ou maʻu mo ha ongoongo lelei foki! Naʻá ku maʻu ha fale nofo totongi ki hoku fāmili! Kuo fāifai pea mau lava ʻo maʻu ha vai ʻoku lele—mo ha matapā sioʻata! Ka ʻoku ʻikai ke u maʻu ha paʻanga feʻunga ʻi he taimí ni. ʻOku ou fie maʻu ʻa e 1000 ka mau hiki ki ai. ʻOku ʻikai ke u loto ke mole ʻa e fale ko ʻeni, Malia. Ko e sai taha ia kiate kimautolú. Te ke fie tokoni mai?
MALIA: Mateo, ʻoku ou fie tokoni atu, pea mahalo naʻa lava pē ke u ʻoatu ʻa e 1000, ka kuo pau ke u fakatau atu ʻeku fanga moá.
Foki ki he peesi 66
ʻOua ʻe Tāmateʻi ʻa e Fanga Moá: Konga II
Taufetongi ʻi hono lau ʻa e ngaahi palakalafi ko ʻení.
Fakakaukau ʻo pehē ʻokú ke ngāue ʻi ha hōtele. Te ke lava ʻo toʻo ha paʻanga mei he hōtelé ʻi ha taimi pē te ke fie maʻu aí? ʻE lava nai ho tuongaʻané ʻo toʻo ha paʻanga ʻi ha taimi pē ʻokú ne fie maʻu ai? Mahalo te nau tukupōpula ia!
Fakakaukau leva he taimí ni ki hoʻo pisinisí. ʻOku fie maʻu hoʻo pisinisí ke tupulaki mo moʻui ka ke lava ʻo tauhi ʻa e fekau ke ke moʻui fakafalala pē kiate koé. Ko hoʻo pisinisí ko ha meʻangāue ia ʻe lava ai ʻe he ʻEikí ke tāpuakiʻi koé. Kapau ʻoku ola lelei, te ke lava leva ke tāpuakiʻi mo ha niʻihi tokolahi kehe. Te ke maluʻi fēfeeʻi leva hoʻo pisinisí ke lava ʻo ola lelei.? ʻOku totonu ke ke toʻo ha paʻanga ʻi ha faʻahinga taimi pē ki he ngaahi fie maʻu fakafoʻituituí? Fēfē ho tuongaʻané pe kaungāʻapí?
Ko e kií ʻeni: ko koe mo hoʻo pisinisí ʻokú mo kehekehe! Kuo pau ke tauhi ʻi ha feituʻu kehekehe ʻa e paʻanga ʻo e pisnisí mei hoʻo paʻanga fakafoʻituituí. Te ke lava ʻo fakaʻaongaʻi ha puha kehekehe pe ʻakauni pangikē kehekehe. ʻE toe fie maʻu foki ke ke tauhi ha lekooti kehekehe ʻo e paʻanga ʻo e pisnisí mo hoʻo paʻanga fakafoʻituituí: feituʻu kehekehe mo e lekooti kehekehe.
Kae kehe, ʻe founga fēfē leva hao toʻo ha paʻanga mei hoʻo pisinisí ki ho fāmilí?
Sai, ʻe founga fēfē ʻeni kapau naʻá ke ngāue ki ha taha kehe? ʻE totongiʻi koe ʻe he taha pe pisinisi ko iá ʻaki ha vahe, ko ia? Pe, kapau ko ha taha tuʻuaki koloa koe, ʻe ʻoatu ʻe he pisinisí hao komisoni. ʻE hoko leva hoʻo vahé pe komisoní ko hoʻo paʻanga hū mai—pea te ke totongi vahehongofulu leva ʻi he paʻanga hū mai ko ʻení. Te ke lava leva ke ngāue ʻaki ʻa e toengá ki hoʻo ngaahi fie maʻu fakafoʻituituí, hangē ko e meʻakaí mo e valá—pea aʻu ai pē ki he tokoniʻi ho tuongaʻané.
ʻI hoʻo hoko ko e tokotaha ʻoku ʻaʻana ʻa e pisinisí, ʻoku totonu ke ʻi ai hao vahe—hangē ko ʻení, ke ʻi ai ha paʻanga pau ʻi he uike kotoa pē. Kapau ʻoku ʻikai ke ʻi ai ha paʻanga feʻunga ʻi hoʻo pisinisí ke ʻi ai hao vahe tukupau, te ke kei lava pē ʻo totongi hao komisoni—ko ha pēseti ʻo e fakataú. ʻE tatau ai pē, ka ʻe hoko ʻa e vahé pe komisoní ko hoʻo paʻanga hū mai fakafoʻituitui. ʻOkú ke totongi vahehongofulu ʻi he paʻanga hū mai ko ʻení. Peá ke toki fakaʻaongaʻi leva ʻa e toengá ki he meʻakaí, totongi falé, faitoʻó, mo e fakahū paʻangá.
ʻE hanga ʻe he sitepu faingofua ko ʻení—ʻa e fakamavaheʻi ʻo e paʻanga hoʻo pisinisí mei hoʻo paʻanga fakatāutahá—ʻo maluʻi koe mo hoʻo pisinisí. ʻE lava hoʻo pisinisí ʻo tupulaki mo moʻui. Pea te ke ʻiloʻi ai ʻa e paʻanga mei hoʻo ʻakauni fakatāutahá te ke lava ʻo fakaʻaongaʻi mo vahevahé.
Foki ki he peesi 67
ʻOua ʻe Tāmateʻi ʻa e Fanga Moá: Konga III
Fili ha taha pea fakatātaaʻi ʻa e meʻa ko ʻení.
MALIA: Mateo, kapau te u fakatau atu kotoa ʻeku fanga moá, ʻokú ke ʻiloʻi ʻa e meʻa ʻe hoko ki heʻeku pisinisí, ʻoku mahino? He ʻikai ke u maʻu ha fuaʻimoa ke u fakatau atu. Pea ʻe mate leva ʻeku pisinisí. Pea te u fafangaʻi fēfē leva hoku fāmilí? Kātaki fakamolemole. ʻOfa pē ʻe mahino kiate koe, he ʻikai ke u lava ʻo toʻo noa pē ha paʻanga mei he pisinisí ʻi ha taimi pē ʻoku ou fie maʻu ai. ʻOku ou totongiʻi au ʻi ha vahe tuʻu pau. Ko e toenga ʻo e paʻangá ke ʻai ke kei lele ʻa e pisinisí mo tokoni ke tupulaki, ka mau lava ʻo moʻui fakafalala pē kiate kimautolu. ʻOku mau kamata ke moʻui fakafalala pē kiate kimautolu koeʻuhí ke mau lava ʻo tāpuekina ha niʻihi kehe.
MATEO: ʻOku mahino.
MALIA: Neongo ia, te u lava ʻo maʻu atu ha 200 mei heʻeku paʻanga tauhi fakatātahá, kapau ʻe tokoni ia.
MATEO: Ko hono moʻoní, ʻe tokoni lahi ʻaupito. Malia, mālō.
MALIA: ʻOku ou fiefia ai. ʻOku ou fiefia ʻi he lava ke u tokoni atú.
Foki ki he peesi 67
Ko Hoʻo Pisinisi Vaí: Kī ki he Talí
Foki ki he peesi 70