Ngaahi Maʻuʻanga Tokoní
Pasikala pe Fanga Moa?
Fili ha taha pea fakatātaaʻi ʻa e meʻa ko ʻení.
NĀOMI: Malia, mālō e lelei. ʻOku fēfē hoʻo pisinisí? ʻOku tupu?
MALIA: ʻOku sai pē, ka ʻoku ou fuʻu helaʻia. ʻOku ou ngāue mālohi, ka ʻoku ʻikai ke u maʻu ha paʻanga feʻunga.
NĀOMI: Ngali ʻokú ke fie maʻu ha koloa ʻoku fakatauá.
MALIA: Ko e hā ʻa e koloa ʻoku fakatauá?
NĀOMI: Ko e ngaahi meʻa ʻokú ne tokoniʻi hoʻo pisinisí ke maʻu ha paʻanga lahi ange.
MALIA: ʻOi, ʻoku ou saiʻia he meʻa ko iá. ʻOku ou fie maʻu ha koloa ʻoku fakataua lahi ange … kae ʻoleva angé; ʻoku ʻikai ke u tui ʻoku ou maʻu ia he taimí ni.
NĀOMI: ʻOku ʻi ai. Ko hoʻo fanga moá ko ha koloa fakataua ia. Te ke maʻu ha paʻanga lahi ange kapau ʻe tokolahi ange hoʻo fanga moá?
MALIA: ʻIo, ʻe pehē. ʻOku totonu ke u fakatau mai ha fanga moa tokolahi ange.
NĀOMI: Ko e hā mo ha toe meʻa te ne ʻai ke faingofua ange hoʻo pisinisí?
MALIA: ʻE lelei moʻoni ke ʻi ai ha pasikala ke tufa ʻa e fuaʻimoá pea mo fetuku mai ʻa e fafanga moá. ʻOku mamahi lahi hoku vaʻé ʻi he lué.
NĀOMI: Sai, mahalo pē ʻoku totonu ke ke fakatau ha pasikala. Kapau naʻe ʻi ai hao pasikala, te ke maʻu ha paʻanga lahi ange?
MALIA: ʻIo, kapau naʻe ʻi ai haʻaku pasikala, ʻe vave ange ʻeku tufá. ʻE lahi ange hoku taimi ke fakatau atú. Ka ʻoku totonu ke u fakatau ha pasikala pe fanga moa tokolahi ange?
NĀOMI: Ko e fē ʻa e meʻa ʻoku mahuʻinga taha ki hoʻo pisinisí ʻi he taimi ní? Ko ha pasikala pe fanga moa tokolahi ange?
MALIA: ʻOku ʻikai ke u ʻilo ʻe au. ʻE founga fēfē haʻaku fili?
Foki ki he peesi 94
Tokanga ʻi he Ngaahi Fakamole Tuʻu Maʻú
Fili ha taha pea fakatātaaʻi ʻa e meʻa ko ʻení:
MALIA: Naomi, ʻoku ou fakakaukau ʻe ʻomi ʻe he ngaahi koloa fakatauá ha paʻanga lahi ange ki heʻeku pisinisí. Ka ʻoku ou hohaʻa ʻi hono mahuʻingá
NĀOMI: ʻOku lelei ia Malia, ʻoku totonu ke ke feinga maʻu pē ke fakasiʻisiʻi ʻa e fakamolé.
MALIA: Te u ʻiloʻi fēfē pe ʻe fiha ʻeku fakamolé? ʻOku lahi ʻenau faʻa liliú!
NĀOMI: ʻUluakí, ʻoku fie maʻu ke ke fakamavahevaheʻi hoʻo fakamole tuʻu maʻú me hoʻo fakamole kehekehé.
MALIA: Siʻi, ʻoku ʻikai ke u ʻilo ʻe au pe ʻoku ʻuhinga ia ki he hā.
NĀOMI: Tuku ke u fakamatalaʻi peheni ia. ʻOkú ke ʻiloʻi ʻa Taniela?
MALIA: ʻA e tama ʻoku fakatau nāunau falé?
NĀOMI: ʻIo. Ko e taimi ʻoku faʻu ai ʻe Taniela ha sea ke fakatau atú, ʻokú ke pehē ʻokú ne totongi ha taha ke maʻu ʻa e papa ʻokú ne fakaʻaongaʻi ki hono faʻú?
MALIA: ʻIo.
NĀOMI: ʻOku tonu ia. ʻOku saiʻia ʻa Taniela ke tatali kae ʻoua kuó ne maʻu ʻa e ʻotá peá ne toki fakatau leva ʻa e papá.
Kapau ʻe fakatau atu ʻe Taniela ha sea ʻe taha he māhiná ni, ʻokú ne totongi ʻa e papa ki he sea pē ʻe taha. Kapau te ne fakatau atu ha sea ʻe hongofulu ʻi he māhina hono hokó, te ne totongi leva ʻo liunga hongofulu ʻa e lahi ʻo e papá.
MALIA: Ka ʻoku sai pē ia, he ʻoku liunga hongofulu ʻa e sea ʻokú ne fakataú!
NĀOMI: Ko ia tofu pē. Ko e fakamole ʻa Taniela ki he papá ʻoku fetōʻaki pe kehekehe. ʻOku hiki pe tō ʻo fakatatau mo e lahi ʻo e meʻa ʻokú ne fakatau atú.
ʻOku totongi he taimí ni ʻe Taniela ʻa e fakaʻaongaʻi hono fale ngāué. Tau pehē pē ʻoku 1000 he māhina ʻa ʻene totongi falé. Ko e hā nai ʻa e lahi ʻo e totongi fale ʻokú ne faí kapau te ne fakatau atu ha ʻū sea ʻe hongofulu?
MALIA: Ko e 1000.
NĀOMI: Ko e fiha leva ʻokú ne totongí kapau te ne fakatau atu ha sea pē ʻe taha?
MALIA: Kei 1000 pē. ʻOku ʻikai toe liliu ia.
NĀOMI: ʻOku tonu ia. Ko e totongi fale ʻa Tanielá ko ha fakamole tuʻu maʻu. ʻE tatau ai pē pe ko e hā ʻa e lahi pe siʻisiʻi ʻo e meʻa ʻokú ne fakatau atú. Kuo pau pē ke ne kei totongi.
MALIA: Mani, ʻoku ʻikai ke u tui te u saiʻia ʻi he mahuʻinga tuʻu maʻú.
NĀOMI: Kuo pau pē ke tau tokanga ʻi he mahuʻinga tuʻu maʻú. ʻE lava ke nau ʻaonga kapau ko ha koloa ʻoku fakataua.
MALIA: Pea tau fakatau ke lahi feʻunga ke totongi kinautolu!
NĀOMI: ʻOku tonu ia!
MALIA: Naomi, te ke lava ʻo tokoni mai ke u ʻiloʻi pe ko e fē ʻi heʻeku ngaahi fakamolé ʻoku tuʻu maʻú mo ia ʻoku kehekehé?
Foki ki he peesi 98