Ngaahi Maʻuʻanga Tokoní
Te tau Lava ʻo Fai ʻENI!
Fili ha taha pea fakatātaaʻi ʻa e meʻa ko ʻení.
MALIA: ʻIo, ʻoku ngāue moʻoni ʻeni! Kuo fāifai peá u ʻiloʻi.
HUSEPĀNITI ʻO MALIÁ, TIEKO: Ko e hā ʻokú ke valelau ki aí? Ko e hā ʻoku ngāué?
MALIA: ʻOku fekauʻaki ʻa e meʻa kotoa pē. Ko e taimi naʻa mau kamata ō ai ʻi he uike ʻe tahaua kuo hilí ki heʻemau kulupu moʻui fakafalala pē kiate kitá, naʻe ʻikai haʻaku misi pe ko e hā hano lahi haʻane fakaleleiʻi ʻeku pisinisí. ʻOku toki ʻuhinga mālie kotoa—ʻa e ngaahi tukupā naʻa mau tauhí, ngaahi meʻa naʻa mau ako ʻi heʻemau kulupu moʻui fakafalala pē kiate kimautolú!
TIEKO: ʻIo, naʻá ku fakatokangaʻi ʻa e meʻa tatau ʻi heʻeku kulupu kumi ngāue he moʻui fakafalala pē kiate kitá. Kuó u maʻu he taimí ni ha ngāue lelei ʻaupito ʻi he fale mahakí. ʻE fāifai peá ta toki lava ʻo tauhi hota fāmilí ʻaki e paʻanga hū mai ʻi heʻeku ngāué mo hoʻo pisinisi fuaʻimoá. ʻOku fekauʻaki ʻa e meʻa kotoa pē.
MALIA: Tieko, ʻoku ʻikai ko ha pisinisí pē ʻaʻaku. Ko ʻeta pisinisi. Mālō hoʻo ngāue mālohi ʻi hoʻo ngāué mo toe tokoni mai ʻi heʻeta pisinisi fuaʻimoá.
TIEKO: Ko e pisinisi foki mo ia ʻa e ʻEikí. Kuo tau fakatapui ʻa ʻeta feinga fakapisinisí kiate Ia, tui ki he Fakamoʻuí, mo lotua ʻeta pisinisí.
MALIA: Naʻe fie maʻu ke ta siofi lelei ʻeta pisinisi fuaʻimoá. Naʻá ta talanoa mo e kau fakataú mo ha kau maʻu pisinisi kehe ke ʻiloʻi ʻa e meʻa naʻe fie maʻu ʻe he kakaí. Manatuʻi? Naʻá ta fakatokangaʻi ʻoku totonu ke ta fakatau atu ha huʻakau fakataha mo ʻeta fuaʻimoá.
TIEKO: ʻIo, pea naʻá ta kumi ʻa e feituʻu ke maʻu mei ai ʻeta fuaʻimoá mo e huʻakaú. Naʻá ta fakakaukau naʻe ʻikai ko ha fakakaukau lelei ke fakatau ha kosi ke maʻu ai ʻa e huʻakaú. ʻOku sai ange ke fakatau ha huʻakau foʻou meia Petelō, he ʻoku ʻosi tokolahi ʻene fanga kosí.
MALIA: Peá ta ako leva ʻa e founga ke maʻu ai e paʻangá he ʻaho kotoa pē. Naʻá ku muimuiʻi ʻa e meʻa kotoa pē naʻá ta fakamole ai mo e lahi ʻo e meʻa naʻe totongi mai ʻe he kakaí kiate kitauá. Naʻá ta maʻu ha paʻanga lahi ange ʻi he taimi naʻá ta kamata ʻave ai ʻa e koloá ki he ngaahi ʻapí.
TIEKO: Pea naʻá ku toe muimuiʻi foki mo e lahi naʻá ta fakamolé mo e lahi naʻá ta maʻu maʻa hotau fāmilí. Te ta lava he taimí ni ʻo totongi ki he nāunau ako ʻa e kau leká.
MALIA: Naʻe tokoni mai ʻa Nāomi ʻi he founga ke lahi ange ai ʻa e fakatau atú. Naʻá ta kamata fai ha ngaahi fehuʻi ki he kau fakataú, fakafanongo kiate kinautolu, mo fai ha ngaahi fokotuʻu. Naʻá ta poupouʻi ʻa e kau fakataú ke nau fakatau lahi ange ʻa e fuaʻimoá mo ha huʻakaú. Ko ha fakakaukau lelei moʻoni hono fekau ʻa Sōfia ke ʻave ʻa e koloá ki he ngaahi ʻapí. Naʻá ta lava ai ʻo ʻiloʻi lelei ange ʻeta kau fakataú mo maheni mo hanau tokolahi.
