1. E teianei, te tuatua atu nei au, ko Niphai, i te au totou ta toku metua i tuatua mai no Iosepha, ko tei apainaia ki Aiphiti ra.

2. I na oki, kua totou tikai aia i te tuatua no tona ra uanga. E te au totou tana i tata ra, kare tetai i maata ake. E kua totou mai aia kia matou e ta matou uanga e kua tataia te reira ki runga i te au papa veo.

3. E akaoti akera toku metua i tana tuatuaanga i te au totou a Iosepha, kua kapiki mai aia ki te au tamariki a Lamana, koia oki tana au tamariki tamaroa e tana au tamariki tamaine katoa, e kua tuatua katoa atura aia kia ratou. I na, e taku au tamaroa e taku au tamaine oki, ko te au tamariki kotou na taku mataiapo, kua inangaro au kia akarongo mai kotou i taku nei tuatua.

4. No te mea, i tuatua mai te Atu, te Atua e, kia akono marie kotou i taku au akaueanga, ka akameitakiia kotou ki runga i te enua nei, e kia kore ra kotou e akono i taku au akaueanga, ka tipu keia kotou i toku nei aroaro.

5. Ina ra, e taku au tamariki tamaroa, e taku au tamariki tamaine e, kare e rauka iaku te aere ki raro i toku menema, mari ra, kia vaio au i tetai akameitakianga ki runga ia kotou; i na oki, kua kite au e, me apiiia kotou ki te au mataara e tau kia aereia ra, kare rava kotou e akaruke i te reira.

6. E teianei, e mei te mea e taumaaia kotou, i na, e vaio au i taku akameitakianga ki runga ia kotou, kia rave keia taua taumaa ia kotou na, e kia iri mai ïa ki runga i te upoko o to kotou nga metua.

7. No reira, no toku ra akameitakianga, kare te Atu, ko te Atua, e akatika kia pou takiri kotou; no reira ka aroa mai aia ia kotou e ta kotou uanga e tuatau ua atu.

8. E akaoti akera toku metua i tana tuatua ki te au tamariki tamaroa e te au tamariki tamaine a Lamana ra, kua akaue atura aia kia aratakiia mai te au tamaroa e te au tamaine a Lemuela ki mua iaia.

9. E kua tuatua atura aia kia ratou, na ko atura, i na, e taku au tamariki tamaroa e taku au tamaine oki, kotou te au tamariki a te rua o taku tamariki; i na, te vaio nei au kia kotou i te akameitakianga taku i vaio no te tamariki a Lamana; E tenana, kare kotou e pou rava; ei te openga ra, ka akameitakiiaʼi ta kotou uanga.

10. E akaoti akera toku metua i te tuatua anga kia ratou, i na, kua tuatua ra aia ki te au tamariki tamaroa a Isemaela, e tona ngutuare katoa.

11. E akaoti akera aia i te tuatua anga kia ratou, kua tuatua maira aia kia Samu, na ko atura; E ao toou e taau uanga katoa, ka riro oki te enua kia koe, e ki toou tuakana ko Niphai. E ka tatauia taau uanga ma tana katoa oki; e ka riro toou tu mei to toou tuakana, ka riro oki taau uanga mei tona uanga; e ka akameitakiia koe i toou au rā katoatoa ra.

12. E akaoti akera toku metua, ko Lihai, i tana tuatua anga ki tona ngutuare katoatoa, kia tau ki te inangaro o tona ngakau, e ta te Vaerua o te Atu tei roto iaia, e kua pakari aia. Kua mate atura aia e tanumia iora.

13. Kare i roa i muri ake i tona mateanga, kua riri maira Lamana raua ko Lemuela, e te au tamariki tamaroa a Isemaela iaku, no te ako a te Atu.

14. I akauruia oki au, ko Niphai, kia tuatua atu kia ratou kia tau ki tana tuatua, i tuatua ana oki au i te au mea e manganui kia ratou, e i na reira oki toku metua, i mua ake i tona mateanga; e kua tataia teianei au tuatua e manganui ki runga i taku ra au papa ke no te mea, kua tataia te pae maata o te au mea ta matou i rave ra, ki runga i taku ra au papa ke.

15. Te tata nei au ki runga i teianei au kapi i te au mea o toku vaerua, e tetai pae o te tuatua tapu i kotikotiia ki runga i te au papa veo ra. No te mea kua mataora toku vaerua i te au tuatua tapu, e te akamaara nei toku ngakau i te reira, e te tata nei oki au i te reira ei apiianga e ei puapinga no taku au tamariki.

16. I na, te mataora nei toku vaerua i te au mea a te Atu e te akamaara ua nei toku ngakau i te au mea taku i akara e taku i akarongo.

