1. I te mataiti i mate ei te ariki ra ko Uzia, akara atura au i te Atu, i te noo anga ki runga i te terono teitei, e tei runga roa, e kua ki oki te iero i tei aru iaia.

2. Te tu ua ra nga seraphi i runga ra, taki ono o ratou peau; kua tapoki aia i tona mata, e rua ra, e tapoki aia i tona vaevae, e rua ra, e e rua, kua rere aia.

3. E kua kapiki iora tetai, na ko akera, E tapu, e tapu, e tapu, to te Atu Sabaota; kua ki te ao katoa nei i tona kakā.

4. Kua ngaueue iora nga pou ngutupa i te reo o tona kapiki anga, ki akera te are i te auai.

5. Kua tuatua akera oki au, Aue oki au nei! Kua mate au, e tangata vaa viivii oki au, e te noo nei au i rotopu i te tangata vaa viivii, kua akara oki oku mata nei ki te ariki ki te Atu Sabaota ra.

6. Kua rere maira tetai seraphi kiaku nei, e tei tona rima tetai ngarau ka, i raveia mai e ïa i te piringoi mei runga maira i te atarau ra.

7. Kua akatukia maira ki toku vaa, na ko maira, i na, kua akatukia teia ki to ngutu, kua akataka keia te kino, e kua akakoreia taau ara.

8. Kua akarongo atura au i te reo o te Atu, i te na ko anga e, Koai taku e tono? Koai te ka aere no tatou? Kua karanga atura au, i na, teia au, ko au taau e tono.

9. Kua tuatua maira aia, ka aere, ka karanga atu ki teianei aronga: E akarongo mai kotou, kare ra ratou i marama; e akara mai oki kotou, kare ra ratou e kite.

10. E akaparuparu i te ngakau o teianei aronga; e akateimaa i to ratou taringa, e e topiri i to ratou mata; ko te akara aea to ratou mata, e ko te akarongo aea to ratou taringa, ko te kite aea to ratou ngakau, e ko te akaariuia mai, e ko te akaoraia aea oki ratou.

11. Kua karanga atura au e, mei te aa te roa, e te Atu e? Kua tuatua maira aia, kia pou rava te au oire e kare e tangata, e te au are e kia kore e tangata i roto, e kia tanea rava te enua ra.

12. Kia apai ke ravaia e Iehova te au tangata, ka maata oki te tanea i rotopu tikai i te enua.

13. Toe ua rai oki te ngauru o te tangata ra, ka pou akaou rai oki te reira i te mate; mei te ale ra, e te alona, tipu uaia ra ki raro, te toe ra tona tumu, e riro taua tumu ra e uanga tapu.