1. E teianei, i na, e aku au taeake akaperepere e, e tuatua atu au kia kotou, no te mea, kare au, ko Niphai, e inangaro ia kotou kia manako e, e maata atu ta kotou tuatua tika i ta te au Etene. I na oki, kia kore kotou e akono i te au akaueanga a te Atua, ka mate katoa kotou, e no te au tuatua i tuatuaia, eiaa kotou e manako e, ka pou rava te au Etene.

2. Ina ra, te tuatua atu nei au kia kotou e, ko te au Etene katoatoa ko tei tataraara, ko te iti tangata koreromotu ratou o te Atua; e te au tangata o te ngati Iuda katoa tei kore e tataraara, ka tipu keia ratou; kare oki te Atua e papau i te koreromotu i tetai tangata, mari ra, ko tei tataraara e tei akarongo i tana Tamaiti, ko Tei Tapu i Iseraela ra.

3. E teianei, e totou akaou au no te ngati Iuda e no te Etene katoa oki. Kia tae maira taua puka taku i tuatua ra, e tataia atura te reira ki te au Etene, e topiriia ïa e te Atu, ei reira te tangata e manganui e akarongo ei i te tuatua i tataia ra, e ka apai atu ratou i te reira ki te toenga o ta tatou uanga.

4. Ei reira oki, ka kite te toenga o ta tatou uanga i te tuatua no tatou, e te tu oki o to tatou aereanga mai mei Ierusalema maira, e ka kite oki ratou e, e uanga katoa ratou no te ngati Iuda.

5. E ka akoia te evangelia a Iesu Mesia i rotopu ia ratou; no reira ka akaokiia ratou ki te kite i to ratou ai tupuna, e ki te kite oki ia Iesu Mesia, ko tei kiteaia e to ratou ai metua.

6. Ei reira ka mataora ratou; no te mea, ka kite ratou e, e akameitaki anga ïa no te rima o te Atua kia ratou, e e akamata to ratou au poa poiri i te pururu anga ki raro mei runga mai i to ratou mata, e kare te au uki e manganui e ope i rotopu ia ratou e riro ei ratou ei iti tangata teatea e te manea.

7. E ka akamata oki te ngati Iuda i akapueurikirikiia ra i te irinaki i te Mesia, e ka akamata oki ratou i te putuputu mai ki runga i te enua, e ko ratou tei akarongo i te Mesia ka riro ratou ei iti tangata manea.

8. E akamata te Atu ra ko te Atua, i tana angaanga i rotopu i to te au enua katoa, e to te au kopu, e te au reo, e te au basileia katoatoa i te akatupu i te akaokianga i tona iti tangata i runga i te enua.

9. E akara ra te Atu ra ko te Atua i te tangata rikiriki ma te tuatua tika; e tuku oki aia i te tuatua tau ki te aronga maru o te enua nei. E papa aia i te enua nei ki te rakau o tona vaa; e mate oki te aronga viivii i te matangi o tona ngutu.

10. Kua vaitata rava oki te tuatau e akatupu ei te Atu ra ko te Atua i tetai taka ke anga maata i te tangata nei e ka akapouia oki te aronga kino mei te mea oki e pou i te ai ra, e ka aroa aia i tona ra iti tangata.

11. Kua tatuaia tona taukupu ki te tuatua tika e tona umauma kua tatuaia ïa ki te tamou marie.

12. Ei reira te luko e noo ei raua ko te punua mamoe, e te nemera e te punua puakanio, e kapiti katoa ïa i te moe anga, e te punua puakatoro, e te liona ou, e te puakatoro angaia ra, okotai rai kapiti anga mai; e na tetai tamaiti iti e arataki ia ratou.

13. E te puakatoro e te pea, okotai ïa one kai, okotai oki ngai moe anga to te anau. E kai oki te liona i te mauku mei te puakatoro katoa ra.

14. E kanga ua te tamaiti kai u ki te vaarua o te asepi; e ki runga i te koanga o te vipera ra, e tuku ei te tamaiti i tona rima.

15. Kare oki e akamamae, kare oki e ta, i toku katoa ra maunga tapu no te mea, ka ki te enua i te kite i te Atu, mei te moana e tapoki i te enua ra.

16. E no reira, ka akakiteia mai te au mea katoa o te au enua katoa ra, e ka akakiteia mai te au mea katoatoa ki te tamariki a te tangata nei.

17. Kare e tuatua ngaro te ka kore e akakiteia, kare e angaanga poiri te ka kore e eeuia mai ki roto i te marama, e kare oki e mea i topiriia i runga i te enua nei te ka kore e tataraia.

18. No reira, ei taua rā ra, ka akakiteia mai ei te au mea katoatoa i akakiteia mai ana ki te tamariki a te tangata nei; e roa oki te tuatau kare o Satani e mana akaou ki runga i te ngakau o te tamariki a te tangata nei. E teianei, e taku au taeake akaperepere e, e akaoti ua atu au i taku tuatua anga.