17. No te meitaki maata o te Atu i te akakite anga mai kiaku i tana angaanga mamaata e te umere ra, te kapiki atu nei toku ngakau e, Aue oki au te tangata ara nei, i na, te aue nei toku ngakau no te kopapa nei. Te mii nei toku vaerua no taku au ara.

18. Te koropiniia nei au e te au timataanga e te au ara tei rokoia mai au nei.

19. E kia inangaro au i te mataora, te aue nei toku ngakau no taku au ara; ina ra, kua kite au iaia taku e irinaki nei.

20. Ko toku Atua tei tauturu mai iaku nei; kua arataki mai aia iaku na roto i toku au tumatetenga i roto i te metepara; e kua akaora mai aia iaku ki runga i te moana.

21. Kua akaki aia iaku ki tona ra aroa, i paruparu ei toku kopapa.

22. Kua tāpū aia i toku au enemi ra, e ruketekete ei ratou i mua iaku nei.

23. I na, kua akarongo mai aia i toku kapikianga i te ao, e kua oronga mai aia i te kite kiaku na roto i te orama i te po.

24. E kua maroiroi ua rai au i te pure maata kiaia i te ao, i na, kua akateitei au i toku reo ki runga; e kua eke maira te au angela e kua matuapuru maira iaku.

25. E kua apai keia atu i toku kopapa na runga i te peau o tona Vaerua ki runga i tetai maunga teitei roa ra. E kua akara atura toku mata i te au mea mamaata; i na, kua maata atu i tei tau i te tangata kia akara, no reira kua akaueia au, auraka e tata i te reira.

26. E teianei, ko au nei i akara i te au mea mamaata ra, e kua oronga te Atu ki te tangata i tona aroa maata, eaa te mea i aue ei toku ngakau, e e noo ei toku vaerua ki roto i te ngai o te mii, e e pou toku kopapa, e e ngaro toku maroiroi, no toku au tumatetenga?

27. Eaa au nei ka ariki ei i te ara a toku nei kopapa? I na, eaa au ka ariki ei i te timataanga, e raukaʼi te mea kino ki te ngai i roto i toku ngakau, kia akakore i toku au, e kia tamanamanata i toku vaerua? Eaa au ka riri ei ki toku enemi.

28. E ara mai e toku vaerua e! Auraka e kaki atu i te ara. Ka rekareka e, toku ngakau e, auraka e ngai o te enemi i roto i toku vaerua.

29. Eiaa e riri akaou, ki toku au enemi. Auraka kia meangiti toku maroiroi no toku au tumatetenga.

30. Kia mataora, e toku ngakau e, e kapiki atu ki te Atu, e tuatua atu e, E te Atu, ka akapaapaa atu au ia koe e tuatau ua atu; i na, ka mataora toku vaerua ia koe, e toku Atua, e te toka e oraʼi au.

31. E te Atu, e akaora ainei koe i toku vaerua? Ka akaora ainei koe iaku i te rima o toku au enemi? Kia ruketekete rava au ka vaitata mai ei au ki te ara.

32. Kia tapiri uaia te au ngutupa o ade i mua iaku, no te mea kua puta toku ngakau e kua akaaka toku vaerua! E te Atu, kia kore koe e topiri i te ngutupa o taau tuatua tika i mua iaku nei, kia rauka iaku te aere na te arataa akaaka, kia tika oki au i te aereanga na te ara papu.

33. E te Atu, kia akakakau mai koe iaku ki te kakau o taau ra tuatua tika. E te Atu, kia akatupu koe i te ravenga e oraʼi au ki mua i toku ra au enemi. Kia akamaka koe i toku arataa ki mua iaku. Kia kore koe e tuku i te papa turorianga i toku arataa. Kareka kia akatika i toku mataara na mua iaku, e kia kore koe e arai i toku mataara, ko te au mataara ra o toku au enemi.

34. E te Atu, kua irinaki au kia koe, e ka irinaki au ia koe e tuatau ua atu. Kare au e irinaki i te rima o toku kopapa nei; no te mea kua kite au e, e akaapaia aia tei irinaki ki te rima o te kopapa nei; i na, e akaapaia aia tei irinaki ua ki ta te tangata, me kore ra, tei akariro i tona kopapa ei rima nona ra.

35. I na, kua kite au e, ka oronga ua mai te Atua kiaia, ki tei pati. I na, ka oronga ua mai toku Atua kiaku, me kare au e tarevake i te pati; no reira ka akateitei au i toku reo kia koe; e kapiki atu au kia koe, e toku Atua, e te Metua o te tuatua tika. I na, e tae atu toku reo ki runga ia koe e tuatau ua atu, e toku Metua, e toku Atua mutu kore. Amene.