1. Kareka ra, kare oki i vaooia te poiri ki te ngai i tumatetenga ana i mua; mei iaia oki i taakaaka i muatangana i te o Zebuluna, e te enua o Naphatali; e i muri mai, kua taakaaka rava ia ratou i te pae taatai i te Tai Muramura, i tera pae Ioridana, ko Galilea i o te au enua ra.

2. Te aronga i aere ua na te poiri ra, kua akara ïa i te mārama maata; te aronga i noo ki te ngai maru mate, kua itiia ratou e te mārama.

3. Kua maata koe i te enua ra, e kua akamaata i te mataora; e mataora ratou ki mua ia koe mei te rekareka i te tuatau mou ra, mei te rekareka oki o te aronga e tua i te apinga keia ra.

4. Kua ati te zugo o tona apainga ia koe, te rakau ki runga i tona pakuivi, te rakau o tei takinga kino mai iaia ra.

5. E riro ei te au tamaki o te toa ra i te aruru papu kore; e te au kakau i takaviriia i roto i te toto ra; ei vaie tau anga ai ïa.

6. Kua anau mai tetai tamaiti na tatou, kua orongaia mai tetai tamaroa na tatou; ei runga ra i tona pakuivi te au vai ei, e e tapaia tona ingoa kia Umere, Tumu Korero, Te Atua Mana, Te Metua no te Tuatau Mutu Kore, te Ariki No Te Au.

7. Kare e mutu te tupuanga o tona ra basileia e tona au, e noo aia ki runga i te terono o Davida, e ki runga i tona ra basileia, ei akatinamou e ei akamatutu i te reira, ma te tuatua tau, e te tuatua tika, i teianei, e tuatau ua atu. Na te maroiroi o te Atu Sabaota te reira e rave.

8. E manga tuatua ta te Atu i unga atu kia Iakoba, e kua iri ki runga ia Iseraela.

9. Ka kite oki te au tangata ravarai, ko Epheraima, e to Samaria katoa, ko tei tuatua ma te ngakau parau e te akateitei, i te na ko anga e,

10. Kua pururu oki te piriki ki raro, e toka tarai ra ta tatou e patu; kua tipuia te sukamino, e pau ra tatou ki te arezi.

11. E akatupu katoa mai te Atu i te au enemi o Rezina ei rave iaia, e nana e taokotai i tona au enemi.

12. To Arama i mua, e te Philiseti i muri; ka apuku rava akera ratou ia Iseraela ma te vaa amama ua. Kare akerai tona riri i anga ke, te akatika ua mairai oki tona rima.

13. Kare oki te au tangata nei i anga mai kiaia i tei papa mai ia ratou ra, kare oki ratou i kimi i te Atu Sabaota ra.

14. E tipu ke atu ei te Atu ia Iseraela nei, i te upoko, e te iku, e te atava, e te rau, i te rā okotai.

15. Ko te tangata taito ra, ko te upoko ïa; e te peroveta e apii i te tuatua pikikaa ra, ko te iku ïa.

16. Na te au arataki o teianei au tangata ratou i arataki ke; e ko tei aratakiia e ratou ka pou katoa ïa.

17. E teianei, kare te Atu e rekareka i ta ratou au tangata mapu, kare oki aia e aroa i ta ratou au tamariki matiroeroe, e te au vaine takaua ra; no te mea e aronga pikikaa anake ratou, e te rave tuatua kino ra, e tuatua neneva anake, kare e vaa toe. Kare akerai tona riri i anga ke, te akatika ua mairai oki tona rima.

18. Te ka ua nei te kino mei te ai ra; e pou te rakau taratara e te tataramoa; e e mura oki i te vaorakau piripiri ra; e peke oki ratou ki runga mei te kou auai ra.

19. No te riri o te Atu Sabaota ra i akapoiriiaʼi te enua nei, e riro oki te tangata nei mei te vaie no te ai ra; kare oki te tangata e akaperepere ua atu ki tona taeake.

20. Ka opu aia ki te pae katau, e e pongi rai; e kai oki i te pae kaui, kare ra e pangia te kaki; e kai oki te tangata ravarai i te kiko o tona uaorai rima.

21. Ko Manase, e ko Epheraima, e ko Epheraima e ko Manase; e kapiti ra raua i te rave ia Iuda. kare akerai taua riri ra i anga ke, te akatika ua mai rai oki tona rima.