1. E teianei, e tuatua atu au, ko Niphai, i tetai no runga i te tuatua taku i tata nei, tei tuatuaia e te vaa o Isaia ra. I na, e manganui te au mea ta Isaia i tuatua, e rauka ngata i toku ra iti tangata te marama i te reira, kare oki ratou i kite i te tu o te totouanga i rotopu i te ngati Iuda ra.

2. Kare oki au, ko Niphai, i apii maata ia ratou i te au mea a te ngati Iuda ra, no te mea, ko ta ratou angaanga, ko te angaanga ïa a te poiri, e ta ratou i rave ra, ko te au ravenga viivii ïa.

3. E teianei, e tata atu au ki toku ra iti tangata, ko te tangata katoatoa e ariki mai i teianei tuatua taku e tata nei, kia kite ratou i te utunga a te Atua e tae mai ki runga i to te au enua katoatoa, kia tau i te tuatua tana i tuatua ra.

4. E akarongo mai ana e toku ra iti tangata no te ngutuare o Iseraela ki taku tuatua. I na, kare kotou i marama i te tuatua a Isaia; ina ra, kua papu ki te tangata katoatoa i ki i te vaerua o te totou ra. E tuku atura au i tetai totou kia kotou mei tei tau i ta te vaerua i roto iaku nei, e totou oki au mei tei tau i te tuatua papu i roto iaku mei te tuatau i akaruke ei matou ko toku metua ia Ierusalema ra, i na oki, te mataora nei toku ngakau i te tuatua papu i toku ra iti tangata, kia apiiia ratou.

5. Koia ïa, te mataora nei toku ngakau i te au tuatua a Isaia, no te mea, no Ierusalema mai au, e kua kite toku mata i te au mea a te ngati Iuda ra, e kua kite oki au e, kua kite te ngati Iuda i te au tuatua a te au peroveta ra, e kare tetai iti tangata ke i kite atu i te au mea i tuatuaia ki te ngati Iuda mei ta ratou uaorai i kite ra, mari ra, kia apiiia ratou i te tu i te au peu a te ngati Iuda.

6. Ina ra, kare au ko Niphai i apii atu ki taku au tamariki i te tu o te apiianga a te ngati Iuda, kua noo ra au, ki Ierusalema, e no reira i kite ei au i te au ngai katoatoa i reira, e kua akakite katoa au i taku ra au tamariki i te utunga a te Atua i tuku ki runga i te ngati Iuda ra, mei tei tuatuaia e Isaia ra, e kare ra au e tata atu i te reira.

7. Ina ra, ka tata au i taku uaorai totou ma te marama i roto iaku, kua kite oki au e, kare te tangata e tarevake i te reira; ei te ra e tupu ei te au totou a Isaia ra, ei reira te au tangata katoatoa e kite papu ei, i te ra no te tupuanga o taua au totou ra.

8. E tenana, e puapinga te reira i te tamariki a te tangata nei, e ko tei manako e, kare ïa e puapinga, e tuatua pu atu au kia ratou, e e tuatua au ki toku uaorai iti tangata, no te mea, kua kite au, ka puapinga maata te reira kia ratou i te au ra openga; i taua au rā ra, ka marama ua oki ratou i te reira, i na, kua tata oki au i te reira ei meitaki no ratou.

9. E mei tetai uki i pou i te ngati Iuda no ta ratou angaanga kino ra, koia katoa kia tau i ta ratou angaanga kino, i pou ei ratou i tera uki e tera uki, e kare rava tetai i pou, mari ra kua akakiteia kia ratou e te au peroveta a te Atu ra.

10. I akakiteia ana kia ratou te mate te ka tae mai ki runga ia ratou i muri ua ake i te ra e akaruke ei toku metua ia Ierusalema ra, kua akaketaketa ra ratou i to ratou ngakau, e mei taku i totou ra, kua pou akenei ratou, mari ra ko tei apaina tuikaaia ki Babulonia.

