Ngaahi Maʻuʻanga Tokoní
Ha Loli lahi Angé?
Taufetongi ʻi hono lau ʻo e palakalafi ko ʻení.
Naʻe fokotuʻu ʻe ha ongo tangata haʻana pisinisi. Naʻá na langa ha kiʻi palepale ʻi ha veʻehala femoʻuekina. Naʻá na fakatau ha loli ʻo lele ai ki ha ngoue ʻa ha taha faama, ʻo na fakatau ha uta meleni ʻi he paʻanga ʻe taha ki he foʻi meleni.
Naʻá na lele mai ʻi he lolí ki hona kiʻi palepale he veʻe halá, ʻo fakatau atu ai ʻena melení ʻi he paʻanga ʻe taha ki he foʻi meleni.
Naʻá na toe foki ki he faamá ʻo fakatau mai ha uta meleni ʻe taha ʻi he paʻanga ʻe taha ki he foʻi meleni.
Naʻá na ʻomai ia ki he veʻe halá, ʻo toe fakatau atu ʻi he paʻanga ʻe taha ki he foʻi meleni.
ʻI heʻena toe foki ki he fāmá ke ʻomi ha toe uta ʻe tahá, naʻe talaange ʻe he tokotaha ʻiate kinaua, “ʻOku ʻikai ke ta maʻu ha paʻanga fēfē ʻi he pisinisi ko ʻení, ko ia?”
Tali ange ʻe hono hoa ngāué, “ʻIkai, ʻoku ʻikai.”
“ʻOkú ke pehē ʻokú ta fie maʻu ha loli lahi ange?” (Dallin H. Oaks, “Focus and Priorities,” Ensign, May 2001, 82)
Foki ki he peesi 34
ʻOua Naʻa Tāpuni Hoʻo Pisinisí
Fili ha taha pea fakatātaaʻi ʻa e meʻa ko ʻení.
SOSEFINA: Kuleisi, Ko e hā ʻa e meʻa ʻoku hokó? ʻOku ʻikai ke ke mata fiefia.
KULEISI: ʻOku ʻikai ke u ʻilo pe ko e hā te u faí. Naʻe toki kamata pe ke maʻu ha paʻanga ʻi heʻeku pisinisí pea hoko ʻa e meʻa ko ʻení.
PĪSILA: Ko e hā ʻa e meʻa naʻe hokó?
KULEISI: Naʻe hiki ʻe he tangata naʻá ku fakatau vai mei aí ʻene mahuʻingá ʻaneafi, pea kuo pau leva ke u tāpuni ʻeku pisinisí he taimí ni.
PĪSILA: ʻMeʻapango ia, Kuleisi. Ko e hā nai hono ʻuhingá?
KULEISI: Ko hono moʻoní, te u toki lava pē ʻo fakatau ʻa e vaí ʻi he 10 ki he foʻi hina. He ʻikai ke fakatau ʻe he kakaí ia ka laka hake ai. Ka naʻá ku faʻa fakatau mai ʻeku ngaahi foʻi hiná ʻi he 7.
KULEISI: Ka kuo hiki ʻeni ʻe he kautahá ia ʻene mahuʻingá ke 10. Pea ʻoku ʻikai leva ha tupu ia! Ko e hā ʻa e meʻa te u faí?
PĪSILA: Kuó ke ʻosi talanoa mo e kautaha ʻokú ke fakatau mei aí? ʻOkú ke kau ʻi heʻene kau fakatau mahuʻinga tahá.
KULEISI: Teʻeki ai. ʻOku ʻikai ke u tui te u lava. Ko ʻene mahuʻingá ko e meʻa pē ia ʻaʻana.
PĪSILA: ʻIkai. ʻOku fie maʻu ke ke talanoa mo ia. ʻOku fie maʻu ke ne ʻiloʻi ʻe mole haʻane taha fakatau mahuʻinga. Te ne lava pē ʻo liliu ʻene mahuʻingá ke kei maʻu koe. ʻOku totonu ke ke talanoa maʻu pē mo e ngaahi kautaha koloá ke maʻu ʻa e mahuʻinga maʻamaʻa taha ʻe lavá.
KULEISI: Sai. Te u feinga.
SOSEFINA: Pea ʻoku totonu foki ke ʻi ai mo ha ngaahi feituʻu kehe. ʻOku ou ʻiloʻi ha taha te ne fakatau atu kiate koe ʻa e vaí ʻi he 5. Fakamolemole ʻi he ʻikai ke u ʻuluaki tala atu kiate koé. Naʻe ʻikai ke u ʻiloʻi naʻá ke totongi ʻa e 7—ka ko ʻeni ia kuo 10! Te u fakafeʻiloaki koe ki he tokotaha ko iá.
KULEISI: Ko hoʻo moʻoni? ʻOiauē, Sosefina. Mālō. ʻIo, kātaki ʻo fakafeʻiloaki kimaua. ʻE Pīsila, ʻoku ou fakamālō atu. Te u feinga lahi ange ke maʻu ha mahuʻinga maʻamaʻa taha ki he vai ʻoku ou fakatau maí.
Foki ki he peesi 36