1. I te au ra o Ahaza, te tamaiti a Iotama, te tamaiti a Uzia, ariki no Iuda, kua aere maira te ariki no Suria ko Rezina, e ko Peka te tamaiti a Remalia, ariki no Iseraela, e kai tamaki kia Ierusalema, kare ra i rauka ia raua.

2. E kua akakiteia te ngutuare o Davida, i te na ko anga e, kua tauturuia a Suria e Epheraima; e kua ngaueue ra tona ngakau, e te ngakau o tona au tangata ra, mei te au rakau o te vao rakau i ngaueue ua i te matangi ra.

3. Kua tuatua maira te Atu kia Isaia, E aere koe i tenana e aravei ia Ahaza, ko koe ma to tamaiti ra ia Sareiasuba, ki te openga mai o te vai ko ra, o te roto ki runga ra, ki te arataa o te kainga o te tamā kakau ra.

4. E karanga atu koe kiaia, kia matakite, e muteki ua; auraka e mataku, auraka oki e parukaua to ngakau, i te auai o teianei puke komotu ai nei, i te riri maata o Rezina, ma Suria, e to te tamaiti a Remalia ra.

5. No te mea kua akakoro a Suria e Epheraima e te tamaiti a Remalia, i te kino noou i te na ko anga e,

6. Aere mai, ka aere tatou ki runga ia Iuda, e tamanamanata atu, e kokoti mai i tetai pae no tatou uaorai; e ko te tamaiti a Tabela nei, ta tatou ïa e iki, ei ariki ki reira.

7. Te na ko maira te Atu ra ko te Atua, kare ïa e mou, kare oki e tupu.

8. Upoko ua rai Damaseko no Arama, upoko ua rai oki Rezina no Damaseko; kare ope te mataiti ono ngauru ma rima, e ngaangaaʼi Epheraima, kare atura e karangaia e iti tangata.

9. Upoko ua rai oki Samaria no Epheraima, upoko ua rai te tamaiti a Remalia no Samaria. Kia kore kotou e akarongo ra, kare rava kotou e akatinamouia.

10. Kua tuatua akaou maira oki te Atu kia Ahaza, na ko maira,

11. E pati koe i tetai akairo ki te Atu ra ki te Atua; e pati ki raro roa ra, me kare ra, ei runga rava.

12. Kua karanga atura Ahaza, kare au e pati, kare oki au e timata i te Atu.

13. Kua tuatua maira aia, E tenana, e akarongo mai, e te ngutuare o Davida e, e meangiti ainei kia akaroiroi koe i te tangata, ka akaroiroi katoa ainei kotou i toku Atua?

14. E tenana, na te Atu uaorai e oronga i tetai akairo no kotou; i na, e nui te paretenia, e e tamaiti tana ka anau, e ka tapaia tona ingoa ko Imanuela.

15. Kia kite aia i te kopae atu i te kino, e te rave i te meitaki, e kai ei aia i te pata, e te meli.

16. I mua ake te tamaiti e kite ei i te kopae i te kino e te rave i te meitaki, ka akarukeia taua enua, taau e riri ra, e nga ariki toko rua nona ra.

17. Ka tuku te Atu ra, ki runga i toou katoa ra au tangata, e te ngutuare katoa o toou ra metua, i te au rā kare i kitea mai, e mei te rā mairai i akaruke ei Epheraima ia Iuda ra, ariki o Asura.

18. E i taua rā ra, e tuatuaʼi te Atu i te rango, i te ngai mamao i Aiphiti ra, e i te rango meli, i te enua ra i Asura.

19. E tae mairai oki ratou, e ka akangaroi ratou ki roto i te au ō i akarukeia ra, e ki roto i te au va toka ra, e ki runga i te au rakau taratara ra, e ki runga i te ngangaere ra.

20. Kia tae ki taua rā ra, e varu ei te Atu ki te varu tutakinaia ra, ki te au tangata i tetai pae mai i te vai ra, ki te ariki no Asura ra, i te upoko, e te uruuru vaevae; e te kumikumi katoa ra, e pou takiri.

21. E kia tae ki taua rā ra, e angai ei te tangata i te tinana puakatoro ou okotai ua ra, e nga mamoe e rua ra;

22. No te maata o te u ta ratou e omai ra, e kai ei aia i te pata, ko te pata oki e te meli ta ratou katoa e kai, ko tei toe i te enua nei.

23. E te au kainga vine katoa ra, okotai tausani te vine ki roto, okotai oki tausani i te manga ario e okonaiaʼi ra e riro ïa, kia tae ki te reira ra, ei rakau taratara, e ei tataramoa.

24. Ma te kakao e ma te ana e aere mai ratou ki reira; e riro oki te enua katoa ra, ei rakau taratara, e ei tataramoa.

25. E te au tuaivi e kenuia ki te ko ra, kare e na reira no te mataku i te rakau taratara e te tataramoa; e riro ïa ra, ei aerenga no te puakatoro, e ei takatakai anga oki no te au mamoe.