1. E teianei, te akaoti nei au, ko Niphai, i taku totou anga kia kotou, e aku au taeake akaperepere. Kare e tika iaku kia tata i te au mea katoatoa mari ra, tetai au mea taku i kite, ka tupu tikai a muri atu; kare oki e tika iaku kia tata i te au tuatua katoatoa a toku teina ra a Iakoba.

2. Ko te au mea taku i tata atu nei, kua rava te reira iaku, mari ra, e manga tuatua iti taku e tata no te evangelia a te Mesia ra; no reira e akakite pu ei au kia kotou mei tei tau i te tu o taku totou anga.

3. E mataora oki toku ngakau i te tuatua papu; e te pera ra oki te Atu ra, ko te Atua i te rave anga i tana angaanga i rotopu i te tamariki a te tangata nei. Te oronga maira oki te Atu ra ko te Atua i te marama ki te ngakau o te tangata nei, i te mea oki, te tuatua maira aia i to te tangata nei reo kia tau i ta ratou ka marama.

4. E tenana, kia akamaara kotou e, i tuatua ana au kia kotou i ta te Atu i akakite mai kiaku nei, no taua peroveta ra ko te ka bapetizo atu i te Punua Mamoe a te Atua, koia te ka apai ke atu i te au ara a to te ao nei.

5. E teianei, me e tika i te Punua Mamoe a te Atua ra, tei tapu, kia bapetizoia aia ki roto i te vai kia akatupu i te au tuatua tika katoa e tau ei, i na, e mea tika roa atu ia tatou, e aronga tapu kore oki tatou, kia bapetizoia tatou, ki roto i te vai ra.

6. E teianei, e ui atu au kia kotou, e taku au taeake akaperepere e, e naea te Punua Mamoe a te Atua e akatupu ei i te au tuatua tika katoa, i tona bapetizoangaia ki roto i te vai?

7. Kare ainei kotou i kite e, kua tapu aia? E no atu e tapu ua rai aia, te akaari maira aia ki te au tamariki a te tangata nei e, te taakaaka nei aia iaia uaorai i te kopapa nei i mua i te aroaro o te Metua ra, ma te akakite atu ki te Metua e, ka kauraro aia iaia ra i te akono anga i tana au akaueanga.

8. E teianei, e oti akera aia i te bapetizoia ki roto i te vai, kua eke maira te Vaerua Tapu i te tu o te kukupa ki rungao iaia ra.

9. E kua akaari te reira ki te au tamariki a te tangata nei i te tika o te mataara, e te meangiti o te ngutupa ta ratou ka tomo, nana oki i tuku i te akaraanga ki mua ia ratou.

10. Kua tuatua maira aia ki te au tamariki a te tangata nei e, e aru mai kotou iaku nei. E tenana, e taku au taeake akaperepere, ka rauka ainei ia tatou i te aru atu ia Iesu, me kare tatou e akono i te au akaueanga a te Metua ra?

11. Kua tuatua maira oki te Metua e, kia tataraara kotou, kia tataraara kotou e kia bapetizoia na roto i te ingoa o taku Tamaiti Akaperepere.

12. Kua tae maira oki te reo o te Tamaiti kiaku nei, i te na ko anga mai e, ko tei bapetizoia i toku nei ingoa, ka orongaia mai te Vaerua Tapu kiaia e te Metua ra, mei iaku katoa nei oki, e tenana, ka aru mai ana iaku nei, ka rave i te au mea ta kotou i kite iaku i te rave anga ra.

13. E teianei, e aku au taeake akaperepere, kua kite au e, kia aru mai kotou i te Tamaiti, ma te ngakau katoa, eiaa ma te pikikaa e te akavare i mua i te Atua, ma te ngakau tae ra, i te tataraara anga i ta kotou au ara, i te akakite anga atu ki te Metua e, kua tika ia kotou i te tuku ki rungao ia kotou i te ingoa o te Mesia na roto i te bapetizoanga; koia ïa, i te aru anga atu i to kotou Atu, e to kotou Akaora ki raro i te vai, kia tau i tana tuatua; i na, ei reira e raukaʼi te Vaerua Tapu ia kotou; i na, ei reira e tae mai ei te baptizoanga o te ai e te Vaerua Tapu; ei reira e raukaʼi ia kotou te tuatua atu ma te reo o te au angela, e te maeva atu ki Tei Tapu i Iseraela.

