Te Rua O Te Puka A Niphai

1. E akaoti akera au, ko Niphai, i te apii anga atu i toku nga tuakana, kua tuatua katoa atura to matou metua, ko Lihai, i te au mea e manganui ta te Atua i rave no raua, i te arataki anga mai ia raua mei te enua maira mei Ierusalema.

2. Kua tuatua atura aia kia raua i to raua au pekapekaanga i runga i te moana, e i te aroa oki o te Atua i te akaora anga ia raua, i kore ei raua i apukuia e te moana ra.

3. E kua tuatua katoa atura aia kia raua i te enua i taputouia ra tei rauka ia raua: E i te aroa maata o te Atu ra, i te akakite anga mai kia matou kia akaruke ke atu i te enua ra ko Ierusalema.

4. Kua tuatua oki aia e, i na, kua kite au i tetai orama, e kua kite au i te akapouanga ia to Ierusalema ra; naringa oki tatou i noo atu ki Ierusalema, kua pou katoa ia tatou.

5. E no atu rai e, e au tumatetenga to tatou, kua rauka ia tatou te enua i taputouia ra, koia tei maata atu oki i te meitaki i to te au enua katoatoa; e enua ta te Atu, ta te Atua, i taputou mai kiaku, e ka riro ïa ei enua ipukarea no taku ra uanga. I na, kua papau mai oki te Atua i teianei enua noku, e no taku au tamariki e tuatau ua atu, e no ratou katoa oki te ka aratakiia mai no tetai atu au enua e te rima o te Atu ra.

6. E teianei, te totou nei au, ko Lihai, mei tei tau i te Vaerua i roto iaku nei, kare te tangata e tae ki teianei enua, mari ra ko tei aratakiia mai e te rima o te Atu ra.

7. Kua akatapuia oki teianei enua e ïa no te aronga tana ka arataki mai. Me akono ratou iaia mei tei tau ki te au akaueanga tana i oronga mai, ka riro ïa ei enua au no ratou; e no reira kare ratou e akatuikaaia; e mei te mea ka akatuikaaia ratou, no te tuatua tika kore ïa; e me ka tupu te kino ki te maata, ka taumaaia te enua no ratou; no te aronga tuatua tika ra, ka akameitakiiaʼi e tuatau ua atu.

8. E i na, e mea tau kia vai kitea koreia teianei enua i te au basileia ke ke ra, ko te ki aea te enua i te tangata ke ke, e kore ei e ngai toe ei ipukarea.

9. I raukaʼi iaku, ia Lihai, tetai taputou, ko tei na ko maira e kia akono ratou, ko te aronga ka aratakiia mai e te Atu ra, ko te Atua, mei te enua maira mei Ierusalema, me ka akono i tana au akaueanga, ka akameitakiia ratou ki runga i te tua o te enua nei, e ka noo taka ke ratou mei te au basileia ke, kia vai ua teianei enua, e kare e tangata e takinga kino mai, e kare oki e tangata e rave atu i to ratou ipukarea; e noo ra ratou ma te au e tuatau ua atu.

10. Ina ra, kia tae mai te tuatau e tupu ei to ratou akarongo kore, i na, kua rauka oki ia ratou te au meitaki maata no te rima o te Atu ra, i kite ana oki i te tu o te angaia anga o te ao nei, e te au tangata katoa, e te au angaanga maata e te umere ta te Atu i rave mei muatangana mai rai o teianei ao; kua rauka oki ia ratou te mana kia rave i te au mea katoatoa na roto i te akarongo; e kua rauka katoa te au akaueanga mei muatangana mai, e no tona ra meitaki maata i aratakiia mai ei aia ki teianei enua i taputouia ra; i na, te karanga atu nei au, kia tae mai taua rā ra, e akaruke atu ei ratou i Tei Tapu i Iseraela ra, te Mesia mou, to ratou Akaora e to ratou Atua, i na, ei runga ia ratou te akavaanga tuatua tika akangaroi ei.

11. I na, ka arataki mai aia i te au basileia ke kia ratou, e ka oronga mai aia i te mana no ratou, e ka rave ke atu aia i to ratou ra enua ipukarea, e ka akapueurikirikiia ratou e ka papaia oki.

12. I na, ka rokoia ratou e te au tu tamaki e te au tumatetenga e manganui i tera uki i tera uki; e tenana, e taku nga tamariki, kua inangaro au kia akamaara korua; e kia akarongo marie korua ki taku nei au tuatua.

13. Kia ara mai korua; e ara mai ana i te varea moe maata, i na, i te moe o ade ra, e ruru ke atu i tena vivi i tapekaiaʼi korua na, ko te vivi ïa i tapekaiaʼi te au tamariki a te tangata nei, e i na, e tuikaaiaʼi ratou i raro i te vaarua maata o te mamae e te aue.

14. Ka ara mai ana, ka tu mai ki runga no te one pueu mai, e akarongo mai i te au tuatua a te metua apikepike, ko tei vaitata mai tona au melo i te tanumia ki roto i te menema anu e te maniania kore ra, kare te tangata e oki akaou mai mei reira; kare e maata ana te au ra toe, e aere ei au na te mataara e aereia nei e to te ao katoa.

15. Ina ra, na te Atu i akaora mai i toku vaerua i ade ra; kua akara au i tona kaka, e kua takapiniia au e te rima o tona ra kaka e tuatau ua atu.

16. Kua inangaro au kia akamaara korua e kia akono oki i te au ture e te au akaueanga a te Atu ra; e i na, ko te inangaro teia o toku vaerua mei muatangana maira.

