1. E i na, no te riri o toku nga tuakana, i kapiki maata ua atu ei au, ko Niphai, ki te Atu ra, ki toku Atua.

2. Maata rava atura to raua riri iaku, e kua titau mai ratou e ta iaku.

3. I na, kua koumuumu raua iaku, na ko atura, Te manako nei to taua teina e, tei rungoa aia ia taua nei; e tumatetenga maata oki to taua nona; e teianei kia ta taua iaia, kia kore tatou e manamanata akaou no tana au tuatua. I na oki, kare oki taua e akatika iaia ei kavana ki rungao ia taua; tei ia taua nga tuakana, te akaaere i teianei iti tangata.

4. E teianei, kare au e tata ki runga i teianei au papa i te au tuatua no to raua takinga kino anga mai iaku ra, kua rava ua ra kia akakite atu au e, i titau ana raua iaku e ta.

5. E kua ako maira te Atu iaku, kia akaruke matou ia raua, ko au, ko Niphai e te aronga ka piri mai kiaku, e kia aere atu ki te metepara ra.

6. No reira, kua rave au i toku ngutuare, e ia Zoroma e tona ngutuare e ia Samu, toku ra tuakana, e tona ngutuare, e ia Iakoba raua ko Iosepha ko toku nga teina, e i toku au tuaine, e ia ratou katoa tei inangaro i te kapiti mai kiaku ra. E ko ratou ravarai tei kapiti mai kiaku, ko ratou ïa tei akarongo i te au ako e te au eeuanga a te Atua ra; e no reira kua akarongo ratou i taku au tuatua.

7. Kua rave iora matou i to matou au puakapa e te au apinga tei maranga ia matou, aere atura ki roto i te metepara i te au rā e manganui. E tere atura matou, e ope te au rā e manganui, kua patia iora i to matou au puakapa.

8. Kua inangaro toku au tangata kia topa i te ingoa o taua ngai ra ko Niphai, no reira kua topaia ia e matou ki te ingoa ko Niphai.

9. E te aronga i kapiti mai kiaku, kua topa ratou i to ratou ingoa ko te ngati Niphai.

10. E kua akono iora matou i te au tuatua tau, te au ture, e te au akaueanga a te Atu e te au mea katoatoa, mei tei tau ki te ture a Mose ra.

11. E tei ia matou oki te Atu, e kua puapinga maata oki matou; kua ruru matou i te ua, e kokoti atura kia maata, e kua akamata iora matou i te angai i te anana mamoe, e te anana puakatoro, e te au tu puaka katoatoa ra.

12. I apai ana oki au, ko Niphai, i te au papa veo ra, e te poro katoa, koia oki, te kaveinga i maaniia e te rima o te Atu no toku metua tane, mei tei tataia ra.

13. E kua puapinga maata matou, e kua maata atura matou ki runga i te enua.

14. Kave atura au, ko Niphai, i te koke a Labana, e maani iora i tetai atu au koke mei tana koke rai te tu, ko te aere mai aea te iti tangata i tuatuaia ko te ngati Lamana ki runga ia matou, e ta ia matou; kua kite oki au i to ratou makitakita mai kiaku e ki taku au tamariki, e ki tei tuatuaia ki toku iti tangata.

15. E naku i apii i toku iti tangata i te akatu are, e te rave oki i te au tu angaanga ravarai ki te rakau, e ki te auri, e ki te kapa, e ki te veo, e ki tetai atu tu auri, e ki te auro, e ki te ario, e ki te au tu one katoatoa no reira mai taua au mea ra, e e maata i taua enua ra.

16. E kua akatu iora au, ko Niphai, i tetai iero; e mei te tu i te iero o Solomona i te patu anga, kare ra i maaniia ki te au mea oko maata ra, kare oki te reira au apinga i kitea i te enua, i kore ei i rauka kia akamanea rava kia aite mei te iero o Solomona ra. Ko te tu ra o te akatuanga mei to Solomona ra, e kua manea oki te angaanga anga.

