1. Kua maata rai te au mea ta Iakoba i akakite mai ki toku ra iti tangata i reira ra, ina ra, ko teia anake te au tuatua taku i inangaro i te tata, no te mea, kua rava te au te mea i tataia ra.

2. E teianei, e tata au, ko Niphai, i te au tuatua a Isaia, kua mataora oki toku ngakau i tana ra au tuatua. E akatau au i tana au tuatua ki toku iti tangata, e unga atu oki au i te reira ki toku iti tangata katoatoa; kua kite tikai aia i toku Akaora, mei taku katoa i kite iaia ra.

3. E kua kite oki toku teina, ko Iakoba, iaia, mei taku oki i kite atu iaia. No reira, e unga atu au i ta raua au tuatua ki taku au tamariki, kia kite papu ratou e, e tuatua mou taku ra au tuatua. I tuatua mai ei oki te Atua e, na roto i te vaa o nga kite toko toru ka akatinamou au i taku nei au tuatua. Ina ra, maata atu te au kite ta te Atua e tono mai, kia akapapu aia i tana au tuatua katoatoa.

4. I na, kua mataora toku ngakau i te akakite anga atu e, ka tae mai te Mesia e tikai; no reira oki i orongaia mai ei te ture a Mose ra; e te au mea ravarai i orongaia ki te tangata e te Atua mei muatangana maira o teianei ao, e au akakiteanga anake ïa no te Mesia ra.

5. Te mataora katoa nei toku ngakau i te au koreromotu ta te Atu i papau mai ki to matou ai metua; i na, te rekareka nei toku ngakau i tona ra meitaki e i tana au tuatua tika, e te mana e te aroa maata i tana ravenga mutu kore ra no te eakaoraanga i te tangata i te mate ra.

6. Kua mataora oki toku ngakau i te akakite anga atu ki toku ra iti tangata e, kia kore te Mesia e tae mai, kua mateia te au tangata katoatoa.

7. Naringa oki kare e Mesia, kare katoa e Atua, e naringa kare e Atua, kare tatou nei, no te mea, kare i reira e angaia anga. Te ora ra te Atua, e koia te Mesia, ei tona ra tuatau tau e aere mai ei aia.

8. E teianei, te tata atu nei au i tetai au tuatua a Isaia, kia mataora te ngakau o toku ra iti tangata, ko te ka kite i teianei au tuatua, e kia mataora ratou no te au tangata katoatoa. Ko teia te au tuatua ra, e ka tika oki ia kotou kia akatau i te reira ia kotou e i te tangata katoatoa oki.