14. Ina ra, e aku au taeake akaperepere, kua na ko maira te reo o te Tamaiti kiaku, kia tataraara kotou i ta kotou au ara, i te akakite anga atu ki te metua na roto i te baptizoanga ki roto i te vai e, kua tika ia kotou i te akono i tana au akaueanga, e kia bapetizoia oki kotou ki te ai e te Vaerua Tapu, e kia rauka oki ia kotou kia tuatua i te reo ou, koia oki te reo o te au angela, e me akaruke kotou iaku i reira, e ngari ake naringa kare kotou i kite iaku nei.

15. E kua akarongo au i tetai reo no ko mai i te Metua ra, i te na ko anga mai e; Ko te au tuatua a taku akaperepere, e tuatua mou ïa e te pikikaa kore. Ko te tangata e akono ua atu rai kia tae ki te openga, koia te ka akaoraia.

16. E tenana, e aku taeake akaperepere, kua kite au e, kia kore te tangata e akono ua atu rai kia tae ki te openga, i te aru anga i ta te Tamaiti a te Atua ra akaraanga, kare rava aia e akaoraia.

17. No reira, e rave kotou i te au mea taku i akakite kia kotou mei taku i kite ana i tei raveia e to kotou ra Atu to kotou Akaora; no reira oki i akakiteia mai ei te reira kiaku, kia kite katoa kotou i te ngutupa e tau, e kia tomo kotou na reira. Ko te ngutupa e tau kia tomoia e kotou, ko te ngutupa ïa o te tataraara e te bapetizoanga ki roto i te vai; ei reira e akakoreiaʼi ta kotou au ara e te ai e te Vaerua Tapu.

18. Tei runga koe i reira i taua mataara tika e te kokota ra e tae ua atu ki te ora mutu kore; no te mea, kua tomo mai kotou na te ngutupa; kua akono marie kotou mei tei tau i ta te Metua au akaueanga e ta te Tamaiti katoa; kua rauka mai oki ia kotou te Vaerua Tapu, ko tei akakite i te Metua e te Tamaiti, e tae ua atu ki te akatupuanga i te taputou nana, e me kua tomo koe na te ngutupa, ka rauka ia kotou.

19. E tenana, e aku au taeake akaperepere, e ui atu au kia kotou na e; Kia tae kotou ki runga i taua mataara tika e te kokota ra, kua oti ua ainei i reira? Auraka rava ïa. Kare kotou i tae ki reira, mari ra na roto te tuatua a te Mesia e te akarongo mou iaia ra, i te irinaki ua anga i tona meitaki; nona oki te mana kia akaora.

20. E teianei, kia aere ua atu kotou ki mua ma te tamou marie i ta te Mesia, ma te tapapa marie iaia e ma te aroa i te Atua e i te au tangata katoatoa. E tenana, kia aere ua atu kotou ki mua ma te rekareka i te tuatua a te Mesia, ma te akakoromaki e tae ua atu ki te openga ra, i na, te na ko maira te Metua, E ora mutu kore to kotou i reira ra.

21. E teianei, e aku au taeake akaperepere, ko teia te mataara, e kare atu e mataara ke, e kare oki e ingoa ke i orongaia mai ki raro ake i te rangi, e raukaʼi i te tangata kia akaoraia i te basileia o te Atua ra. E teianei oki, ko te ravenga teia a te Mesia ra, e te ravenga okotai e te tika a te Metua, e ta te Tamaiti, e ta te Vaerua Tapu oki, okotai ïa Atua openga kore. Amene.