1. E teianei, e Iakoba e, te tuatua atu nei au kia koe; Ko koe taku tama mua i anau i te au rā o toku au tumatetenga i te metepara ra. E i na, i toou tamarikianga i tu ei koe i te au tumatetenga e manganui no te angaanga kino a toou nga tuakana.

2. Kareka ra, e Iakoba, e taku tama mua i anau i te metepara ra, kua kite koe i te aroa maata o te Atua, e nana i akariro ke i toou au tumatetenga ei meitaki noou.

3. E ka akameitakiia toou vaerua, e ka noo koe ma te ora ki toou ra tuakana ia Niphai; e ka ope toou au ra i te angaanga na te Atua. No reira i kite ei au e, kua akaoraia koe, no te tuatua tika a toou Akaora; kua kite oki koe e, ei te ki anga o te au tuatau e aere mai ei aia e apai mai i te ora no te tangata nei.

4. E kua kite koe i tona kaka i toou mapuanga; No reira i akameitakiiaʼi koe mei ia ratou katoa tana ka matuapuru i te kopapa nei; no te mea, okotai rai Vaerua i nanai, i teianei rā, e tuatau ua atu. E kua akateateamamaoia te mataara e oraʼi i te ingaanga o te tangata ra, e e mea oronga uaia mai te akaoraanga.

5. E kua rava te apii anga ki te tangata, kia kite ratou i te meitaki e te kino. E kua orongaia mai te ture ki te tangata. Kare ra e akatikaia te tangata e te ture, koia oki, no te ture e tipu keiaʼi te tangata. Ae, na te ture i te pae kopapa i tipu ke ia ratou, e na te ture i te pae vaerua e tipu ke atu ia ratou i te meitaki, e rokoiaʼi e te aue mutu kore.

6. Na roto i te Mesia Tapu e tae mai ei te ora; kua ki oki aia i te aroa e te tuatua mou.

7. I na, kua tuku mai aia iaia uaorai ei tarangaara kia akatika i te openga o te ture kia ratou katoatoa tei puta te ngakau e tei tu i te vaerua maru e kare e akatikaia te openga o te ture ki tetai ke.

8. E teianei, e angaanga puapinga tikai kia akakite teia au mea ki to te ao nei, kia kite ratou e, kare e tkia i tetai tangata kia noo ki mua i te aroaro o te Atua, mari ra, na roto i te mana, e te aroa, e te meitaki oki o te Mesia Tapu, ko tei oronga i tona ora i te kopapa nei, e tei rave akaou aia i te reira na roto i te mana o te Vaerua, kia rauka iaia i te akatupu i te tuakaouanga o tei mate, e koia te mua te ka tu mai ra.

9. Ko te momua aia na te Atua, no te mea, ka riro aia ei tuā no te au tamariki ravarai a te tangata nei; e ka akaoraia ratou tei akarongo iaia ra.

10. E no te mea kua riro aia ei tuā no te tangata ravarai, ka ope te tangata i te aere mai ki te Atua; no reira, i tu ei ratou ki mua i tona aroaro, kia akavaia e ïa, mei tei tau ki te tuatua mou e te meitaki i roto iaia ra. E teianei, ko te openga o te ture ta Tei Tapu i oronga mai, koia oki kia akautungaia te tangata ki te utunga i akatinamouia ra; e taua utunga i akamouia ra, e patoi ïa i te mataora i akamouia, kia tau ki te tarangaara.

11. E mea tau kia vai te patoi i te au mea ravarai. Naringa kare te reira, e taku tama mua i anau i te metepara e, kare e rauka kia akatupu i te tuatua tika, e kare katoa i te tuatua kino; kare katoa te tu tapu, e te tumatetenga; kare katoa oki te meitaki, e kare oki te kino. No reira kia taruaia te au mea ravarai i te mea okotai e tikai; naringa oki te vai nei te kopapa okotai, ka vai ua ïa mei te mate e tikai, kare ona ora, e kare ona mate; kare e pe, kare e pe kore; kare e rekareka, kare katoa e tumatetenga; kare e kite, e kare katoa oki e kite kore.

12. No reira, i angaiaʼi te reira ei mea puapinga kore e tikai, e kare oki e tumu no tona ra angaia anga. I akakoreiaʼi te pakari o te Atua e tana ra au ravenga mutu kore, e kua kore katoa oki te mana e te aroa e te tuatua tika a te Atua.

13. E mei te mea e tuatua mai koe e, kare e ture, e tuatua katoa koe e, kare e ara. E mei te mea e tuatua koe e, kare e ara, e tuatua katoa koe e, kare e tuatua tika. E naringa kare e tuatua tika, kare katoa e mataora. E naringa kare e tuatua tika e te mataora, kare oki e utunga e te tumatetenga. Naringa kare taua au mea nei, kare katoa e Atua. E kare e Atua ra, kare katoa taua e ora, kare katoa e enua nei, e no reira kare tetai mea i angaia, kia angaanga, me kore ra, kia taangaangaia, no reira oki i kore ei te au mea ravarai.

14. E teianei, e taku au tamariki tamaroa e, te tuatua atu nei au kia kotou i teianei au mea ei puapinga e ei apiianga oki no kotou, no te mea, te vai nei te Atua, e nana, i anga i te au mea katoatoa ra, i te rangi e i te enua katoa, e te au mea katoatoa o roto ra; te au mea kia angaanga, e te au mea kia taangaangaia.