11. E teianei, no te vaerua i roto iaku i tuatuaʼi au i taua tuatua nei. E no atu e kua apainaia ratou, ka oki mai rai ratou e ka noo ki Ierusalema; e ka akaokiia ratou ki to ratou enua ipukarea ra.

12. Ina ra, e tamaki, e te rongo tamaki to ratou, e kia tae te rā e akakite mai ei te Tamaiti anau tai a te Metua, koia te metua o te rangi e te enua katoa, iaia uaorai kia ratou, i na, no ta ratou angaanga kino ra, e no te ketaketa o to ratou ngakau, e to ratou akarongo kore ra, ka akaruke ratou iaia.

13. I na, ka akasatauro ratou iaia, e toru akera ra tona kopapa ki roto i te menema ra, e tuakaou mai ei aia mei te mate mai ma te ora; e ko tei akarongo i tona ra ingoa, ka ora ratou i te basileia o te Atua: kua mataora toku vaerua kia totou iaia, kua kite oki au i tona rā, e te akangateitei nei toku ngakau i tona ra ingoa tapu.

14. E i na, kia tu mai te Mesia mei te mate mai, e kia akakite aia iaia uaorai ki tona ra iti tangata, ki te tangata katoatoa e akarongo i tona ra ingoa, i na, ka akakore akaouia a Ierusalema. Aue oki tei tamaki maira ki te Atua e ki te au tangata o tana akonoanga.

15. E akapueurikirikiia te ngati Iuda ki te au enua katoatoa, koia ïa, e pou katoa a Babulonia, e e akapueurikirikiia te ngati Iuda e te au basileia ke ke ra.

16. E kia akapararauareia ratou, e kia papa te Atua ia ratou i te au enua ke ke ra, i te au uki e manganui, i na, i tera uki e tera uki, e tae ua atu ki te tuatau e riro ei ratou i te irinaki i te Mesia ra, i te Tamaiti a te Atua, e i te tarangaara ope kore no te tangata katoatoa, e kia tae mai taua ra e akarongo ei ratou i te Mesia ra, e e akamori atu oki i te Atua i tona ra ingoa, ma te ngakau ma, e te rima viivii kore, e kare oki e tatari atu i tetai Mesia ke, e riro ei i taua tuatau ra, e tae mai ei te rā e akarongo ei ratou i teianei au mea e tikai.

17. E akatika akaou mai te Atu i tona ra rima, kia akaoki mai i tona ra iti tangata, mei to ratou tu poiri e te kamakura, ko te akatikaanga rua ïa. E na reira aia i te akatupu i te angaanga umere e te poitirere i rotopu i te tamariki a te tangata nei.

18. E akakite atu aia i tana tuatua kia ratou, e na taua au tuatua e akava ia ratou i te rā openga ra, e e orongaia oki te reira kia ratou, kia akakite marama ua kia ratou i te Mesia mou ki tei akarukeia e ratou ra, kia akakite atu oki kia ratou e, eiaa ratou e tiaki atu i tetai Mesia ke kia tae mai, no te mea, kare e Mesia ke atu e tae mai, mari ra e Mesia pikikaa ko te ka pikikaa i te tangata nei, okotai ua oki Mesia i tuatuaia e te au peroveta, e ko te Mesia oki aia ko te ka akarukeia e te ngati Iuda ra.

19. Mei tei tuatuaia oki e te au peroveta ra, e tae mai ei te Mesia e ono anere mataiti i muri ake i te tuatau i akaruke ei toku Metua ia Ierusalema ra, e mei tei tuatuaia e te au peroveta ra, e te angela a te Atu, e topaia tona ingoa ko Iesu Mesia, te Tamaiti a te Atua ra.

