1. E kia tuakaou te Mesia mei te mate maira, ei reira aia e akakite mai ei iaia uaorai kia kotou, e taku au tamariki e taku au taeake akaperepereia ra, e ko te tuatua tana ka tuatua atu kia kotou, ko te ture ïa ta kotou ka akono.

2. E i na oki, e tuatua atu au kia kotou, e kua kite ana au e, kia ope te au uki e manganui, e tupu ei te au tamaki maata e te maro i rotopu i toku ra iti tangata.

3. E kia tae mai te Mesia, e akakiteia mai ei te au akairo i tona ra anauanga ki toku ra iti tangata, e no tona matenga, e tona tuakaouanga katoa, e mea maata e te mataku taua rā ra i te aronga rave kino; e mate oki ratou, e e mate oki ratou i te mea, kua takinga kino ratou i te au peroveta e te aronga tapu, e kua pei ia ratou ki te toka, e i ta oki ia ratou: No reira ka tae ua atu te kapiki a te toto o te aronga tapu ki runga ki te Atua ra mei raro mai i te one ia ratou ra.

4. E teianei, ko te aronga akaparau, e tei rave i te angaanga kino, te aere maira te ra, e ka ua ratou, te na ko maira te Atu Sabaota ra, e riro oki ratou mei te teita maro ra.

5. E apuku te enua i te au tangata tei ta i te au peroveta e te aronga tapu, te na ko maira te Atu Sabaota ra: e tapoki mai te maunga ia ratou, e apai keia ratou e te puaioio, e pururu ua te au are ki runga ia ratou, e mate ei ratou e ka akaungaungaia oki ratou.

6. E atoroia mai oki ratou i te mangungu, e te uira, e te ngaueue enua, e te au tu mate katoatoa, no te mea, e tutungiia te ai o te riri o te Atua kia ratou, e ka riro ratou mei te teita maro ra, e ka pou ratou kia tae mai taua rā ra, te na ko maira te Atua Sabaota ra.

7. Aue oki te mamae, e te otooto o toku ngakau no toku au tangata i tamateia ra! Kua kite oki au, ko Niphai, i te reira, e vaitata e pou katoaia au i mua i te aroaro o te Atu ra, e kapiki atu rai au ki toku Atua e, e mea tika to au ravenga.

8. Ina ra, ko te aronga tuatua tika tei akarongo i te au tuatua a te au peroveta, e kare e ta ia ratou, ko tei tiaki marie ra i te Mesia e te au akairo te ka orongaia mai, e tei akakoromaki i te au takinga kino anga mai, i na, ko ratou te aronga kare e mate.

9. E mama maira te Tamaiti a te Tuatua Tika kia ratou ra, e ka akaora ia ratou, e au oki to ratou i roto iaia e kia ope nga uki e toru, e e manganui, i te ā o te uki te ka mate i te tuatua tika ra.

10. E kia ope anake teia au mea i te tupu, e tae viviki mai te mate maata ki toku ra iti tangata, e no atu e te mamae ua rai toku ngakau, kua kite atu au i te reira ra; e no reira te kite nei au e ka tupu rai ïa; ka oko ratou ia ratou uaorai no te mea puapinga kore; ka papaia oki ratou no to ratou nengonengo e te neneva kia mate takiri, e no te mea oki kua kauraro ratou i te tiaporo ra, e te iki ua ra ratou i te angaanga poiri, eiaa ta te marama, ka uriia ratou ki raro i ade ra.

11. E kare oki te Vaerua o te Atua e tauta ua atu rai i te tangata nei e tuatau ua atu. E kia akamutu ra te Vaerua i te tauta anga i te tangata e tae ua mai ei te mate, e e mea tumatetenga ïa i toku nei ngakau.

12. E mei taku oki i tuatua no te akapapuanga atu ki te ngati Iuda e, ko Iesu te Mesia mou, e mea tau oki kia akakite papu atu ki te au Etene e, ko Iesu te Mesia, te Atua mutu kore;

13. E akakite mai oki aia iaia uaorai na roto i te Vaerua Tapu kia ratou katoatoa tei akarongo iaia, koia ïa, ki to te au basileia ra, e to te au kopu e to te au reo, e to te au iti tangata, i te rave anga i te au semeio maata, e te au akairo, e te au mea umere, i rotopu i te tamariki a te tangata nei mei tei tau i to ratou akarongo.

14. I na, te totou nei au kia kotou i te tuatua no te au ra openga, i te ra e akatupuia mai ei teianei au mea e te Atu ra ko te Atua, ki te au tamariki a te tangata nei.

15. E kia riro taku ra uanga e te uanga katoa a toku au taeake i te akarongo kore ra, e kia papaia ratou e te Etene ra; koia ïa, e kia patia te Atu ra ko te Atua i te puakapa ia ratou e pini ua ake, e kia akanooia te vaeau ki te aua ra, e kia akatuia te au punanga ia ratou, e kia taakaakaia ratou ki raro i te pueu ra e pou takiri, ei reira e tataia te tuatua a te aronga tuatua tika, e e akarongoia te pure a te aronga akono ra, e tei riro atu ki te akarongo kore, kare oki ratou e akangaropoinaia.

16. E ko ratou oki i pou ra, ka tuatua mai ei ratou mei raro mai i te one ra, e mei raro mai i te one pueu to ratou reo i te tuatua anga mai, e to ratou reo, mei te reo o te vaerua tei matau, e oronga mai oki te Atu ra ko te Atua i te mana kiaia e raukaʼi iaia kia tuatua no ratou e mei te mea ra e, mei raro mai ïa i te one, e e koumuumu maira to ratou reo mei raro mai i te one pueu ra.

