Sección 106
Rrevelasiõ oñemeʼẽvaʼekue José Smith upe Proféta rupive, Kirtland, Ohio-pe, Noviembre 25, 1834-pe. Ko rrevelasiõ haʼe Warren A. Cowdery-pe g̃uarã, Oliver Cowdery rykeʼy.
1–3, Warren A. Cowdery oñehenói ofisial presidente upepeguáramo; 4–5, Pe Jeju Mokõiha ndoipyʼamondyimoʼãi tesape raʼykuérape mondaháicha; 6–8, Tuicha jehovasa ogueru Tupaópe jeservi jeroviarekópe.
1 Che aipota che rembiguái Warren A. Cowdery toñehenói ha toñeordena che tupaogua sumo sacerdote presidente Freedom retãme ha umi tenda jerereguápe;
2 Ha tomboʼe che evanhélio opaveʼỹva ha tohupi iñeʼẽpu oñatõi hag̃ua tavayguakuérape, ndahaʼéi haʼe oikohápente, ha katu umi kondádo ijypypeguápe;
3 Ha tomoĩ opa hiʼára ko llamamiénto yvate ha marangatúpe, Che ameʼẽva chupe koʼág̃a, ohekávo jesarekópe yvága rréino ha hekojoja, ha opa mbaʼe tekotevẽva oñemoĩvéta; mbaʼapohára ohupytýgui hembiapo repy.
4 Ha avei, añetehápe Che haʼe peẽme, Ñandejára jeju hiʼag̃uimaha, ha oipyʼamondýita múndope mondaháicha pyharekue—
5 Upévare, pejekuʼajokua, oiko hag̃ua pendehegui tesape raʼykuéra, ha ani upe ára penepyʼamondýi mondaháicha.
6 Ha avei, añetehápe Che haʼe peẽme oĩhague vyʼapavẽ yvágape che rembiguái Warren oñakãityrõguare che sétrope, ha oñemomombyry tekovekuéra ñemoñuhãgui;
7 Upévare, ojehovasapyre che rembiguái Warren, Che arekótagui poriahuvereko hendive g̃uarã; ha ikorasõ jejapóramo jepe, Che ambotuicháta chupe oñemomirĩramo che renondépe.
8 Ha Che ameʼẽta chupe grásia ha jeroviapy ojejoko mbarete hag̃ua; ha haʼe memérõ peteĩ testígo ijeroviarekóva ha peteĩ tesape tupaópe g̃uarã, Che ambosakoʼíkuri chupe g̃uarã peteĩ koróna umi che Ru rogaguasúpe. Taupéicha. Amén.