1. I na oki, te Atu, te Atu Sabaota, kia rava atu aia i te au tokotoko e te au turu au turu, Ierusalema e to Iuda; i na, te turu vai oki kia pou takiri.

2. Te tangata ririnui, e te tangata toa, te akava, e te peroveta; te pakari, e te tangata ruaine;

3. Te rangatira rima ngauru ra, te tangata akangateiteiia, te konitara, te tangata karape, e te tangata vaa tukatau.

4. E akariro au i te tamariki ei ui ariki no ratou, e te tamariki mea rikiriki ei tutara no ratou.

5. E takinga kinoia te tangata tetai ki tetai, te tangata katoa ki tona uaorai tangata tupu, e akateitei te tamariki ki runga i te tangata ruaine, e te tarevaka ua ki tei teitei.

6. Kia opu te tangata i tona taeake no te ngutuare o tona ra metua, ka na ko atu aia e, ka aere mai koe ei ariki no matou, e kakau oki toou; auraka ei toou rima teianei mate.

7. E i te reira rā aia e taputou atu ei i te na ko anga atu, kare takiri au e riro ei akaora, kare ua e manga, kare oki e kakau i toku kainga; auraka au e akariroia ei tutara no te au tangata nei.

8. Kua turorirori a Ierusalema, e kua inga Iuda, no te mea, te tau kore nei to ratou arero e ta ratou au ravenga i te Atu, ei akariri atu i nga mata o tona kakā.

9. Te akaapa nei to ratou uaorai mata ia ratou; te akakite pu nei oki i ta ratou ara mei ia Sodoma ra; kare e rauka ia ratou kia uuna; ka aue oki to ratou vaerua, na ratou uaorai i kimi i to ratou mate.

10. E karanga atu ki te aronga tuatua tika ra e, e meitaki to ratou, e kai oki ratou i te ua o ta ratou i rave ra.

11. E aue oki te tangata kino ra; e mate oki ratou; ka tukuia mai te tutaki a to ratou rima ki runga ia ratou.

12. Ko toku nei iti tangata, e tamariki tei takinga kino ia ratou, e vaine tei tutara ia ratou. E toku iti tangata e, na to kotou au arataki i arataki ke ia kotou, e i akakore i te arataa a to kotou au aerenga.

13. Kua tu te Atu e akatika, kua tu aia ki runga e akava i te au tangata.

14. E i te akavaanga te Atu e aravei ei i te aronga pakari o tona ra iti tangata, e to ratou ui ariki; kua pou ra te kainga vine ia kotou, e tei to kotou au are te apinga keia a te tangata rikiriki ra.

15. Eaa ta kotou tika? Kua takinga kino i toku au tangata, e i uki ei i te mata o te putaua. Te tuatua maira te Atu ra ko te Atua Sabaota.

16. Kua tuatua maira oki te Atu e, no te mea kua ngakau parau te au tamaine a Ziona, e kua aere ma te akaroroa i te kaki, e ma te mata akaipaipa ra, e titorangi ua te aerenga ra, e te tangitangi anga to ratou vaevae me aere.

17. E akapakiko ei te Atu i te take upoko o te au tamaine a Ziona e ka kitea e te Atu to ratou au ngai ngaro.

18. E kia tae ki taua rā ra, ka ravea keia e te Atu ra te akateitei o te au rakei tangitangi e te akama, e te kiri punupunu mei te marāma ra.

19. Te ei vivi ra e te tapeka rima ra, e te au tu kakau maana ra.

20. Te au pare vaine ra te au pirianganaoa vaevae ra, e te tarai upoko ra, e te ei paraaraa ra, e te poe taringa ra.

21. Te tapea rima ra e te poe putangiu ra.

22. Te au tu kakau tuke tuke ra e te kakau pu ra, e te kakau atuatu e tapoki ei i te upoko ra, e te au tamou rauru ra.

23. Te au io ra te lineni ra, te tapoki upoko ra, e te tapoki mata ra.

24. E kauonoia te kakara ei aunga pirau, e kauonoia oki te kakau meitaki ra ki te kakau ngaae ra e kauonoia te rauru manea ra ei pakiko ra, e kauonoia te kakau umauma ki te kakau paoa ra, e ka kauonoia te manea ki te ai.

25. E inga toou au tangata ra i te koke, toou au toa uritumu ra i te tamaki ra.

26. E tona au ngutupa, ka aue e ka mii ka noo mamae ua aia ki runga i te one.