Sección 71
Rrevelasiõ oñemeʼẽvaʼekue José Smith, upe Proféta ha Sidney Rigdon-pe, Hiram, Ohio-pe, diciembre 1, 1831-pe. Upe Proféta ombojoapýkuri Biblia ñembohasa, Sidney Rigdon ndive, chupe g̃uarã ohaíva ramo, ojehupyty peve ko rrevelasiõ, upe ára oñemboykeʼimihague upe tembiapo, ikatu hag̃ua okumpli hikuái ñehekomboʼe oñeʼẽmeʼẽva ko rrevelasiõme. Umi hermano-kuéra osẽvaʼerãkuri omboʼe omboguapy hag̃ua umi ñepuʼã andu ouʼakue Tupao rehe, oñeguenohẽ haguére umi ñeʼẽ ohaiʼakue Ezra Booth, oapostatavaʼekue.
1–4, José Smith ha Sidney Rigdon oñembou omomarandu hag̃ua evanhélio; 5–11, Umi Santokuérape ohayhuʼỹva oñemoapañuãita.
1 Péina ápe, péicha heʼi peẽme Ñandejára, che rembiguaikuéra José Smith, upe taʼýra, ha Sidney Rigdon, añetehápe og̃uahẽmaha ára tekotevẽháme ha iporãmaha peipeʼa pende juru pemombeʼu hag̃ua che evanhélio, umi rreinogua mbaʼekuéra, pemohesakãvo iñemimbykuéra umi escritura rupive, upe Espíritu pehẽngue ha upe puʼaka oñemeʼẽtava peẽme rupive, jepeve Che aipotaháicha.
2 Añetehápe Che haʼe peẽme, pemomarandu múndope umi tenda jerereguápe, ha avei tupaópe, peteĩ ára mbyky aja, ojeikuaauka peve peẽme.
3 Añetehápe, kóva haʼe peteĩ misiõ Che ameʼẽva peẽme peteĩ ára mbyky aja.
4 Upévare, pembaʼapo che víñape. Pehenói umi yvy ári oikovévape, ha petestifika, ha pembosakoʼi pe tape umi tembiapoukapykuéra ha umi rrevelasiõ oútavape g̃uarã.
5 Koʼág̃a, péina ápe, kóva iñarandu; pe omoñeʼẽva, toikũmby ha tomog̃uahẽ avei.
6 Pe omog̃uahẽvape oñemeʼẽ hetavétagui, jepeve, puʼaka.
7 Upévare, pemoapañuãi umi pende rayhuʼỹvape; pehenói chupekuéra pejotopa hag̃ua atýpe ha añoháme; ha pendejeroviarekórõ, ojehechaukáta iñemotĩnguéra.
8 Upévare, peheja tomoĩ hikuái iñeimoʼã mbareteve Ñandejára rehe.
9 Añetehápe, péicha heʼi peẽme Ñandejára—ndaipóri árma ojejapóva oñepuʼã hag̃ua penderehe oñakarapuʼãtava;
10 Ha oimeraẽ tekove ohupíramo iñeʼẽpu penderehe, oñemoapañuãita che árape.
11 Upévare, peñongatu che rembiapoukapykuéra; umíva añetegua ha ijeroviareko. Taupéicha. Amén.