15. E kia akatupu i tona au akakoroanga mutu kore ki te tangata nei, i muri ake i te angaia anga to tatou nga metua mua, e te puaka o te enua e te au manu o te reva, koia oki te au mea katoatoa i angaia ra, e mea tau kia vai nga pae e rua e tikai koia oki te kai rauiia i tetai pae, e i tetai pae, ko te rakau o te ora ïa, e mea vene tetai; e e mea maramara tetai.

16. No reira kua akatika te Atu, te Atua, kia rave te tangata i tei tau ki tona uaorai inangaro. E kare e rauka i te tangata kia rave mei tei tau ki tona uaorai inangaro, mari ra, e aratakiia e tetai me kore ra, e tetai.

17. E no te au mea taku i tatau ra, e mea tau iaku kia manako au, ko Lihai, e, i topa ana tetai angela a te Atua mei te rangi mai mei tei tataia ra; no reira i riro ei aia ei tiaporo, no te mea kua titau ana aia i te kino i mua i te aroaro o te Atua.

18. E kua titau atura i te mate o te au tangata katoatoa, no te mea, kua topa aia mei te rangi mai, e ka aue aia e tuatau ua atu. No reira kua tuatua atu aia kia Eva e, koia oki taua ovi taito ra, ko te tiaporo, koia te metua o te au tuatua pikikaa ravarai, i na, kua tuatua aia e, e kai i to te rakau i rauiia ra, e kare koe e mate, e riro ra koe mei te Atua rai te tu i te kite i te meitaki e te kino.

19. E kai akera Adamu raua ko Eva i to tei rauiia ra, kua tuaruia raua ki vao i te kainga Etene, kia tanu i te enua.

20. E kua anau ta raua au tamariki, koia oki, te iti tangata katoatoa o te ao nei.

21. Kua akaroaia te au rā o te tamariki a te tangata mei tei tau ki te inangaro o te Atua, kia rauka te tataraara ka noo ei ratou i te kopapa nei, i riro ei to ratou oraanga ei timataanga, e kua akaroaia to ratou puke rā mei tei tau ki te au akaueanga ta te Atu, ta te Atua, i oronga ki te tamariki a te tangata nei. Kua oronga oki aia i te akaueanga kia tataraara te au tangata katoatoa e tikai. I akakite oki aia kia ratou e, kua ngaro ratou ravarai, no te ara a to ratou nga metua.

22. E teianei, naringa kare a Adamu i ara, kare katoa aia e inga, ka noo ua rai aia ki roto i te kainga i Etene. E ka vai ua te au mea katoatoa i angaia mei te tu rai i muri ake i te angaia anga ra, e ka vai ua e tuatau ua atu, e kare e openga.

23. E kare e rauka ia raua kia anau tamariki i reira, e ka noo ua raua ma te ara kore; kare e rauka ia raua te mataora, no te mea, kare raua e kite i te aue; kare a raua angaanga meitaki no te mea, kare raua i kite i te ara.

24. Ina ra, kua raveia te au mea ravarai e te pakari nona, ko tei kite i te au mea katoatoa.

25. Kua inga a Adamu kia riro mai te tangata, e te vai nei te au tangata kia rauka ia ratou te rekareka.

26. E ka aere mai te Mesia i te kianga o te au tuatau ra, e akaora i te au tamariki a te tangata nei i te ingaanga ra. E no te mea kua akaoraia ratou i taua ingaanga ra, kua rangatira ratou e tuatau ua atu, i te kite i te meitaki e te kino; kia rave ratou i ta ratou uaorai e inangaro, kare ra e maroia, mari ra i te utunga a te ture i te ra maata, e te openga ra, kia tau ki te au akaueanga ta te Atua i oronga maira.

27. No reira; kua rangatira te au tangata i te kopapa nei; e kua orongaia mai te au mea katoatoa kia ratou ei meitaki no te tangata. E e mea tika ia ratou kia iki i te au, e te ora mutu kore, na roto i te tuā maata o te tangata ravarai, me kore ra, kia iki i te tuikaaanga e te mate, kia tau ki te tuikaaanga o te tiaporo; no te mea te titau nei aia kia rokoia te au tangata katoatoa e te mate mei iaia uaorai.

28. E teianei, e taku au tamariki tamaroa e, kua inangaro au kia akara kotou ki taua Tuā maata ra, e akarongo oki i tana ra au akaueanga mamaata; e akono marie i tana au tuatua, e iki i te ora mutu kore, kia tau ki te inangaro o tona Vaerua Tapu.

29. E eiaa e iki i te mate mutu kore, kia tau ki to te kopapa inangaro e te kino o roto i te reira ra; ko tei tuku i te mana ki te vaerua o te tiaporo, kia akatuikaa e kia arataki oki ia kotou ki raro i ade, kia tutara aia ki runga ia kotou i roto i tona uaorai basileia.

30. Kua tuatua atu au i teia manga tuatua kia kotou katoatoa, e taku au tamariki tamaroa e, i te au ra openga o toku noo anga i te kopapa nei, e kua iki oki au i te pae meitaki, kia tau ki te tuatua a te peroveta ra. E kare atu oku akakoroanga, mari ra, ko te ora mutu kore no to kotou vaerua. Amene.