1. Te tuatua ta Isaia, te tamaiti a Amosa ra, i kite ia Iuda e Ierusalema katoa oki.

2. E riro kia tae ki te au rā openga ra, e akatinamouiaʼi te maunga o te are o te Atu ki runga i te maunga ra; e ka akateiteiia ïa ki rungao i te au tuaivi ra; e akaputuputu ua mairai to te au enua katoatoa ki reira.

3. E manganui te tangata e aere mai ma te tuatua e, aere mai, ka aere tatou ki runga i te maunga o te Atu, ki te are o te Atua o Iakoba; e nana e apii mai ia tatou i tona au aerenga; e ka aere tatou na tona ra au arataa. E na Ziona atu oki te ture i te riro anga atu, e te tuatua a te Atu, e na Ierusalema atu ïa.

4. Nana e akava i rotopu i te au enua, e e akamura atu i te au tangata e manganui, e ka tupaki oki ratou i ta ratou au koke ei auri arote, e ta ratou au korare ra, ei tipi tope ïa; kare tetai enua e tamaki mai ki tetai enua i te koke, kare oki ratou e apii akaou i te tamaki.

5. E te ngutuare o Iakoba e! e aere mai kotou, kia aere tatou na te mārama o te Atu ra; koia ïa, e aere mai, no te mea, kua aere ke kotou ravarai; ki te au ravenga kino ra.

6. No reira, e te Atu, kua akaruke oki koe i toou au tangata i te ngutuare o Iakoba, no te mea kua ki ratou i te au peu no te itinga o te rā mai; e e akarongo ratou i te purepure, mei to te Philiseti ra; e i tamataora ana ratou i te au tamariki ke ke ra.

7. Kua ki oki to ratou enua i te ario e te auro, kare oki e ope ta ratou au apinga, kua ki oki to ratou enua i te oroenua, kare rai oki e ope ta ratou au kariota.

8. Kua ki oki to ratou enua i te idolo; kua akamori ratou i te angaanga a to ratou uaorai rima, i ta to ratou uaorai mangamanga rima i anga.

9. Kare te tangata rikiriki i tupou ki raro; e kare katoa te tangata maata i taakaaka iaia uaorai, no reira, auraka koe e akakore i ta ratou au ara.

10. E te aronga viivii e, ka aere ki roto i te mate, e pipini atu ki raro i te one pueu; e te mataku i te Atu e te kaka o tona tapunui, ka pāpā ia kotou.

11. Te mata teitei o te tangata nei, ka taakaakaia ïa, e te akaparau o te tangata nei, e tukuia ïa ki raro, e ko te Atu anake ra te ka akateiteiia i te reira rā.

12. E tae vave mai te rā o te Atu Sabaota ki runga i te au basileia i na, ki runga i te au tangata ravarai, ki runga i te akaparau e te akateitei, e ki runga i te tangata katoatoa tei akateiteiia, ka tuku akaakaia ïa ki raro rava.

13. I na, ka tae mai te rā o te Atu ki runga i te au arezi o Lebanona, no te mea kua akateiteiia ratou; e ki runga oki i te au rakau o Basana ra.

14. E ki runga i te au maunga teitei, e te au tuaivi, e ki runga i te au basileia i akateiteiia, e ki runga i te au iti tangata ra.

15. E ki runga i te au patu teitei, e ki runga i te au patu i akaketaketaia ra.

16. E ki runga i te au pai o te moana, e ki runga i te au pai katoa i Taresisa, e ki runga i te au tutu akamanea ra.

17. E ka taakaakaia te teitei o te tangata e ka tukuia te akaparau ki raro rava, e ko te Atu anake te ka akateiteiia i te reira rā.

18. E te au idolo, tana ïa ka akakore e pou takiri.

19. E ka aere oki ratou ki roto i te au va toka ra, e ki roto i te au ana o te enua nei, i tae mai ei te mataku o te Atu ki runga ia ratou, e te kaka o tona tapunui ra, e papaia ratou, kia tu mai aia e akangaueue i te enua nei.

20. E kia tae ki te reira rā ka titiri atu te tangata i tona au idolo ario, e tona au idolo auro tana uaorai i anga ei akamorianga nona uaorai, ki te kiore e ki te moakirikiri.

21. Kia aere ei ratou ki roto i te va toka e ki runga i te au toka taratara, no te mea ka tae mai te mataku a Iehova ki runga ia ratou e na tona kaka e pāpā ia ratou i te rā e tu mai ei aia i te akangaueue i te enua.

22. E akaoti ana i te irinaki ki te tangata, tei te putangiu oki tona ao; eaa oki aia ka manakoia atu ei?