1. Aue oki to tei maani i te ture tika kore, e tei tata i te takinga kino ta ratou uaorai i maani;

2. Ei kopae atu i te aronga putaua i te tuatua tau, ei akangere atu i te mea tika i te aronga rikiriki o toku nei iti tangata; kia riro te au vaine takaua ei apinga keia na ratou, e kia keia oki ratou i ta te au matiroeroe.

3. E akapeea ra kotou kia tae ki te rā e rokoia atu ei kotou i te atoroanga ra, e i te mate e tae mai mei te ngai mamao mai? E oro tika kotou kiaai kia tauturuia mai? E eiea kotou e vaoo ei i to kotou kaka?

4. Me akaruke ratou iaku, e kauraro ratou i te aronga i tapekaia ra, e ka inga ratou ki raro i te aronga i mate ra. No teia au mea kare akerai tona riri i anga ke, te akatika ua mairai oki tona rima.

5. E te tangata Asura e, te rakau a toku nei riri e, e te rakau i to ratou rima, ko to ratou riri ïa.

6. E akaunga atu au iaia ki te enua pikikaa ra, e porokiroki atu au iaia ki te aronga i ririia e au ra; kia akaputuputu i te aru ra; e kia apai ke i tei noniia ra; e kia takatakai aia ia ratou ki raro mei te vari o te au arataa ra.

7. Eaa i kore ei aia i manako akapera, kare oki tona ngakau i pera i te manako anga, kareka te ta, tei reira tona ngakau, e kia tipu i te au enua kare e iti.

8. Te tuatua maira oki aia, kare ainei toku nei ui rangatira ei ui ariki anake ra?

9. Kare ainei Kalano i aite kia Karekemisa? Kare ainei Hamata e aite kia Arepada? Kare ainei Samaria e aite kia Damaseko?

10. Mei toku rima i rave i te au basileia idolo, e ta ratou tiki ra, ko tei meitaki i to Ierusalema i to Samaria.

11. Mei taku i rave i to Samaria e tona ra au idolo, kare ainei au e akapera katoa kia Ierusalema e tona katoa ra au tiki?

12. E riro ra, kia ope te au angaanga katoa a te Atu i te raveia e ïa ki runga i te maunga ra ko Ziona, e ki runga ia Ierusalema, e papaʼi au i tei tupu i te ngakau parau o te ariki no Asura, e te akara anga nengonengo o tona mata.

13. Kua tuatua oki aia e, no toku rima ririnui e no toku nei karape, i tikaʼi iaku te rave i teianei au mea, kua pakari oki au; apai keia e au te kena kainga o te enua ra, e kua noniia e au ta ratou apinga i akaputuputu ra; e mei te toa ririnui ra, ka tuku au i te aronga i noo i te enua ra ki raro.

14. Kua kitea e toku rima te apinga a te au tangata mei te koanga i kitea ra; e mei te tangata i akaputu i te ua manu i akarukeia ra, kua pera katoa toku akaputuputu anga i ta te pa enua katoa; kare ua tetai i akakapakapa ua ake i te peau, e i amama ua ake te vaa, e i kiokio ua maira oki.

15. E akateitei ainei te toki ki tei rave mai e tipu? E akateitei ainei te keke ki tei rave iaia e keke? Mei te rakau pāpā e takirikiri ki tei apai iaia ra; me kore ra e mei te rakau e taki iaia uaorai ki runga mei te mea kare aia i te rakau,

16. E teianei, na te Atu, te Atu Sabaota ra, e unga atu i te ikoke ki runga i te aronga matu ra, e ki raro ake i tona kakā e tutungi ei aia i te ka anga, mei te ai vera ra.

17. E riro te marama o Iseraela ra ei ai, e Tei Tapu ka riro aia ei ai mura; e ka rava kia pou tana rakau taratara, e tana au tataramoa ra, i te ra okotai.

18. E pou oki te manea o tona vaorakau, e tona kainga ua meitaki ra, i te vaerua e tae ua atu ki te kopapa, te ka pouia aia; e ka roiroi oki ïa, mei te tangata mou reva e roiroiia ra.

19. E ko te toenga rakau o tona vaorakau ra, e iti ïa, e ope ua ake i tetai tamaiti iti kia tata.

20. E kia tae ki taua rā ra, Kare te toenga o Iseraela ra, e tei ora i te ngutuare o Iakoba, e irinaki akaou i tei ta mai ia ratou; e irinaki ra ratou i te Atu, i Tei Tapu i Iseraela nei, ma te pikikaa kore.

21. E oki maira te toenga, te toenga no Iakoba, ki te Atua Mana ra.

22. No atu e kua aite ua rai toou iti tangata, e Iseraela e, ki te one i taatai, e toenga ua te ka oki mai. Te akapouanga i akakoroia ra, e maringi ua ïa i te tuatua tika.

23. E taua akapouanga i akakoroia ra, na te Atu ra, na te Atu Sabaota e rave i rotopu i te enua katoa nei.

24. E teianei te na ko maira te Atu ra, te Atu Sabaota, auraka e mataku, e taku iti tangata i noo ki Ziona ra, i te tangata Asura ra; e pāpā mairai aia ia kotou ki te rakau, e apai aia i tana rakau ki runga ia kotou, mei to Aiphiti ra.

25. E roa poto akera, e anga atura taua riri otooto ra, e toku riri i to ratou mate.

26. Na te Atu Sabaota ra e akatupu i tetai maki ki runga iaia, mei te tainga ia Midiana, ki te mate ra ki Areba; mei tana rakau i vai ki runga i te tai ra, e apai aia i te reira ki runga, mei i Aiphiti ra.

27. E kia tae ki taua rā ra, e apai keiaʼi tana apinga i to pakuivi e tana zugo mei runga i to kaki ra; e e akakoreia oki te zugo no te akatainuanga ra.

28. I tae mai ana aia ki Aiata; i na roto atura aia ia Mikeroni i te aereanga, e i Mikamasa i vao ei aia i tana au apainga.

29. Kua topaia ratou te ngai oiti, ei Geba ratou moe ei, kua mataku a Rama, kua rere ke atu a Gibea e Saula.

30. E akateitei i toou reo, e te tamaine a Galima e; e akarongo mai, e Laisa, e to Anatota.

31. Kua aere a Mademena, kua putuputu mai to Gebima kia oro.

32. Ei Noba aia noo ei i taua ra ra, e ruru aia i tona rima ki te maunga o te tamaine a Ziona, te tuaivi ra o Ierusalema.

33. I na, na te Atu ra, na te Atu Sabaota, e tipu i te mangamanga ma te aruru maata; e tipuia oki te aronga ngateitei ki raro, e taakaaia te aronga akaparau.

34. E tipupu oki aia i te ngai piri o te vaorakau ra ki te auri, e inga Lebanona i te rima marōrō.