1. E teianei, i na, e toku au taeake e, kua tuatua atu au kia kotou mei ta te Vaerua i akaue mai kiaku; kua kite oki au e, ka tupu te reira e tikai.

2. Te au mea e tataia no roto mai i taua puka ra, e riro te reira ei mea puapinga maata i te au tamariki a te tangata nei, e ei puapinga maata rava ki ta tatou uanga, ko te toenga ratou no te ngutuare o Iseraela.

3. Ei taua rā ra e tuatuaʼi to te au akonoanga ra e, no te Atu matou; e ka tuatua to tetai ke e, no te Atu matou. E pera ua rai ratou ko tei akatu i te akonoanga tei kore i akatuia i te Atu ra.

4. E ka maro tetai ki tetai, e maro oki to ratou au tiaki tetai ki tetai, e apii ratou ma to ratou uaorai kite, e uuna oki i te Vaerua Tapu, ko tei oronga mai i te mana kia tuatua.

5. E e uuna ratou i te mana o te Atua, o Tei Tapu i Iseraela, e e karanga atu ratou ki te tangata e, Ka akarongo mai ana ia matou, e akarongo i ta matou tuatua, i na, kare oki e Atua i teia ra nei, no te mea, kua oti i te Atu ra ko te Akaora, i te rave i tana angaanga, e kua oronga aia i tona mana ki te tangata nei.

6. I na, ka akarongo mai ana kotou ki taku tuatua, me tuatua ratou e, kua raveia tetai semeio e te rima o te Atua, eiaa e irinaki i te reira, no te mea, kare aia i te Atua o te semeio i teianei tuatau, kua oti aia i te rave i tana angaanga.

7. I na, e manganui te ka tuatua e, ka kai, ka inu, ka akanavenave, apopo oki e mate ei tatou; e e meitaki to tatou i reira.

8. E manganui oki te tangata e tuatua mai e, ka kai, ka inu, e kia akanavenave, ina ra, kia mataku i te Atua, ka akatika ua aia kia rave i te ara meangiti, koia ïa, ka pikikaa iti, ka akaapa i tetai no tana tuatua, ka ko i te vaarua no toou ra tangata tupu; kare e kino me akapera; ka rave oki i teianei au mea katoatoa, apopo oki e mate atu ei tatou; e mei te mea e ara ta tatou, e papa mai ei te Atua ia tatou i te papaanga meangiti, e i te openga ra e akaoraiaʼi tatou i te basileia o te Atua.

9. I na, ka akapera oki te au tangata e manganui i te apii i te au tuatua pikikaa, e te puapinga kore, e te tarevake oki; e ka akanengonengo ratou i to ratou ngakau, e e kimi marie ratou i te uuna i ta ratou tuatua i te Atu ra, ei roto oki i te poiri ta ratou au angaanga.

10. E ka kapiki ua mai te toto o te aronga tapu mei roto i te one ia ratou.

11. Koia ïa, kua akaruke ratou i te arataa, e kua viivii ratou.

12. No te nengonengo e no te au puapii pikikaa, e te apiianga tarevake oki, i viivii ei ta ratou au akonoanga, e i akateiteiiaʼi to ratou au akonoanga; no te akaparau e akanengonengo ia ratou.

13. E ka rave ua ratou i ta te tangata rikiriki no te au are pure manea, e e rave ua i ta te tangata rikiriki no to ratou kakau manea; e kua takinga kino ratou i te tangata maru e te tangata akaaka i te ngakau ra; e no to ratou parau e akateitei ratou ia ratou uaorai.

14. E kua ketaketa to ratou kaki, e kua teitei to ratou katu, i na, no te akaparau e te ara, e te viivii, e te akaturi, e aere ke oki ratou katoatoa mari ra, e toko iti ua ake, ko tei aru i te Mesia ma te tu akaaka; kareka ra e apa ratou i tetai au mea, no te mea, kua apiiia ratou e te tuatua a te tangata nei.

15. E te aronga karape, e te aronga apiiia, e tei apinga nui, tei akamaata ia ratou uaorai i te nengonengo o to ratou ngakau, e ratou katoa tei akaturi, e ratou katoa tei taruri ke i te au ravenga tika a te Atu; Aue, Aue, Aue oki ratou, te na ko maira te Atu te Atua Mana Katoatoa, no te mea ka uriia ratou ki raro i ade ra.