17. Te na ko maira te Atu ra ko te Atua; Ka tata ratou i te au mea e raveia i rotopu ia ratou, e ka tataia ïa e ka topiriia ïa ki roto i tetai puka, e kare ïa e rauka i te aronga i riro ki te akarongo kore, no te mea, te titau nei ratou kia akakoreia te au mea a te Atua ra.

18. E teianei, ko ratou tei akapouia ra, kua viviki to ratou tamate angaia; e te urupu o taua aronga mataku maata ra, mei te ota ïa e pueu ke ra. I na, te na ko maira te Atu ra ko te Atua: E tupu viviki te reira, i te kamoanga mata nei rai.

19. Ei reira ratou tei riro i te akarongo kore ra, e papaiaʼi e te rima o te au Etene.

20. E teitei te Etene i te nengonengo o to ratou uaorai mata, e kua turori oki ratou no te maata o to ratou papa turorianga, e kua akatu ratou i te au akonoanga e manganui; kua akakore ra ratou i te mana e te au semeio a te Atua ra, e kua ako atura i to ratou uaorai pakari e to ratou uaorai kite, kia rauka ia ratou te puapinga, e takinga kino ei i te tangata rikiriki ra.

21. E kua akatuia te au akonoanga e manganui tei akatupu i te vareae, e te taumaro, e te makitakita.

22. E vai katoa oki te au ravenga muna, mei to te tuatau taito ra, e mei te au ravenga oki a te tiaporo; koia oki te tumu o taua au mea ra, e te tumu o te ta tangata e te au ravenga tuke ke o te poiri; i na, te arataki nei aia ia ratou i te kaki ma te taura vavai ra, kia tapeka oki aia ia ratou ki tana au taura ketaketa ra e tuatau ua atu.

23. E teianei, e aku au taeake akaperepere e, e tuatua atu au kia kotou na e, kare rava te Atu ra ko te Atua, e rave i te au ravenga poiri.

24. Kare oki ana angaanga e rave ra, mari ra, e rauka i to te ao nei te meitaki i te reira ra; e aroa oki tona ki to te ao nei, e tae ua atu ki te oronga anga i tona uaorai ora, kia aere mai te au tangata ravarai kiaia. Kare roa aia e akaue ki te tangata nei e, auraka ratou e ariki i tona ra akaoraanga.

25. I na, e kapiki ana ainei aia ki tetai tangata, na ko atura, Ka aere ke atu iaku nei? I na, e karanga atu au kia kotou na, kare ïa, e tuatua mai ra aia e, E aere mai kiaku, e to te au openga o te enua nei e, ka oko i te u e te meli ma te kore e moni e ma te oko kore oki.

26. Kua akaue ainei aia ki te au tangata kia aere ratou ki vao i te au sunago, e ki vao i te au are pure ra? I na, e karanga atu au kia kotou na, kare rava ïa.

27. Kua akaue ainei aia ki te au tangata kia kore e kimi i te ora nona? I na, e karanga atu au kia kotou na, kare katoa ïa, kua oronga ua ra aia i te reira ki te au tangata ravarai, e kua akaue mai aia ki tona ra iti tangata kia kimi ratou i te au tangata katoatoa kia tataraara.

28. Kua akaue mai ainei te Atu ki te au tangata, auraka ratou e rave i tona ra meitaki? E karanga atura au kia kotou na, Auraka ïa, kua oronga uaia mai te reira ki te au tu tangata, e kare tetai e araiia i te rave mai i te reira.

29. E te akaue maira aia e, auraka te angaanga a te taunga purepure e raveia; I na, te au taunga purepure ra, ko ta te tangata ïa akateiteianga ia ratou uaorai ei marama i te ao nei, kia rauka ia ratou te puapinga, e kia akameitakiia ratou e to te ao nei; kare ra ratou e kimi i te meitaki no Ziona ra.

30. I na, na te Atu taua mea ra i kauvae; i tukuia mai ei te akaueanga e te Atu ra e te Atua, ka na ko mai ei ra e, e mea tau kia vai te aroa i roto i te au tangata; e ko taua aroa ra ko te pereperekavana ïa. E me kare a ratou aroa, kare oki a ratou e puapinga. E mei te mea e aroa to ratou, kare ratou e tuku ua i te tangata angaanga i Ziona kia mate.

31. E ko te rave angaanga a Ziona, kia angaanga aia no Ziona; e mei te mea e angaanga ratou no te moni, e mate ia ratou.

32. E teianei, kua akaue maira te Atu ra ko te Atua e, auraka te tangata e ta ua; auraka ratou e pikikaa; auraka ratou e keia; auraka ratou e akaiki puapinga kore ua i te ingoa o te Atu ra ko te Atua; auraka ratou e vareae; auraka ratou e makitakita; auraka ratou e taumaro tetai ki tetai; auraka oki ratou e akaturi; e kia kore oki ratou e rave ua i teianei au mea, ko tei rave ra, e mate ïa.

33. Kare roa taua au ara no ko mai i te Atu ra, te rave ra aia i te tuatua tika i rotopu i te tamariki a te tangata nei, kare oki aia e rave ua i tetai mea tei kore i akakite puia ki te tamariki a te tangata nei, e kua patiia ratou katoatoa e ïa kia aere ua mairai kiaia e e rave i tona meitaki, e kare aia e uuna i te tangata e aere mai kiaia, te tangata kerekere e te teatea, te tuikaa e te tuikaa kore, te tane e te vaine; e te akamaara katoa nei aia i te Etene, okotai anake to te tangata tikaanga ki mua i te Atua, te ngati Iuda e te Etene katoa oki.