1. E aroa oki te Atu ia Iakoba, e e iki ua rai aia ia Iseraela, e ka akanoo oki aia ia ratou ki runga i to ratou uaorai enua; e e kapiti katoaia oki te tangata ke ke ia ratou ra, e e piri mai oki ki te ngutuare o Iakoba.

2. E ka rave oki te au tangata ia ratou, e arataki atu ki to ratou ra ngai tikai ra; koia ïa, mei te au ngai mamao mai i te openga o te enua; e ka oki atu ratou ki te enua i taputouia ra no ratou. E ka riro oki ratou no te ngutuare o Iseraela, ei tavini tane e ei tavini vaine, i te enua o te Atu ra; e ka akatuikaa atu ratou i te aronga i tei akatuikaa mai ia ratou ra; e tutara oki ratou ki rungao i te aronga i takinga kino mai ia ratou.

3. E ka tae ki te rā e oronga mai ei te Atu i te akangaroianga i toou tumatetenga, e i toou mataku, e i te angaanga maata i tukuia mai ki runga ia koe ra.

4. E i taua rā ra, e rave ei koe i teianei pee ki te ariki no Babulonia, ka na ko atu ei e, aue te tangata takinga kino kua kore ïa, e te oire auro kua kore katoa ïa.

5. Te rakau a te tangata ara, kua atiia ïa e te Atu, te sepeta a te au tutara ra.

6. Ko tei ta riri rava i te au tangata ma te tuku kore; ko tei tutara ki runga i te pa enua ma te riri, ka takinga kinoia aia, e kare tetai e arai.

7. Kua akangaroi te ao katoa nei, kua noo ua, e puroro ua mai to ratou reo imene.

8. Koia rai ïa, ko te au berusi teia e rekareka nei ia koe, e au arezi o Lebanona, i te na ko anga e, mei toou taakaaka angaia, kare ua e tipu i tae mai kia matou.

9. Ko ade i raro ra, te akakeuia nei ia koe, kia aravei ia koe, i toou aereanga atu; kua akaara aia i tei mate noou, e te aronga nunui katoa o te enua nei, kua akatu te au ariki o te au enua i to ratou au terono.

10. E ka tuatua mai ratou kia koe, na ko maira, kua riro katoa koe mei ia matou nei ra? Kua akaaiteia koe kia matou nei?

11. Kua tukuia toou akaparau ki raro i te vaarua, kare oki i rongoia te tangi o taau nabala ra; kua totoaia te iro i raro ake ia koe, e kua tapokiia koe ki te toke.

12. Ko toou oki topa anga mei te rangi maira, e te etu kaka, tamaiti a te popongi e! Ko toou oki tipu angaia ki raro roa i te one, e tei akaue aere i te pa enua e!

13. Kua karanga ra koe i roto i toou ngakau e, E kake atu au ki runga roa i te rangi ra, ki runga ake i te au etu o te Atua, e akateitei ei au i toku terono; e noo au ki runga i te maunga o te uipaanga ra, ki te pae i apatokerau.

14. E kake atu au ki runga ake i te au tumurangi; kia aite au i Tei Teitei ra.

15. Ka tukuia ra koe ki raro roa i ade ra, ki te pae o te vaarua ra.

16. Te aronga e kite ia koe ra, ka akara matariki ua maira ia koe, ka akamaara tikai ia koe, ka na ko atu ei e, Ko te tangata ainei teia i ruketekete ei te enua katoa nei, e i ngaueue ei oki te au basileia?

17. I riro ei te ao nei ei metepara, e i pou takiri ei te au oire; tei kore takiri i tuku i te au tuikaa kia aere.

18. Te au ariki katoa o te pa enua ra, te taravarava anake ra ki raro ma te manea, i tona menema.

19. Kua akarukeia ra koe ki vao mai i to vaarua ra, mei te atava rakau i akaviiviiia ra; e te toenga o tei taiaia ra, i tei puta i te koke ra, i tei riro ki raro ki te au toka o te vaarua ra; mei te kopapa i takatakaiia e te vaevae ra.

20. Kare koe e kapiti katoaia kia ratou i te tanumanga, no te mea, kua pou ia koe toou uaorai enua, toou uaorai au tangata, kua taiaia e koe, kare rava te uanga o te aronga rave kino e akapaapaaia atu.

21. E akateateamamao i te ta i tana au tamariki i te ara a to ratou au metua ra; ko te tu mai aea ki runga e rave i te enua no ratou; ko te ki aea te ao nei i te oire ia ratou.

22. Te tuatua maira oki te Atu Sabaota, E tu au e rave ia ratou; e tipu ke i te ingoa i Babulonia nei, e te toenga, e te tamaiti, e te mokopuna, te na ko maira te Atu.

23. E ka akariro au i te reira ei nooanga no te manu rere ra, e ei punavai; e pakoko takiri au i te reira ki te pakoko o te mate, te tuatua mai ra te Atu Sabaota ra.

24. Kua taputou oki te Atu Sabaota ra, na ko maira, Ko taku oki i maara ra, ko te reira te ka tupu; e ko taku i akakoro ra, ko te reira te ka mou.

25. E arataki au i to Asura ki toku nei enua, e ki runga i toku au maunga e takatakai ei au iaia ki raro i toku vaevae, ei reira tona zugo i runga ia ratou e taka ke ei, e e kore ei tana apainga i runga i to ratou pakuivi.

26. Ko te akakoroanga teia i akakoroia no te pa enua katoa nei; teia oki te rima i akatikaia ra na rungao i te au enua katoa ra.

27. Kua akakoro oki te Atu Sabaota, e naai oki e akakore? Tona rai rima i akatikaia, e naai e akaoki mai?

28. I vai ana teia apainga i te mataiti i mate ei te ariki ra ko Ahaza.

29. Auraka e rekareka, e Philiseti, i te mea, kua ati te rakau i pāpāiaʼi koe ra; e vipera oki te ka tupu na roto i te aka o te ovi ra, e tona uanga ei ovi rere aere ïa mei te ai ra.

30. E kaikai te mataiapo o te putaua ra, e e moe ua tei ngere, ma te kino kore; ka ta ra au i toou ra tumu ki te onge, e te toenga noou ra, e taiaia ïa.

31. E aue, e te ngutupa e, e te are, e te au oire e, e Philiseti katoatoa e, kua akapou ravaia. E auai te peke mai mei apatokerau, e kare te tangata e noo koia anake, i taua rā ra.

32. Eaa te ka karangaia atu ki te au karere a te pa enua nei? Kua akatinamouia Ziona e te Atu, e irinaki te aronga putaua o tona ra iti tangata i te reira.