16. Aue oki ratou tei kopae ke atu i te mea tika no te mea puapinga kore, e tei akakino i te mea meitaki, na ko maira, e mea puapinga kore ïa; no te mea ka tae mai te ra e atoro viviki mai ei te Atu ko te Atua i to te ao katoa nei, e i te ra e paraʼi ratou i te kino ra, e mate ei ratou.

17. Ina ra, mei te mea e tataraara to te ao nei i to ratou kino e ta ratou au angaanga viivii, kare oki ratou e mate, te na ko maira te Atu Sabaota.

18. Ina ra, e pururu taua akonoanga maata e te viivii ra, koia oki te vaine akaturi o to te ao katoa nei, ka pururu ki raro ki te one, e pururu anga maata oki tona.

19. Ka ngaueue oki te basileia o te tiaporo, e kia akaaraaraia to reira i te tataraara e tikai, me kore ra, e tapeka te tiaporo ia ratou ki tona ra au vivi mutu kore, kia tupu to ratou riri, e mate atura.

20. I na oki, ei taua rā ra, e akariri ei aia i te ngakau o te au tamariki a te tangata nei, e tupu ei to ratou riri i te au mea memeitaki.

21. E akaau aia i tetai pae, e e akamoe oki ia ratou i te akapuanga no te kopapa, ka tuatua ratou e, E meitaki te au mea katoatoa i Ziona, kua manuia Ziona, e meitaki te au mea katoatoa, e akapera te tiaporo i te pikikaa anga ia ratou, e te arataki marie anga atu oki ia ratou ki raro i ade.

22. E i na, e taparu atu aia i tetai pae, e e tuatua atu aia kia ratou e, kare e ade; e e na ko atura aia kia ratou e, kare au i te tiaporo, kare rava oki e tiaporo e pera oki aia i te komuumu ki to ratou taringa, kia tapeka aia ia ratou ki tona au vivi rikarika, kare rava e ora i reira.

23. I na, kua tapekaia ana ratou i te mate, e i ade; e kua tu te mate, e ade, e te tiaporo, e tei tapekaia ki te reira, ki mua i te terono o te Atua, e e akavaia mei tei tau i ta ratou angaanga e tikai; ei reira ratou e aere atu ei ki te ngai i akonoia no ratou, koia oki te roto ai e te teio, e ko te mate openga kore ïa.

24. E tenana, e aue oki te tangata e noonoo ua ra i Ziona!

25. Aue oki aia tei kapiki atura e, e meitaki to ko nei;

26. I na, aue oki aia tei akarongo i te tuatua a te tangata e tei akaruke ra i te mana o te Atua, e ta te Vaerua Tapu i oronga mai.

27. I na, aue oki te tangata e tuatua mai e, I ariki ana matou e kare matou e inangaro akaou mai i tetai.

28. I na, aue oki ratou tei ruketekete, e tei riri no te tuatua mou a te Atua ra. I na oki, ko tei patuia ki runga i te papa ra, e ariki aia ma te rekareka; e ko tei patuia ki runga i te one ua ra, e ruketekete aia, ko te inga aea aia.

29. Aue oki aia ki tei karanga mai e, I ariki ana matou i te tuatua a te Atua, kare oki matou e inangaro i tetai atu tuatua a te Atua, kua rava oki ta matou i teianei.

30. I na oki, te na ko maira te Atu ra ko te Atua, E oronga au ki te tamariki a te tangata i te tuatua na rungao i te tuatua, i te irava na rungao i te irava, tei ko nei tetai manga, tei ko tetai, e e ao to tei akono i taku au ture, e to tei akarongo ki taku au tuatua, e rauka ia ratou te kite pakari; no te mea e oronga ua atu au kia ratou tei ariki; e ratou tei tuatua mai e, kua rava ta matou, e rave keia oki ta ratou.

31. E mate aia tei irinaki i te tangata, e tei rave i te kopapa ei rima nona, e tei akarongo i te tuatua a te tangata, mari ra i orongaia ta ratou tuatua na roto i te mana o te Vaerua Tapu.

32. Aue oki te au Etene, te na ko maira te Atu ra ko te Atua Sabaota e akaroa ua rai oki au i toku rima ia ratou i tera ra i tera ra, e uuna ratou iaku; kareka ra, e aroa au ia ratou, te na ko maira te Atu ra ko te Atua, me ka tataraara ratou, e me aere mai kiaku nei; e akatika ua rai au i toku rima i te au ra katoatoa, te na ko maira te Atu ra ko te Atua Sabaota.