17. Kua teimaa oki toku vaerua i te aue i tera tuatau i tera tuatau; i mataku oki au, no te ketaketa o to korua ngakau, ko te aere mai aea te Atu ra ko to korua Atua ma te ki o tona riri ki rungao ia korua, e tipu keia korua e e mate atu ei e tuatau ua atu.

18. Me kare ra, ko te tae mai aea te taumaa ki runga ia korua i te au uki e manganui, e e rokoia korua e te koke, e te onge, e te makitakita, e e aratakiia mei tei tau i te inangaro e te tuikaaanga o te tiaporo ra.

19. E aku nga tamariki e, eiaa kia rokoia korua e taua au mea nei, kia vai ra korua, ei iti tangata akaperepereia e te Atu ra. Ina ra, kia tupu tona inangaro, no te mea, e tika oki tona au aerenga ravarai e tuatau ua atu.

20. E kua karanga maira aia e kia akono kotou i taku au akaueanga, ka akameitakiia kotou ki runga i te enua nei, kia kore ra kotou e akono i taku au akaueanga, ka akatakakeia kotou mei mua i toku aroaro.

21. E teianei, kia mataora toku ngakau ia korua, e kia aere atu toku vaerua mei te ao nei ma te rekareka ia korua; e kia kore oki au e tukuia ki raro i te menema i te mii e te iriea; e tenana, ka tu mai ana ki runga, e aku nga tamariki e, e akatangata, e kia akakoro korua ma te manako okotai e te ngakau okotai, kia taokotaiia i te au mea ravarai, kia kore korua e riro ei tuikaa.

22. Kia kore korua e taumaaia ki te taumaa kino; kia kore oki korua e akatupu i te riri o te Atua tuatua tika ra ki runga ia korua, e pou rava atura i te mate mutu kore o te vaerua e te kopapa katoa oki.

23. Ka ara mai ana, e aku nga tamariki e; e aao i te kakau o te tuatua tika. E ruru atu i te au vivi i tapekaiaʼi korua na, e aere mai ki vao mei roto i te poiri, ka tu ki runga mei te one pueu mai.

24. Eiaa e maro akaou i to korua teina, ko tei akara i te au mea memeitaki rava, e tei akarongo oki i te au akaueanga a te Atu ra mei to tatou akarukeanga ia Ierusalema e teia noaʼi, e tei riro ei rave angaanga na te Atua ra i te aratakianga mai ia tatou ki te enua i taputouia ra; naringa kare aia i o tatou nei, kua mate ua tatou i te onge i roto i te metepara ra; ina ra, kua titau korua iaia kia ta, e kua akakoromaki ua ra aia i te au tumatetenga e manganui ia korua na.

25. Te mataku roa nei au ma te ruketekete oki, ko te rokoia akaou aia i te aue ia korua na; i na oki, kua tapepe korua iaia, i te na ko anga atu e, kua titau aia i te mana e te tika ki runga ake ia korua; kua kite ra au e, kare aia i titau i te mana e te tika ki rungao ia korua, kua titau ra aia i te kaka o te Atua ra, e te ora mutu kore oki no korua.

26. No tana tuatua papu kia korua, i koumuumu ei korua. Te tuatua maira korua e, i tuatua mai aia ma te marokiakia, e te tuatua ra oki korua e, kua riri oki aia ia maua; ina ra, ko tana tuatua ako, ko te mana ïa o te tuatua a te Atua tei roto iaia;ko tei tuatuaia e korua e, e riri, ko te tuatua mou ïa mei tei roto i te Atua ra; kare e tika iaia kia tāpū i te reira i te akakite pu ua mai ra i ta korua au ara.

27. E mea tau rava kia vai rai te mana o te Atua ki roto iaia, e tae ua atu ki tona akaue anga ia korua kia akono. Ina ra, kare koia uaorai, ko te Vaerua ra ïa o te Atua tei roto iaia, i tueraʼi tona vaa i te tuatua, i kore ei e tika iaia te tāpū i te reira.

28. E teianei, ko taku tamaiti ko Lamana, e ko Lemuela katoa, e ko Samu, e ko taku au tamariki, e te au tamariki a Isemaela, i na, me ka akono meitaki kotou i te au tuatua a Niphai kare kotou e mate. E mei te mea ka akarongo kotou iaia, ka oronga au i te akameitakianga no kotou, ko taku akameitakinga mua ïa.

29. E kia kore ra kotou e akarongo iaia, ka rave ke au i taku akameitakianga mua, i na, ko taku uaorai akameitakianga, e e tuku ïa ki runga iaia.

30. E tenana, e Zoroma, te tuatua atu nei au kia koe; i na, ko te tavini oki koe o Labana; ina ra, kua aratakiia mai koe mei te enua maira mei Ierusalema, e kua kite au e oa mou koe no taku nei tamaiti, ko Niphai, e tuatau ua atu.

31. E tenana oki, no toou akono meitaki, e akameitakiiaʼi toou ra uanga e tana katoa oki; e ka akameitakiia i to ratou noo anga ki runga i te enua nei; e kare e mea, mari ra te tuatua tika kore ra, ei tamanamanata i to ratou noo meitaki anga ki runga i te enua nei e tuatau ua atu.

32. E teianei, kia akono meitaki koe i te au akaueanga a te Atu ra, kua akameitakiia teia nei enua e kua akatakakeia e te Atu ei ngai noo anga no taau ra uanga e te uanga katoa oki a taku tamaiti.