17. E kua akamaroiroi au, ko Niphai, i toku iti tangata i te rave anga i te angaanga ma to ratou uaorai rima.

18. Inangaro iora ratou kia riro au ei ariki no ratou, kare ra au i inangaro kia riro tetai ei ariki no ratou, ina ra, kua tauturu maata au ia ratou i te au ngai tei rauka iaku.

19. I na, kua tupu tikai ta te Atu i tuatua mai ki toku nga tuakana, tana i tuatua kia raua tei na ko mai e, ka riro au ei kavana e ei puapii no raua, mei tei tau ki te au akaueanga a te Atu e tae rava mai ki te tuatau i titau mai ei raua e ta iaku.

20. I na, kua tupu ta te Atu i tuatua mai kiaku, i te na ko anga mai e, kia kore raua e akarongo i taau au tuatua, ka tipu keia raua i te aroaro o te Atu ra. E i na, kua tipu keia raua i mua i tona aroaro.

21. E kua tuku aia i te taumaa ki rungao ia raua, koia oki e taumaa kino roa no ta raua au ara. E i na oki, i akaketaketa ana raua i to raua ngakau iaia, i riro ei mei te toka pakari; i na oki, i mua ana, kua teatea to ratou pakiri, e te purotu e te manea; kia kore ra ratou e inangaroia e toku ra iti tangata, kua akakerekere te Atu, ko te Atua, i to ratou pakiri ra.

22. Te na ko maira te Atu ra ko te Atua, me kore raua e tataraara i ta raua au ara, ka akariro au ia raua ei mea inangaro koreia e toou ra iti tangata.

23. Ka taumaa katoaia te uanga a te au tangata tei piri atu ki ta raua uanga, e ka rokoia katoa ratou e taua taumaa ra. Kua tuatua maira te Atu ra, e kua peraia ïa.

24. E no te taumaa i tukuia ki runga ia ratou i riro ei ratou ei iti tangata kope, e kua ki oki ratou i te takinga kino, e kua poiri oki ta ratou au ravenga, e kua kimi aere ua ratou i te au puaka taae i roto i te metepara.

25. Kua tuatua maira te Atu ra ko te Atua, kiaku, Ka riro ratou ei papa i taau uanga, kia riro ia ratou i te akamaara mai iaku; e me kore ratou e akamaara iaku, e me kore e akono i taku ra au tuatua, ka papaia ratou e pou takiri.

26. E kua akataooanga atu au, ko Niphai, ia Iakoba raua ko Iosepha, ei taunga e ei puapii i te enua o toku iti tangata.

27. Noo iora matou ma te mataora.

28. E kua topa atu nga mataiti e toru ngauru mei te tuatau i akaruke ei matou ia Ierusalema ra.

29. E kua tata oki au, ko Niphai, i te akapapaanga o toku ra iti tangata ki runga i te au papa taku i maani.

30. Kua karanga maira te Atu te Atua, kiaku, e maani i tetai au papa ke; e kotikoti koe ki te au mea e manganui te ka meitaki i taku akaraanga, ki runga i taua au papa ra, ei puapinga no toou iti tangata.

31. Kua maani iora au, ko Niphai, i teianei au papa, tei kotikotiia ki teianei au mea. E kua pera au kia akono au i te akaueanga a te Atu ra.

32. E kua kotikoti au i tei tau i te Atua ra. E kia mataora toku ra iti tangata i te au mea a te Atua ra, ka mataora katoa ratou i taku i kotikoti ki runga i teia au papa nei.

33. E me inangaro ratou kia kite i te au mea katoatoa a toku ra iti tangata, ka kimi ratou i taku au papa ke ra.

34. Kua rava ua iaku kia tuatua e, e ā ngauru matati tei topa atu mei to matou akarukeanga ia Ierusalema, e kua tupu te tamaki e te mārōanga ki to matou au taeake.