1. E akarongo mai kotou kiaku, e tei aruaru i te tuatua tika, ka akara ana ki te toka i kotikotiia mai ei kotou na, e ki te tipoko o te vaarua i koia mai ei kotou.

2. Ka akara ana ki to kotou metua tane kia Aberahama, e kia Sara i anau mai ei kotou na, ko au uaorai tei kapiki iaia; kua akaora ra au iaia.

3. E akapumaana oki te Atu ia Ziona; e te au ngai tanea katoa nona, nana ïa e akapumaana; e nana e akariro atu i tona ngai metepara mei ia Edene, e tona ngai motutaa ra, mei te kainga o te Atu; e kitea te mataora e te pereperekavana i roto iaia, te akameitaki e te reo imene oki.

4. E akono mai iaku, e toku aronga tangata e, e taanga mai to kotou taringa, e toku iti tangata: na ko nei atu te ture iaku nei, e akamou oki au i taku tuatua tau ei turama no te au tangata.

5. Kua vaitata te tuatua tika naku ra; te ora naku, kua riro atura; e na toku rima e tuku i te tuatua tau ki te au tangata; e tapapa mai te au enua moana iaku, e irinaki mai oki ratou i toku nei rima.

6. Ka nānā ana i to kotou mata ki runga i te rangi, ka akara oki ki raro ki te enua nei, e ngaro ke oki te rangi mei te auai, e piro oki te enua mei te kakau ra, e pera katoa to tei noo ki reira i te mate anga; kareka te ora naku, e tika ïa i te vairanga, e kare oki te tuatua tika naku ra e peke atu.

7. E akarongo mai iaku, e te aronga i kite i te tuatua tika ra, e te aronga tei to kotou ngakau taku ture i te tata angaia; auraka kotou e mataku i te akakino a te tangata, auraka oki kotou e tumatetenga i ta ratou taitoito.

8. E pou oki ratou i te uu mei te kakau ra, e kaingaia ratou e te iro mei te uruuru mamoe ra; kareka te tuatua tika naku ra, ka vai rai e tuatau ua atu, e te ora noku ra, ki tera uki ki tera uki.

9. Ka ara, Ka ara! Ka akakakau ana i to ririnui, e te rima o te Atu e, ka ara, mei i te au rā i taito ra, Kare ainei ko koe tei tipu ia Rahaba, i putaʼi oki te taae ra?

10. Kare ainei ko koe tei tamarō i te tai, i te tai moana maata ra; ko tei akariro i te tai moana maata ra ei arataa ei aerenga no te aronga i akaoraia ra?

11. E oki akaou mairai oki tei akaoraia e te Atu, ka aere mai ei ki Ziona ma te imene ra, ei runga i to ratou upoko te meitaki e te mataora mutu kore ra; e rauka ia ratou te rekareka e te pereperekavana; ko te mii ra e te aue, e rere ke atu ïa.

12. Ko au, ko au nei rai, tei akapumaana ia kotou; koai oki koe, i mataku ei koe i te tangata te ka mate, e te tamaiti a te tangata nei, te ka riro mei te ngangaere ua ra?

13. Ka akangaropoinaʼi oki koe i tei anga ia koe ra ko te Atu, ko tei totoa i te rangi ra, e kua akatumu oki enua; e i mataku ua rai koe, kare e rā e tukua, i te riri otooto o te takinga kino ra, mei te mea e kua vaitata aia i te ta? E tenana, teiea iora te rotoriri o taua takinga kino ra.

14. Te rapurapu ua ra te tuikaa ra kia tukuia aia, kia kore aia e mate i te vaarua, kia kore katoa e ngere i te kai.

15. Ko au oki to kotou Atu ra ko te Atua, noku te aruru o te ngaru ra, ko te Atu Sabaota, ko toku ingoa ïa.

16. E kua tuku au i taku tuatua ki roto i to vaa na, e kua tapoki au ia koe i te marumaru o toku rima nei; kia akamou au i te rangi, e kia akatumu i te enua; e kia tuatua atu kia Ziona e, ko kotou toku ra iti tangata.

17. Ka ara, ka ara, e tu ki runga, e Ierusalema e, ko tei inu i te rima o te Atu i te kapu o tona ra riri viviki; kua inu ki te ota o te kapu kavangū e te ruketekete.

18. Kare rava tetai e arataki iaia i te au tamariki tamaroa tana i anau ra, kare rava tetai e mou i tona rima i te au tamariki tamaroa katoa tana i akono ra.

19. Kua tae maira teianei puke tamariki tamaroa e rua kia koe, naai koe e tangi atu? Ko te pou e te mate, te onge e te koke; e naea au e akapumaana atu ei ia koe?

20. Kua matapoiri taua ra au tamaroa, mari ua, ko teia nga tamaroa e rua; te takoto aere ua ra ratou i te openga mai o te au arataa katoa, mei te puakatoro i te kupenga ra, kua ki ratou i te riri viviki o te Atu, i te akamura a toou ra Atua.

21. E teianei e akarongo mai koe i teia, e tei makiia ra, e tei kona ra, kare ra i te wina.

22. Te na ko maira toou Atu ra ko te Atua, na to Atu ra e pati akatenga atu kia akatikaia tona ra iti tangata; i na, kua rave mai au i te kapu ruketekete i to rima na, te ota o te kapu ra o toku riri viviki; kare rava koe e inu akaou i te reira.

23. E tuku ra au i te reira ki te rima o te aronga i takinga kino mai ia koe ra; ko tei tuatua mai ki toou vaerua e, ka piko ki raro, kia aere matou na rungao; e kua tuku koe i toou kopapa mei te one, e mei te arataa i te aronga i aere na reira.

24. Ka ara, Ka ara, e akamaroiroi koe e Ziona, e akakakau i to kakau manea e Ierusalema, te oire tapu; kare e aere akaou mai ki roto ia koe tei kore i peritomeia e tei viivii ra.

25. E ruru ia koe i te pueu; e tu ki runga ka noo ei e Ierusalema e, ruru atu i te tapeka i toou kaki, e te tamaine tuikaa o Ziona e.