20. E teianei, e toku au taeake, kua tuatua mama ua au, kia kore kotou e tarevake. E te ora ra te Atu ra ko te Atua, tei arataki i to Iseraela mei Aiphiti maira, e tei oronga mai i te mana kia Mose ra kia akaora aia i to te enua i katikatiia e te au ovi taae ra, mei te mea ka akara to ratou mata ki te ovi tana i akatu ki mua ia ratou, e kua oronga katoa mai i te mana kiaia kia papa aia i te toka, e kua tae ua maira te vai ra. Koia mou, taku e karanga atu kia kotou na, e tuatua mou te reira, e te ora ra oki te Atu ra ko te Atua, kare atu e ingoa ke i raro ake i te rangi e oraʼi te tangata nei, mari ra, ko Iesu Mesia taku i tuatua ana.

21. No reira, kua tuatua te Atu ra ko te Atua kiaku ra, ka vaioia e ka akonoia te au mea taku e tata, e ka tukuia oki ki roto i te rima o taku uanga i tera uki i tera uki, kia tika te tuatua i tuatuaia kia Iosepha, e kare rava tana uanga e pou e vai ei te enua nei.

22. E teianei, e tae teianei au mea ki tera uki ki tera uki e vai ei te enua nei, e ka tukuia atu te reira kia tau i te inangaro e te manako o te Atua: e te au enua e rauka mai i te reira, e akavaia ratou e te au tuatua i tataia i roto ra.

23. Kua maroiroi oki matou i te tata, kia apii atu i ta matou au tamariki, e to matou au taeake katoa i te akarongo i te Mesia ra, e kia akameitaki oki i te Atua; kua kite oki matou e, na roto i te aroa ua e oraʼi matou e ope ua atu te au mea ta matou ka rave.

24. E no atu e te irinaki ua nei matou i te Mesia, te akono nei oki matou i te ture a Mose, ma te akara marie ki mua i te Mesia ra, kia pou te ture i te akatupuia ra.

25. E no reira oki i tukuia mai ei te ture ra; kua riro oki te ture ei mea mate ia matou, e kua akaoraia matou e te Mesia ra na roto i to matou akarongo, kareka, no te au akaueanga ra, e akono ei matou i te ture ra.

26. Te tuatua ua nei matou i te Mesia, e te mataora nei matou i te Mesia, e te ako nei matou i te tuatua no te Mesia, e te totou nei oki matou i te Mesia, e te tata nei oki matou i ta matou au totou, kia kite ta matou au tamariki i te ngai ta ratou ka akara kia matara ta ratou au ara.

27. E tuatua oki matou i te ture, kia kite ta tatou au tamariki i te tu mate o te ture ra, e kia kite ratou i te tu mate o te ture ra, e akara ratou ki mua ki te ora i roto i te Mesia ra; e kia kite oki i te tumu i tukuia mai ei te ture ra. E kia ope te ture i te Mesia ra, kia kore ratou e akaketaketa i to ratou ngakau iaia ra, no te mea, e mea tau ïa kia akakoreia te ture ra.

28. E teianei, i na, e taku au tangata, e iti tangata marokiakia kotou; i akakite papu atu ei au kia kotou kia kore rava kotou e marama kore. E te au tuatua taku i tuatua nei, ka riro ïa ei kite ia kotou, kua rava meitaki oki te reira kia apii atu i te au tu tangata katoatoa i te mataara tika ra, ko te arataa tika ra, ko te akarongo ïa i te Mesia ma te uuna kore iaia, mei te mea oki e uuna kotou iaia, kua uuna katoa kotou i te au peroveta e te ture katoa ra.

29. E teianei, i na, e tuatua atu au kia kotou tera te mataara tika ko te akarongo ïa i te Mesia ra, ma te uuna kore iaia; ko te Mesia ra, ko Tei Tapu ia i Iseraela nei: Kia tipapa kotou ki mua iaia e kia akamori atu iaia ma to kotou ririnui katoa, e ma te manako katoa e ma te maroiroi katoa, e ma to kotou vaerua katoa e tikai, e mei te mea e akapera kotou, kare rava kotou e tuaruia ki vao.

30. E kia tano ra, e akono kotou i te au akaueanga e te au angaanga oroa a te Atua e tikai; e tae ua atu ki te tuatau e akatupuiaʼi te ture i orongaia mai kia Mose ra.