1. Te au tuatua a Iakoba, te teina o Niphai, tana i akakite atu ki te ngati Niphai.

2. I na, e taku au taeake akaperepere e, i kapikiia au, ko Iakoba, e te Atua, e i akataoongaia oki au ki tana ra akonoanga tapu, e i akatainuia oki au e toku tuakana ra, e Niphai, ta kotou i iki ei ariki e ei tiaki, ta kotou oki i irinaki no te ora, i na, kua kite kotou e, kua tuatua atu au i te au mea e manganui kia kotou.

3. E teianei, e tuatua akaou atu au kia kotou, no te mea, kua inangaro au i te meitaki no to kotou vaerua. I na, kua taitaia au ia kotou, e kua kite kotou e, kua pera au mei muatangana maira. I na, kua ako marie ua atu rai au ia kotou, e kua apii atu oki au i te au tuatua a toku metua tane; e kua tuatua atu au kia kotou i te au mea i tataia mei muatangana maira o teianei ao.

4. E teianei, i na, kua inangaro au i te tuatua kia kotou i te au mea e vai nei, e i te au mea ka tupu a muri atu, no reira i tatau ei au i te tuatua a Isaia ra kia kotou. Ko te tuatua oki ïa ta toku tuakana i inangaro kia tuatua au kia kotou. E e tuatua atu au, kia riro ïa ei meitaki no kotou, kia kite e kia akapaapaa oki kotou i te ingoa o to tatou Atua.

5. E teianei, te au tuatua taku ka tatau atu, ko te tuatua ïa ta Isaia i tuatua ki te ngutuare katoa o Iseraela ra; e e tau oki te reira kia kotou, no te ngutuare oki kotou o Iseraela. E manganui oki te au mea tei tuatuaia e Isaia te ka tano kia akatau ia ki runga ia kotou, no te mea no te ngutuare kotou o Iseraela.

6. E teianei, ko teia ïa taua au tuatua ra, Te na ko maira te Atu ra ko te Atua. I na, e akatika au i toku nei rima ki te Etene, e e uti oki i toku reva ki te au tangata, ka apai mai ratou i ta kotou au tamariki tamaroa e ka apai mai ratou i ta kotou au tamaine na runga i to ratou pakuivi.

7. E riro te ui ariki ei metua angai, e ta ratou au ariki vaine ei metua vaine angai na kotou; e tupou ratou ki raro i to ratou mata ki te enua ia koe ra e mitimiti ratou i te one-pueu o toou vaevae ra e kite oki kotou e, ko Iehova au, kare oki ratou e akama tei tatari mai iaku nei.

8. E teianei, e tuatua rikiriki au ko Iakoba i te reira au mea. I na oki kua akakite maira te Atu kiaku e, kua taiaia, e kua apaina tuikaaia oki tei noo atu ki Ierusalema, no reira mai oki tatou.

9. Kareka ra, kua akakite mai te Atu kiaku e, ka oki akaou mai ratou. E kua akakite katoa mai aia kiaku e, ka akakite kopapa mai te Atu, ko te Atua ra, Tei Tapu i Iseraela, iaia uaorai kia ratou ra; e kia akakite mai aia iaia uaorai, ka papa e ka akasatauro oki ratou iaia, mei ta te angela i tuatua mai kiaku nei.

10. E kia akaketaketa ratou i to ratou ngakau, e kia maro ratou ki Tei Tapu i Iseraela nei, i na, ei runga ia ratou te akaapa anga a Tei Tapu i Iseraela nei. E te vai atura te rā e taiaiaʼi ratou e e papaiaʼi.

11. E kia tuaru aereia ratou ki tera enua ki tera enua, te na ko maira te angela, ka papaia tetai pae e manganui i te kopapa nei, e no te pure a te aronga tuatua tika ra, e kore ei ratou e mate takiri, kareka ra ka akapueurikirikiia, e ka taiaia, e ka makitakitaia oki ratou; ka aroa mai ra te Atu ia ratou; e kia tae ratou ki te kite i to ratou akaora, ei reira e akaputuputu akaouia mai ei ratou ki te enua ipukarea.

12. E ao oki to te au Etene ra, ta te peroveta i tuatua; i te na ko anga e, mei te mea e tataraara ratou, e kare ratou e tamaki ki Ziona, e kare oki e piri atu ki taua akonoanga maata e te viivii ra, ka ora oki ratou; no te mea ka akatupu oki te Atu ra, ko te Atua, i tana au koreromotu tana i papau ki tana ra au tamariki; no reira oki i tataʼi te peroveta i taua au mea ra.

13. No reira, ko tei tamaki mai kia Ziona te iti tangata koreromotu o te Atu ra, e mitimiti ratou i te repo i to ratou vaevae; e kare oki te iti tangata o te Atu ra e akama. Ko te iti tangata oki o te Atu ra, ko tei tatari iaia; te tiaki ua nei ratou i to te Mesia aere anga mai.

14. E i na, mei ta te peroveta i tuatua, e tae akaou mai te Mesia i te rua o te taime i te akaora ia ratou, e no reira, kia tae mai te rā e akarongo ei ratou iaia ra, ka akakite mai ei aia iaia uaorai kia ratou ma te mana e te kaka maata, i te akapou anga i to ratou au enemi, e kare oki aia e akapou i te aronga e akarongo iaia ra.

15. E ko tei kore e akarongo iaia ra, e pou rava ia ratou i te ai, e te uriia, e te ngaruerue enua, e te akamaringi toto, e te maki, e te onge. E ka kite oki ratou e, ko te Atu, ko te Atua ïa, Ko Tei Tapu i Iseraela nei.

16. E riro atu ainei te apinga keia i te tangata ririnui, e ka akaoraia ainei tei riro tikai ei tuikaa?

17. Te na ko maira te Atu, te au tuikaa i riro ki te tangata ririnui ra, ka rave keia ïa; e te apinga keia i rauka i te tangata taae ra, e tukunaia mai ïa; na te Atua mana oki e akaora i tona ra aronga tapu. Te na ko maira oki te Atu; Ka māro atu au kia ratou tei māro mai iaku ra.

18. E ka akaangai oki au i tei takinga kino mai ia koe ki to ratou uaorai kiko; e ka kona ratou i to ratou uaorai toto mei te kona i te wina ou ra; e ka kite oki te tangata katoatoa e, ko au te Atu, toou Ora, e te Mana Teitei a Iakoba, te Akaora noou.