1. I na, ei taua ra e akamataʼi au i te rave i te angaanga umere i rotopu ia ratou ra, e manganui te tangata te ka akamaara i taku au akaueanga, taku i papau ki te tamariki a te tangata; kia akatika akaou atu au i toku nei rima, ko te akatikaanga rua ïa, e akaora i toku ra iti tangata, no te ngutuare oki ratou o Iseraela ra.

2. E kia akamaara oki au i te au taputou taku i papau ana kia koe e Niphai, e ki toou metua i te na ko anga e, ka akamaara au i taau uanga, e mei roto atu i toku nei vaa te tuatua a taau uanga i te riro anga atu ki taau uanga. E ka tupu ua atu taku tuatua ki te openga o te ao nei, e ka riro ïa ei reva no toku iti tangata, no roto oki ratou i te ngutuare o Iseraela.

3. E no te mea e tupu atura taku tuatua, e maata te au Etene ka tuatua e, E Bibilia! E Bibilia! E Bibilia ta matou, e kare e rauka akaou mai tetai Bibilia ke.

4. Te na ko maira te Atu ra ko te Atua; E te au neneva e, e Bibilia ta ratou, e no ko mai oki te reira i te ngati Iuda, i toku ra iti tangata koreromotu o te tuatau taito ra. Eaa oki ta ratou i akameitaki atu ei te ngati Iuda, no reira mai te Bibilia tei rauka ia ratou? I na, eaa te manako o te Etene? Kua akamaara ainei ratou i te au aerenga, e te angaanga, e te mamae o te ngati Iuda, e to ratou maroiroi iaku, i te akatupu anga i te ora no te Etene ra?

5. E te au Etene e, kua akamaara ainei kotou i te ngati Iuda, toku iti tangata koreromotu o te tuatau taito ra? Kare rava ïa, kua tao ra, e kua makitakita kotou ia ratou ra, e kare oki kotou i kimi kia akaora ia ratou ra, i na, ka akaoki atu au i taua au mea katoatoa ra ki runga i to kotou uaorai upoko; no te mea, kare oki au, ko te Atu, i akangaropoina i toku ra iti tangata.

6. E te neneva e, ko tei tuatua e, E Bibilia, E Bibilia oki ta matou, e kare oki matou e inangaro akaou mai i tetai Bibilia. I akapeea kotou i rauka mai tetai Bibilia mari ra na roto i te ngati Iuda?

7. Kare ainei kotou i kite e, e manganui atu rai te au basileia i te basileia okotai? Kare ainei kotou i kite e, ko au te Atu, to kotou Atua tei anga i te au tangata katoatoa, e te akamaara nei au i to te pa enua o te moana; e te tutara nei au i te rangi i runga, e i te ao i raro nei, e e oronga atu au i taku tuatua ki te tamariki a te tangata, i na, ki to te au basileia katoatoa o teianei ao?

8. Eaa kotou i nanunanu ei, i te mea, e rauka akaou ia kotou i tetai tuatua naku? Kare ainei kotou i kite e, kua riro te tuatua akakite a nga basileia e rua, ei kite ia kotou e, ko te Atua oki au nei? E te akamaara ua nei rai au i tetai basileia mei to tetai? No reira, mei taku i tuatua atu ki to tetai basileia, ka akapera katoa au ki to tetai. E kia kapitiia mai nga basileia e rua, e kapiti katoaia mai ta raua tuatua akakite.

9. E te pera nei au kia akakite pu ua atu au ki te au tangata e manganui e, okotai oku tu, i nanai, i teianei ra, e tuatau ua atu; e te tuatua atu nei oki au i taku au tuatua mei tei tau i toku uaorai inangaro. E no te mea, kua oti iaku te tuatua atu i tetai tuatua, eiaa kotou e manako e, kare e rauka iaku te tuatua akaou mai i tetai; no te mea, kare i oti ake taku angaanga, kare oki te reira e oti e tae ua atu ki te openga o te tangata, e kare oki e oti e tuatau ua atu.

10. E no te mea e Bibilia ta kotou, eiaa kotou e manako e, tei roto i te reira taku au tuatua katoatoa, e eiaa katoa kotou e manako e, kare e au tuatua ke atu, taku i akaue kia tataia.

11. Te akaue ra oki au i te tangata katoatoa, i te pae i te itinga o te ra, e i te pae i te opunga o te ra, e i te pae apatokerau, e i te pae i apatonga, e i te pa enua i te moana oki, kia tata ratou i te au tuatua taku ka tuatua atu kia ratou; mei roto i te puka e ka akava oki au i to te ao i te au mea i tataia ki roto i te au puka, te au tangata katoatoa kia tau i tana au angaanga mei tei tataia.

12. I na oki, e tuatua atu au ki te ngati Iuda, e ka tata ratou i te reira; ka tuatua au ki te ngati Niphai, e ka tata oki ratou i te reira, ka tuatua katoa au ki te au kopu o te ngutuare o Iseraela taku i arataki ke atu, e ka tata katoa ratou i te reira; e ka tuatua oki au ki to te au enua katoatoa o teianei ao, e ka tata oki ratou i te reira.

13. E ka rauka i te ngati Iuda te tuatua no te ngati Niphai, e ka rauka oki i te ngati Niphai te tuatua no te ngati Iuda; ka rauka oki i te ngati Niphai e te ngati Iuda katoa te tuatua no te au kopu tangata o Iseraela i ngaro ra; e ka rauka katoa i te au kopu o Iseraela i ngaro ra te tuatua no te ngati Niphai e no te ngati Iuda katoa ra.

14. Ka akaputuputuia oki toku iti tangata no te ngutuare o Iseraela ki te enua ipukarea no ratou ra; e ka akaputuputuia mai oki taku au tuatua. Ka akakite atu au ki te aronga e tamaki mai i taku au tuatua, e ki toku ra iti tangata, koia oki te ngutuare o Iseraela ra e, ko te Atua oki au, e kua papau oki au kia Aberahama ra, i te na ko anga atu e, ka akamaara ua rai au i tana ra uanga e tuatau ua atu.