TIEKO: Pea ʻi he tokolahi ʻa e kau fakatau foʻoú, naʻá ta fie maʻu ha fuaʻimoa lahi ange ʻi he ʻaho kotoa, peá ta ako ki he nō paʻangá ke fakatau ha fangamoa tokolahi ange. ʻOku ou fiefia ʻi he ʻikai ke tau fai ʻa e fuofua noó. Naʻe ʻikai ke ta mei lava ʻo tā fakafoki. Naʻá ta fie maʻu pē ha kiʻi nō siʻisiʻi ke fakatau ʻaki ha fanga moa kiʻi tokolahi ange.
MALIA: Sio?! ʻOku nau fekauʻaki kotoa. ʻOku fie maʻu pē he taimí ni ke tau sio ki ha founga ke holoki ʻaki ʻa e fakamolé mo hiki hake ʻa e lahi ʻo e meʻa ʻokú ta fakatau atú.
TIEKO: ʻIo. Te ta lava ʻo fai ʻeni!
Foki ki he peesi 184
Ko ʻEku Pisinisí ʻi ha Miniti ʻe Nima
ʻOku totonu ke lau ʻe he tokotaha tokoní kae muimui pē ʻa e kau mēmipa ʻo e kulupú ʻi he peesi 187.
MALIA: ʻOku ou kiʻi manavasiʻi ke fai ʻa e fakamatalá, ka kuo aʻu ʻo u ʻiloʻi lelei kimoutolu. Te u sai pē. Konga 1—ʻOku pau ke u fakamatalaʻi ʻeku pisinisí. Ko ʻeku pisinisí ʻoku fakatau atu ai ʻa e fuaʻimoá mo e huʻakaú. Naʻá ku kamata ʻaki ʻa e fuaʻi moá ʻi he ngaahi māhina siʻi kuo hilí. Naʻá ku tānaki atu ʻa e huʻakaú ʻi hili ʻeku ʻiloʻi naʻe fie maʻu ia ʻe heʻeku kau fakataú. ʻOku ou toe fakahoko foki mo e tufa ki he ngaahi ʻapí he taimí ni. ʻOku lelei ange ʻeku pisinisí talu mei heʻeku kau ʻi he kulupu moʻui fakafalala pē kiate kita ko ʻení.
MALIA: ʻOku fekauʻaki ʻa e konga 2 mo e ngaahi fehuʻi ʻo e uiké. Kuo tokoni kotoa ʻa e ngaahi fehuʻí kiate au. Ka, kapau te u fili ha taha, ko e fehuʻi naʻá ne fakatupulaki lahi taha ʻeku pisinisí ko hono fakamavaheʻi ʻa e paʻanga ʻo e pisinisí mei he paʻanga fakatāutahá. Kimuʻa aí, naʻe tuifio ha paʻanga pē naʻá ku maʻu mo ʻeku pʻanga fakafoʻituituí pea naʻe ngāue ʻaki. Naʻe ʻikai ke lelei. Ko e taimi ní ʻoku ou fakamavahevaheʻi kinaua.
MALIA: Konga 3—ngaahi lekooti fakapaʻangá mo e fakahū paʻangá. Naʻá ku lava ʻo fakahū ha paʻanga ʻi ha uike ʻe 9 mei he uike ʻe 12 fakakātoa. Naʻá ku tauhi ha ngaahi lekooti fakapaʻanga ʻo ʻeku pisinisí ʻi he uike ʻe 8 hokohoko kuo ʻosí. Naʻá ku fai ʻa e meʻa tatau mo ʻeku ngaahi lekooti fakatāutahá. ʻOku ou palani ke hokohoko atu ʻeku tauhi lekōtí. ʻOku ou saiʻia moʻoni heʻeku ʻiloʻi ʻa e lahi ʻoku ou maʻú mo e lahi ʻoku ou fakamolé. ʻOku ou toe fiefia ʻaupito ke ʻi ai ha paʻanga ʻi he ʻakauní. Naʻe ʻikai teitei ʻi ai haʻaku meʻa pehē kimuʻa. ʻOku fakafiemālie ke u ʻiloʻi ʻoku ʻi ai.
MALIA: Sai, ko e taimi ʻeni ki he konga 4—hokohoko atu hono fakatupulaki ʻeku pisinisí. Kuó u ako ha meʻa lahi fau ʻi he uike ʻe 12 kuo hilí. ʻOku ou loto ke hokohoko atu ʻeku akó. Te u kau ki he kulupu pisinisi ʻa hotau siteikí.
MALIA: Konga fakaʻosí. Ko e konga 5, ko ha taumuʻa ʻo e pisinisí. ʻOku ou fie maʻu ʻeku pisinisí ʻi ha ʻosi ha taʻu ʻe taha ke ʻi ai ha paʻanga fehūfaki feʻunga ai ke u lava ʻo nooʻi ha feituʻu ʻi he konga femoʻuekina taha ʻo e māketí. ʻE tokoni ia ke tupulaki lahi ange ai ʻeku pisinisí.
Fakamālō atu ki he taha kotoa. Kuo mou tokoniʻi moʻoni au ke toe lelei ange ʻeku pisinisí!
Foki ki he peesi 187