1. Ei reira au e imene ei ki taku akaperepere i tetai imene akatatānga, na taku akaperepere, no tona kainga vine ra. E kainga to taku akaperepere i te maunga ruperupe ra.

2. Kua akaaua aia i te reira e kua koi aere i te au toka ki vao, e kua tanu iora i te vine meitaki; e kua akatu aia i te are tiaki i rotopu, e kua maani iora i te taomianga vine i roto; i manako iora aia e, ka ua mai te vine tikai, e vine kava ra tei uaia mai.

3. E teianei e to Ierusalema, e te au tangata no Iuda, e akataka ana kotou i te tuatua iaku e toku kainga vine, ko taku ïa tuatua kia kotou.

4. Eaa ua atu te ravenga toe i taua kainga vine noku ra, mari ra i taku i rave ra? I manako ana au e, ka ua mai i te vine tikai, i na, kua ua mai i te vine kava ra.

5. E teianei, i na, e akakite atu au kia kotou i taku ka rave ki taua kainga vine noku ra; ka apai ke au i te koro, kia pou rava ïa i te kaingaia; e vavai au i te patu, kia taakaakaia ïa ki raro ra.

6. E akatanea roa au i te reira; kare e topetopeia kare oki e kenuia; ka tupu ra te taratara e te tataramoa i roto ra; e akaue oki au i te au tumurangi, auraka ïa e ua mai i te ua ki rungao.

7. Ko taua kainga vine o te Atu Sabaota ra, ko te ngutuare ïa o Iseraela, e te au tangata no Iuda ra, ko tana ïa rakau mataora; kua tapapa oki aia i te tuatua tau, e i na, e takinga kino; i te tuatua tika, e i na, ko te aue ra!

8. Aue oki kotou, to tei kapiti atu i te are ki te are, kare e ngai toe, toe iora kotou anake ua ra i rotopu i te enua ra!

9. Kua akakite mai te Atu Sabaota ra ki toku nei taringa; E riro tikai te au are e manganui i te tanea, e manganui oki te oire mamaata e te manea ka kore e nooia e te tangata.

10. Kia ngauru ua atu te eka i te kainga vine ra, okotai ua bato vine e rauka mai, e okotai omera te ua, e epha okotai e rauka mai.

11. Aue oki te aronga e tu vave i te popongi ra, kia aruaru atu ki te kava kona; ko tei noo roa i te aiai kia vera ratou i te wina!

12. E ko te kinura e te nabala, te pau, e te koe, e te wina, tei to ratou au umukai, kareka te ravenga a te Atu ra, kare ratou i akono, e te angaanga a tona rima, kare ïa ratou i akara.

13. I riro tuikaaʼi toku ra iti tangata no to ratou kite kore; kua onge te aronga akateiteiia, e te tangata tini i o ratou ra, kua mate ïa i te kaki vai.

14. No reira, kua akamaata a ade iaia uaorai, e i amama uaʼi aia i tona vaa, kare e aite; e to ratou kaka e te tangata tini e te urupu ngateitei, e ko tei rekareka, ka eke anake atura ratou ki roto iaia.

15. E te tangata rikiriki, e tukuia ia ki raro; e te tangata maata, e taakaakaia ïa; e te mata teitei oki, e tuku katoaia ïa ki raro.

16. E ko Iehova Sabaota ra te ka akateiteiia i te tuatua tau, e ka akatapuia te Atua, ko Tei Tapu ra, i te tuatua tika.

17. E i reira te au punua mamoe e kai aere uaʼi, e na te tangata ke e kai i te au ngai tanea o tei matu ra.

18. Aue oki kotou to tei kika i te kino ki te taura o te kanga ra, e te ara i te taura kariota ra.

19. Ko tei karanga e, kia rapurapu aia, kia akavave aia i tana angaanga kia kite tatou; e kia tupu vave te tuatua a Tei Tapu i Iseraela nei, kia tae mai ïa, kia kite tatou.

20. Aue oki ratou tei tuatua i te kino ra e meitaki, e te meitaki ra e kino; tei tuatua i te poiri ra e mārama, e te mārama e poiri, tei tuatua i te mara ra e vene, e te vene ra e mara.

21. Aue oki ratou tei karape i to ratou uaorai mata, e tei pakari i to ratou uaorai manakoanga!

22. Aue oki ratou, tei ririnui i te inu wina ra e tei maroiroi kia iro i te kava kona ra.

23. Ko tei akatika i te aronga ara no te tutaki, e tei akakore i te tuatua tika a te aronga tuatua tika ra!

24. E teianei, mei te ngangaere e pou i te ai ra, e mei te mauku e pou i te ai mura ra; ka riro katoa oki to ratou tumu mei te mea pe ra, e to ratou pua, ka pekeia ki runga mei te one pueu ra; no te mea kua akaruke ratou i te ture a te Atu Sabaota ra, e kua akavaavaa i te tuatua a Tei Tapu i Iseraela nei.

25. No reira kua ka te riri o te Atu ki tona ra iti tangata, e kua akatika aia i tona rima kia ratou, kua ta iora aia ia ratou; e kua ngaueue iora te maunga, riro atura to ratou au kopapa mei te teita i rotopu i te au arataa ra. Kare akerai tona riri i anga ke, te akatika ua mairai oki tona rima.

26. E akatu oki aia i tetai reva no te pa enua mamao ra, e tuatua mairai aia kia ratou mei te openga mai o te enua ra; e i na, e aere mai ratou ma te viviki maata, kare rava tetai o ratou e roiroi, kare oki e turori aere.

27. Kare ua tetai e varea moe, kare oki i moe, kare to ratou kiri taukupu i matara, e kare oki te itiki o to ratou tamaka e motu.

28. Ka koi ta ratou au kakao, e ka akaetaia ta ratou ana; te tapuae o to ratou au oroenua ra, e manakoia ïa e toka pakari ra, e to ratou au uira, mei te puaioio ïa. To ratou ngunguru anga, e tau ia ki to te liona ra.

29. E mei te au liona kia ngunguru ratou; e ngunguru, ka noni ei ratou i te kai; e na ratou e apai ke, e kare ua e rauka akaou mai.

30. Kia tae ki taua rā ra e aruru mai ei ratou, mei te aruru o te tai ra; e kua akara oki tetai ki te enua, i na, e poiri tumatetenga ïa kua poiri oki te mārama i te rangi ra.