1. E teianei, i na, e aku au taeake akaperepere e, kua manako au e, te akamanako nei kotou i roto i to kotou ngakau i ta kotou ka rave ka akamataʼi kotou kia aere na te mataara. I na, eaa kotou i manako akaperaʼi i roto i to kotou ngakau?

2. Kare ainei i maara ia kotou taku i tuatua atu kia kotou, i te na ko anga atu e, kia ariki kotou i te Vaerua Tapu, ka rauka ia kotou kia tuatua ma te reo o te au angela? E teianei, akapeea kotou e tuatuaʼi ma te reo o te au angela, mari ra, na te Vaerua Tapu?

3. Te tuatua atura te au angela na roto i te mana o te Vaerua Tapu, no reira e tuatuaʼi ratou i te au tuatua a te Mesia. I tuatua oki au kia kotou na, kia inangaro kotou i te tuatua a te Mesia: I na oki, ka akakite mai te tuatua a te Mesia kia kotou i te au mea ta kotou ka rave.

4. E teianei, e oti iaku te tuatua i teia au tuatua e me kare e rauka to kotou marama i te reira, no tei kore oki kotou i pati, kare oki i topapa, no reira i kore ei kotou i aratakiia ki roto i te marama e ka mate atura kotou i roto i te poiri.

5. I na oki, te tuatua akaou atu nei au kia kotou e, kia tomo kotou na te ngutupa, e kia ariki oki i te Vaerua Tapu, na te reira e akakite kia kotou i te au mea katoatoa ta kotou ka rave.

6. I na, ko te apiianga teia a te Mesia e kare atu e apiianga e orongaia mai e tae roa mai ki te tuatau e akakite mai ei aia iaia uaorai kia kotou i te kopapa nei. E kia akakite mai aia iaia uaorai kia kotou i te kopapa nei, ko te au mea tana e akakite kia kotou ra, ko te reira ta kotou e akono e tikai.

7. E teianei, kare au, ko Niphai, e tata ua atu rai, kua araiia taku tuatua anga e te Vaerua, e kua vaioia au kia otooto no te akarongo kore e te angaanga kino, e te kite kore, e te ketaketa o te ngakau o te tangata nei; no te mea, kare ratou e kimi i te kite, e kare ratou i marama i te kite maata, me orongaia te reira kia ratou ma te tuatua papu, koia mou, i te tuatua papu tikai.

8. E teianei, e aku au taeake akaperepere e, te kite nei au e, te akamanako ua nei kotou i roto i to kotou ngakau; e te tumatetenga nei au i te tuatua atu au i teia mea. Mei te mea e akarongo kotou i ta te Vaerua tei apii mai i te tangata kia pure, ka kite kotou i reira e mea tau rava kia pure; kare oki te vaerua kino e apii i te tangata kia pure, te apii ra aia e, eiaa e pure.

9. Ina ra, te karanga atu nei au kia kotou, kia pure kotou ma te tivata kore, e eiaa e roiroi, eiaa ua kotou e rave i tetai mea ki te Atu mari ra, e akamata na roto i te pure ki te Metua na roto i te ingoa o te Mesia, kia akatapu aia i ta kotou angaanga ia kotou, kia riro ta kotou angaanga ei meitaki no to kotou vaerua.